რა ხდებოდა 12 ივნისს საფონდო ბირჟაზე?

გუშინ საფონდო ბირჟა მოიცვა საინტერესო სიახლეებმა, რომლებმაც სხვადასხვა კომპანიის აქციებზე მნიშვნელოვანი გავლენა იქონია. დღეს კი შემოგთავაზებთ საინტერესო დეტალებს ისეთი კომპანიების შესახებ, როგორებიც არის Caterpillar, Broadcom, Affirm Holdings და Oracle.

Caterpillar

გუშინ Caterpillar-ის მენეჯმენტმა განაცხადა, რომ აქციების გამოსყიდვის გეგმა გააფართოვა და დივიდენდები გაზარდა.

Caterpillar აწარმოებს გიგანტურ მანქანებს, რომლებიც მშენებლობასა და სამთო მოპოვებაში გამოიყენება. მისმა წარმომადგენლებმა განაცხადეს, რომ დირექტორთა საბჭომ 2022 წელს დაწყებულ აქციების გამოსყიდვის ამჟამინდელ პროგრამას $20 მილიარდი დაუმატა. მთლიანობაში გამოდის, რომ Caterpillar $21.8 მილიარდის ღირებულების აქციებს გამოისყიდის. პროგრამას ვადის გასვლის თარიღი არ აქვს.

გარდა ამისა, კომპანიამ გაზარდა კვარტალური დივიდენდი $0.11-ით — $1.41-მდე. გაზრდილ დივიდენდებს 20 აგვისტოს მიიღებენ ინვესტორები, რომლებიც 22 ივლისის მდგომარეობით Caterpillar-ის აქციონერთა რიგებში იქნებიან.

Caterpillar განაგრძობს ინვესტორებისთვის კაპიტალის დაბრუნებას

Caterpillar-ის მენეჯმენტის მოლოდინით, კომპანია განაგრძობს ინვესტორებისთვის არსებითად მთელი თავისუფალი ფულადი ნაკადების დაბრუნებას თავისი მანქანების, ენერგეტიკისა და სატრანსპორტო საშუალებების (ME&T) ოპერაციებიდან. ეს მიმართულება კომპანიის შემოსავლის უმეტეს ნაწილზეა პასუხისმგებელი გარდა ფინანსური მომსახურების განყოფილების მიერ გამომუშავებული შემოსავლისა.

აღმასრულებელმა დირექტორმა — ჯიმ უმპლბიმ თქვა, რომ კომპანია განაგრძობს ძლიერი თავისუფალი ფულადი ნაკადების გენერირებას ME&T მიმართულებისგან „გრძელვადიანი მომგებიანი ზრდისთვის ჩვენი საწარმოო სტრატეგიის განხორციელების გზით“.

როგორ აფასებენ ანალიტიკოსები Caterpillar-ის აქციებს?

Caterpillar-ის აქციების ამჟამინდელი ფასი დაახლოებით $329.00-ს შეადგენს. კომპანიას ამ ეტაპზე 14 ანალიტიკოსი აფასებს. საშუალო სამიზნე ფასი $369.23-ს შეადგენს, მაქსიმალური პროგნოზი — $440.00-ს, ხოლო მინიმალური — $257.00-ს. საშუალო სამიზნე ფასი Caterpillar-ის აქციების ამჟამინდელი ფასიდან დაახლოებით 12.3%-იან ზრდას გულისხმობს. კომპანიის აქციებს 14 ანალიტიკოსიდან 8-მ მიანიჭა ყიდვის რეკომენდაცია, 5-მა — ნეიტრალური რეიტინგი, ხოლო 1-მა — გაყიდვის რეკომენდაცია.

Broadcom

გუშინ, ბაზრის დახურვის შემდეგ, Broadcom-მა კვარტალური შედეგები გამოაქვეყნა — შემოსავალმა ანალიტიკოსების პროგნოზს გადააჭარბა, თუმცა მოგება მოლოდინზე ნაკლები აღმოჩნდა. კომპანიის მენეჯმენტმა მოსალოდნელზე მაღალი შემოსავლის გამომუშავება ხელოვნურ ინტელექტს (AI) მიაწერა და აქციების 1/10 პროპორციით დაყოფაც დააანონსა. საბოლოოდ, „after-hours”¹ ვაჭრობაში Broadcom-ის აქციების ფასი 14%-ზე მეტით გაიზარდა. წლის დასაწყისიდან ეს მაჩვენებელი დაახლოებით 38%-ით არის გაუმჯობესებული.

Broadcom არის ამერიკული ტრანსნაციონალური კომპანია, ნახევარგამტარული და ინფრასტრუქტურული პროგრამული უზრუნველყოფის პროდუქტების ფართო სპექტრის დამპროექტებელი, დეველოპერი, მწარმოებელი და გლობალური მიმწოდებელი.

კვარტალური შედეგები

ფისკალური 2024 წლის მეორე კვარტალში Broadcom-ის შემოსავალი წლიურად 43%-ით — $12.49 მილიარდამდე გაიზარდა, რამაც გადააჭარბა ანალიტიკოსების პროგნოზს — $12.04 მილიარდს.

ბუღალტრული აღრიცხვის საყოველთაოდ მიღებული პრინციპების (GAAP) მიხედვით გამოთვლილმა წმინდა მოგებამ ამ პერიოდში $2.12 მილიარდი, ანუ თითო განზავებულ აქციაზე (EPS) $4.42 შეადგინა (უოლ სტრიტის პროგნოზი — $4.97). შედარებისთვის, გასული ფისკალური წლის იმავე კვარტალში ამ მაჩვენებელმა $3.48 მილიარდს, ანუ თითო აქციაზე $8.15-ს მიაღწია. კორექტირებულმა EPS-მა კი $10.96 შეადგინა, რამაც გადააჭარბა ანალიტიკოსების პროგნოზს — $10.85-ს.

„Broadcom-ის მეორე კვარტლის შედეგები კვლავ განპირობებული იყო ხელოვნურ ინტელექტზე მოთხოვნით და VMware-ით“ — განაცხადა Broadcom-ის აღმასრულებელმა დირექტორმა, ჰოკ ტანმა და დასძინა: „ჩვენი AI პროდუქტებიდან მიღებულმა შემოსავალმა კვარტალში რეკორდულ ნიშნულს — $3.1 მილიარდს მიაღწია“.

გარდა ამისა, Broadcom-ის მენეჯმენტმა დააანონსა აქციების 1/10 პროპორციით დაყოფა, რათა ისინი უფრო ხელმისაწვდომი გახდეს ინვესტორებისთვის და თანამშრომლებისთვის. Broadcom-ის უკვე დაყოფილი აქციები საფონდო ბირჟაზე 15 ივლისიდან იქნება ხელმისაწვდომი.

Broadcom & Vmware

Broadcom-ის მენეჯმენტმა კონკურენტის — Vmware-ის შეძენის გადაწყვეტილების შესახებ დაახლოებით 2 წლის წინ განაცხადა, მაგრამ ეს გარიგება საბოლოოდ 2023 წლის ნოემბრის ბოლოსთვის შედგა.

$69 მილიარდის ღირებულების შეთანხმების დახურვა სამჯერ გადაიდო მარეგულირებლების მიერ იმ მიზეზით, რომ, შესაძლოა, ამ კომბინაციას ჯანსაღი კონკურენტული გარემო დაეზიანებინა. ბოლო დასტური კომპანიებმა ნოემბერში მიიღეს ჩინეთის ოფიციალური პირებისგან.

არსებობდა ეჭვი, რომ შეთანხმება არ შედგებოდა აშშ-სა და ჩინეთს შორის არსებული დაძაბულობის გამო, რომელიც ტექნოლოგიურ პროდუქტებზე პრეზიდენტ ჯო ბაიდენის საექსპორტო სანქციებით არის გამოწვეული. ეს დაძაბულობა გარკვეულწილად შემცირდა ნოემბერში, როდესაც ბაიდენი შეხვდა ჩინეთის ლიდერს — სი ძინპინს კალიფორნიაში, ეკონომიკური თანამშრომლობის კონფერენციაზე.

Broadcom-ის აღმასრულებელმა დირექტორმა — ჰოკ ტანმა განმარტა, რომ კომბინირებული კომპანია გლობალურ საწარმოებს საშუალებას მისცემს, გამოიყენონ კერძო და ჰიბრიდული ქლაუდ გარემო, რაც მათ უფრო დაცულსა და მოქნილს გახდის.

ტრანზაქციის დასრულების შემდეგ ნიუ-იორკის საფონდო ბირჟაზე (NYSE) VMware-ის აქციები მიმოქცევიდან იქნა ამოღებული.

როგორ აფასებენ ანალიტიკოსები Broadcom-ის აქციებს?

Broadcom-ის აქციების ამჟამინდელი ფასი დაახლოებით $1,495.00-ს შეადგენს. კომპანიას ამ ეტაპზე 20 ანალიტიკოსი აფასებს. საშუალო სამიზნე ფასი $1,648.00-ს შეადგენს, მაქსიმალური პროგნოზი — $2,000.00-ს, ხოლო მინიმალური — $1,430.00-ს. საშუალო სამიზნე ფასი Broadcom-ის აქციების ამჟამინდელი ფასიდან დაახლოებით 10.2%-იან ზრდას გულისხმობს. კომპანიის აქციებს 20 ანალიტიკოსიდან 18-მა მიანიჭა ყიდვის რეკომენდაცია, 2-მა — ნეიტრალური რეიტინგი და არცერთმა — გაყიდვის რეკომენდაცია.

Affirm Holdings

გუშინ „იყიდე ახლა, გადაიხადე მოგვიანებით“ (BNPL) კომპანიის — Affirm Holdings-ის აქციების ფასი თითქმის 6%-ით გაიზარდა, რადგან ინვესტორებს პოზიტიური რეაქცია ჰქონდათ ტექნოლოგიურ გიგანტ Apple-თან მის გაფართოებულ თანამშრომლობაზე. წლის დასაწყისიდან კომპანიის აქციების ფასი დაახლოებით 23%-ით არის შემცირებული.

Apple-ის მენეჯმენტმა ცოტა ხნის წინ განაცხადა, რომ Affirm-ის BNPL გადახდის სერვისი ინტეგრირებული იქნება Apple Pay-ში, რაც მომხმარებლებს iPhone-ების და iPad-ების მეშვეობით სასურველი ნივთების ახლავე შეძენას გაუადვილებს.

ოპტიმიზმის ტალღა

მიმდინარე კვირის დასაწყისში Apple-ის ახალი AI შესაძლებლობების დებიუტი შედგა — მათ შორის არის Siri-ის განახლებები და თუნდაც OpenAI-ის ChatGPT-თან ინტეგრაცია. ამან Apple-ის მიმართ ინვესტორების დადებითი განწყობა გამოიწვია, რის შედეგადაც ტექნოლოგიური გიგანტის აქციების ფასი ორშაბათიდან დღემდე 8%-ზე მეტით გაიზარდა. წლის დასაწყისიდან ეს მაჩვენებელი დაახლოებით 15%-ით არის გაუმჯობესებული.

Morgan Stanley-ის, Evercore-ისა და Bank of America-ს ანალიტიკოსები თვლიან, რომ Apple-ის ახალმა AI ფუნქციებმა შეიძლება ხელი შეუწყოს ახალი მოწყობილობების გაყიდვებს, რაც გამოიწვევს გაზრდილი გაყიდვების პერიოდს, რომელსაც „სუპერ ციკლი“ ეწოდება.

შესაბამისად, ინვესტორები ოპტიმისტურად არიან განწყობილნი Affirm-ის პერსპექტივების მიმართ და მიიჩნევენ, რომ ეს ყველაფერი კომპანიის შედეგებზე პოზიტიურად აისახება.

როგორ აფასებენ ანალიტიკოსები Affirm Holdings-ის აქციებს?

Affirm Holdings-ის აქციების ამჟამინდელი ფასი დაახლოებით $36.00-ს შეადგენს. კომპანიას ამ ეტაპზე 13 ანალიტიკოსი აფასებს. საშუალო სამიზნე ფასი $35.70-ს შეადგენს, მაქსიმალური პროგნოზი — $65.00-ს, ხოლო მინიმალური — $20.00-ს. საშუალო სამიზნე ფასი Affirm Holdings-ის აქციების ამჟამინდელი ფასიდან დაახლოებით 0.1%-იან კლებას გულისხმობს. კომპანიის აქციებს 13 ანალიტიკოსიდან 3-მა მიანიჭა ყიდვის რეკომენდაცია, 7-მა — ნეიტრალური რეიტინგი, ხოლო 3-მა — გაყიდვის რეკომენდაცია.

Oracle

სამშაბათს, სავაჭრო დღის დასრულების შემდეგ, Oracle-მა მოსალოდნელზე სუსტი კვარტალური ანგარიში წარადგინა. თუმცა გუშინ კომპიუტერული ტექნოლოგიების კომპანიის აქციების ფასმა 13%-ზე მეტით მოიმატა და ისტორიულ მაქსიმუმს მიაღწია. წლის დასაწყისიდან ეს მაჩვენებელი დაახლოებით 35%-ით არის გაუმჯობესებული.

კვარტალური შედეგები

თუმცა სხვა მაჩვენებლები მიუთითებს, რომ ბიზნესი საკმაოდ ჯანსაღია. შეკვეთების შესრულების ვალდებულებები (ეს მეტრიკა აღწერს სერვისებს, რომლებიც შეთანხმებულია, მაგრამ ჯერ არ არის მიწოდებული და შემოსავლად არ ფიქსირდება) წლიურად 44%-ით — $98 მილიარდამდე გაიზარდა. გარდა ამისა, ქლაუდ ინფრასტრუქტურის სერვისის შემოსავალი 42%-ით — $2 მილიარდამდე გაუმჯობესდა. ეს ჯერ კიდევ გაცილებით დაბალი მაჩვენებელია, სხვა ტოპ ქლაუდ ინფრასტრუქტურის სერვისის პროვაიდერების შედეგებთან შედარებით, მაგრამ გვიჩვენებს, რომ Oracle-ის საერთო ეკოსისტემის ღირებულება ხელს უწყობს მომხმარებლების მოზიდვას და მათი ხარჯების გაზრდას კომპანიის ამ ღირებულ კატეგორიაში.

რაც შეეხება მომავალს, Oracle-ის მენეჯმენტი მოელის, რომ მიმდინარე ფისკალური წლის პირველ კვარტალში კომპანიის შემოსავალი წლიურად 6%-7%-ით გაუმჯობესდება, ხოლო EPS $1.31-$1.35-ს მიაღწევს.

Oracle-ის აქციების ფასის გუშინდელი ზრდა კი დიდწილად განაპირობა ერთმა მნიშვნელოვანმა სიახლემ — მენეჯმენტმა დააანონსა გარიგებები Microsoft-თან, OpenAI-სთან და Alphabet-ის Google Cloud-თან.

როგორ აფასებენ ანალიტიკოსები Oracle-ის აქციებს?

Oracle-ის აქციების ამჟამინდელი ფასი დაახლოებით $140.00-ს შეადგენს. ამ ეტაპზე კომპანიას უოლ სტრიტის 21 ანალიტიკოსი აფასებს. საშუალო სამიზნე ფასი $146.00-ს შეადგენს, მაქსიმალური პროგნოზი — $171.00-ს, ხოლო მინიმალური — $105.00-ს. საშუალო სამიზნე ფასი Oracle-ის აქციების ამჟამინდელი ფასიდან დაახლოებით 4%-იან ზრდას გულისხმობს. კომპანიის აქციებს ამ 21 ანალიტიკოსიდან 10-მა მიანიჭა ყიდვის რეკომენდაცია, 11-მა — ნეიტრალური რეიტინგი და არცერთმა — გაყიდვის რეკომენდაცია.

ამ კომპანიების აქციების შეძენა საქართველოს ბანკის მობილბანკში შეგიძლიათ ბმულზე.

[1] სავაჭრო აქტივობის პერიოდი, რომელიც რეგულარული საბაზრო სესიის შემდეგ მიმდინარეობს.