საინვესტიციო ამოცანა არის მიზნების ერთობლიობა, რომელიც ინვესტორის ფინანსურ პორტფელს განსაზღვრავს. აქტივთა მენეჯერების მიერ მისი დადგენის მიზანი კლიენტისთვის პორტფელის ოპტიმალური ნაზავის შექმნაა. სათანადო ინვესტიციების შერჩევის პროცესში სახელმძღვანელოს სწორედ საინვესტიციო ამოცანა წარმოადგენს.
აქტივთა მენეჯერის მიერ ინვესტორისთვის მომზადებული კითხვარი ხშირად ავლენს ფინანსურ მიზნებსა და ამოცანებს, განსაზღვრავს აქტივების განაწილებას საინვესტიციო პორტფელში ინდივიდის დროის ჰორიზონტის, რისკისადმი ტოლერანტობისა და ფინანსური მდგომარეობის საფუძველზე.
საინვესტიციო ამოცანის გააზრება
ინფორმაცია, რომელსაც ინვესტორი აქტივების მენეჯერს თავისი საინვესტიციო ამოცანის დასადგენად აწვდის, შეიძლება მოიცავდეს წლიურ შემოსავალს და ქონებას, საშუალო წლიურ ხარჯებს, ინვესტიციების განაღდების ვადას და საინვესტიციო პორტფელის ღირებულების შემცირების ქვედა ზღვარს, რომელიც ინდივიდისთვის კომფორტულ დონეს წარმოადგენს. პორტფელი სწორედ ამ კითხვებზე გაცემული პასუხების მიხედვით იქმნება.
რისკისადმი მაღალი ტოლერანტობის მქონე ინვესტორი, რომელიც ზრდით არის დაინტერესებული შეიძლება ფლობდეს მოკლევადიან პერსპექტივაზე ფოკუსირებულ აგრესიულ, უმეტესად აქციებით დაკომპლექტებულ პორტფელს. ზომიერად რისკიანი ინვესტორისთვის უფრო შესაფერისი იქნება დაბალანსებული პორტფელი, რომელიც აქციებსა და ობლიგაციებს მოიცავს. დაბალრისკიან, კონსერვატიულ ინვესტორს შეუძლია ფოკუსირდეს შემოსავლის მომტან საინვესტიციო პორტფელზე, რომელიც დივიდენდურ აქციებს და ობლიგაციებს აერთიანებს.
როდესაც ფინანსური გარემოებები ან მიზნები იცვლება, ინვესტორისთვის სასარგებლო იქნება საკუთარი მდგომარეობის ხელახლა გაანალიზება და ამის საფუძველზე, საჭიროების შემთხვევაში, საინვესტიციო პორტფელში აქტივთა განაწილების კორექტირება.
