ფინანსურ ბაზრებზე მიმდინარე კვირაში მნიშვნელოვანი მოვლენები გველოდება და დღევანდელ სტატიაში სწორედ მათ მიმოვიხილავთ.
შრომის ბაზრის სექტემბრის ანგარიში
აშშ-ის შრომის ბაზრის სექტემბრის ანგარიშს, რომელიც პარასკევს გამოქვეყნდება, ყურადღებით დააკვირდებიან ბაზრის მონაწილეები, ისევე როგორც ფედერალური სარეზერვო ბანკის (Fed) წარმომადგენლები. მათი მიზანია, დაინახონ, იკვეთება თუ არა შემდგომი გაუარესების ნიშნები შრომის ბაზარზე მას შემდეგ, რაც აგვისტოს მონაცემები სუსტი აღმოჩნდა.
ნეგატიურმა სიგნალებმა შრომის ბაზრიდან უბიძგა Fed-ს, შეემცირებინა საპროცენტო განაკვეთები 50 საბაზისო პუნქტით — რაც უფრო დიდი ნაბიჯი იყო, ვიდრე ზოგიერთი ეკონომისტი მოელოდა. სექტემბრის მონაცემებმა შეიძლება მოგვცეს მითითებები იმის შესახებ, დასჭირდება თუ არა ცენტრალურ ბანკს განაგრძოს განაკვეთების შემცირება შრომის ბაზრის გასაძლიერებლად.
ბაზრის მეთვალყურეები ამ კვირაში ასევე შეისწავლიან შესყიდვების მენეჯერების ინდექსს (PMI), როგორც პროდუქტების, ისე — მომსახურების სექტორიდან. ეს ეკონომიკური ინდიკატორი იკვლევს პროდუქტის მენეჯერებს, რომლებიც ყიდულობენ კომპანიისთვის საჭირო მასალებს პროდუქციის საწარმოებლად.
Fed-ის ოფიციალური პირების გამოსვლები
მიმდინარე კვირაში ინვესტორებს მიეცემათ შესაძლებლობა, მოუსმინონ ფედერალური სარეზერვო ბანკის ოფიციალური პირებს — დღეს Fed-ის თავმჯდომარის, ჯერომ პაუელის გამოსვლაა დაგეგმილი. ეს იქნება მისი პირველი გამოსვლა მას შემდეგ, რაც Fed-მა საპროცენტო განაკვეთების 50 საბაზისო პუნქტით შემცირების გადაწყვეტილება მიიღო.
ფედერალური სარეზერვო საბჭოს წევრი — მიშელ ბოუმენი და კანზას სიტის Fed-ის პრეზიდენტი, ჯეფ შმიდი კი საზოგადოების საბანკო კონფერენციაზე ისაუბრებენ. ატლანტას, კლივლენდის და რიჩმონდის Fed-ის პრეზიდენტები — შესაბამისად, რაფაელ ბოსტიჩი, ბეთ ჰემაკი და ტომ ბარკინი — ასევე არიან ცენტრალური ბანკის იმ ოფიციალურ პირებს შორის, რომლებიც ამ კვირაში სიტყვით გამოვლენ.
პარასკევს ნიუ-იორკის Fed-ის პრეზიდენტი — ჯონ უილიამსი გამოჩნდება ღონისძიებაზე, რომელიც ორიენტირებულია ნიუ-იორკის ეკონომიკაზე.
კვარტალური ანგარიშები
აღსანიშნავია, რომ ხვალ კვარტალურ შედეგებს გამოაქვეყნებს სპორტული ფეხსაცმლისა და ტანსაცმლის მწარმოებელი ამერიკული კომპანია — Nike. ბოლო პერიოდში მის მიმართ ინტერესი გაიზარდა მას შემდეგ, რაც ცნობილი გახდა, რომ ძველი აღმასრულებელი დირექტორი — ელიოტ ჰილი თანამდებობას უბრუნდება. მას დაევალება კვლავ აღმასვლის გზაზე დააყენოს კომპანია, რომლის აქციების ფასიც წლის დასაწყისიდან დაახლოებით 17%-ით არის შემცირებული.
გარდა ამისა, ოთხშაბათს, ბაზრის დახურვის შემდეგ, კვარტალურ ანგარიშს კიდევ ერთი ცნობილი ბრენდი — Levi Strauss წარადგენს.
