საინვესტიციო ფირმის — Wedbush Securities-ის ანალიტიკოსებმა განაცხადეს, რომ Apple-ის (AAPL) ხელოვნური ინტელექტით (AI) განპირობებული ზრდის ციკლი შეიძლება აღმოჩნდეს უფრო ძლიერი, ვიდრე აქამდე იყო მოსალოდნელი. მათ iPhone 16-ის მიწოდების პროგნოზები გაზარდეს აზიაში მოთხოვნის პერსპექტივების გადახედვის საფუძველზე.
Wedbush Securities-ის ანალიტიკოსებმა განაცხადეს: „აზიის ბოლოდროინდელი მონაცემები გვაძლევს მეტ თავდაჯერებას, რომ განახლების ციკლი Apple-ისთვის მომავალი წლის განმავლობაში დიდი ხნის ნანატრ ზრდის აღორძინებას განაპირობებს“. აქ საუბარია მომხმარებლების მიერ Apple-ის მოწყობილობების განახლების ციკლზე — აღსანიშნავია, რომ მსოფლიოს მასშტაბით ადამიანები 2.2 მილიარდ iOS მოწყობილობას და 1.5 მილიარდ iPhone-ს ფლობენ.
ბოლო პერიოდში Apple-ს ჩინეთის ბაზარზე სირთულეებთან მოუწია შეჭიდება, რაც გაზრდილი კონკურენციითა და საფასო ზეწოლით იყო განპირობებული. მესამე კვარტალში ჩინეთში Apple-ის გაყიდვები წლიურად 6.5%-ით შემცირდა, თუმცა ტექნოლოგიური გიგანტის აღმასრულებელმა დირექტორმა — ტიმ კუკმა თქვა, რომ აქედან დაახლოებით 3% ვალუტის კურსის მერყეობასთან იყო დაკავშირებული. მისი თქმით, მიუხედავად ამისა, რეგიონში გაუმჯობესების ნიშნებია ფისკალური 2024 წლის პირველ ნახევართან შედარებით. ეს კი მიგვანიშნებს, რომ, სავარაუდოდ, ბოლოდროინდელმა ფასდაკლებებმა შედეგი გამოიღო.
Wedbush-ის ანალიტიკოსებმა iPhone 16-ის მიწოდების პროგნოზები მინიმუმ 90 მილიონამდე გაზარდეს, რაც უფრო მაღალია, ვიდრე უოლ სტრიტის მოლოდინი — 80-84 მილიონი. საინვესტიციო ფირმაში აღნიშნეს, რომ iPhone-ის დაახლოებით 300 მილიონ მომხმარებელს მოწყობილობა ბოლო ოთხი წლის განმავლობაში არ განუახლებია.
Wedbush-ში ასევე ხაზი გაუსვეს დიდ მოლოდინს iPhone 16-თან და Apple Intelligence-თან დაკავშირებით. სმარტფონის ახალი მოდელი, სავარაუდოდ, სექტემბერში გამოვა, ხოლო მისი AI განახლებები, უფრო მოგვიანებით იქნება ხელმისაწვდომი.
Wedbush-ის ანალიტიკოსების თქმით, Apple-ის მოწყობილობებში AI-ის ინტეგრაციამ და მასთან დაკავშირებულმა მონეტიზაციის შესაძლებლობებმა შეიძლება ინვესტორებისთვის თითო აქციას $30-$40 დაამატოს.
საინვესტიციო ფირმაში გასულ თვეში განაცხადეს, რომ, შესაძლოა, Apple-ის საბაზრო კაპიტალიზაციამ $4 ტრილიონს მიაღწიოს iPhone-ის განახლების ციკლის მოახლოებასთან ერთად, რაც სწორედ ხელოვნური ინტელექტის შესაძლებლობებით აღჭურვილი iPhone 16-ის გამოშვებით იქნება გამოწვეული.
„უოლ სტრიტი ახლა იწყებს ნელ-ნელა იმის აღიარებას, რომ კომპანია, Apple Intelligence-ის საშუალებით, სამომხმარებლო ხელოვნური ინტელექტის რევოლუციის კარიბჭე იქნება“ — განაცხადეს Wedbush-ის ანალიტიკოსებმა.
საინვესტიციო ფირმაში მიიჩნევენ, რომ სამომხმარებლო ხელოვნური ინტელექტის ათვისების ტალღა შეიძლება სწორედ iPhone 16-ის საშუალებით, სექტემბრის შუა რიცხვებში დაიწყოს.
როგორ აფასებს უოლ სტრიტი Apple-ის აქციებს?
Apple-ის აქციების ამჟამინდელი ფასი დაახლოებით $218.00-ს შეადგენს. ამ ეტაპზე კომპანიას უოლ სტრიტის 32 ანალიტიკოსი აფასებს. საშუალო სამიზნე ფასი $248.78-ს შეადგენს, მაქსიმალური პროგნოზი — $300.00-ს, ხოლო მინიმალური — $186.00-ს. საშუალო სამიზნე ფასი Apple-ის აქციების ამჟამინდელი ფასიდან დაახლოებით 14.3%-იან ზრდას გულისხმობს. კომპანიის აქციებს ამ 32 ანალიტიკოსიდან 24-მა მიანიჭა ყიდვის რეკომენდაცია, 7-მა — ნეიტრალური რეიტინგი, ხოლო 1-მა — გაყიდვის რეკომენდაცია.
Apple-ის აქციების შეძენა საქართველოს ბანკის მობილბანკში შეგიძლიათ ბმულზე.
კონტენტი მოწოდებულია საინფორმაციო მიზნით და არ წარმოადგენს ფინანსურ რჩევას. ყველა ინვესტიცია შეიცავს რისკს, ამიტომ აუცილებელია, ინვესტირებამდე საკუთარი კვლევა ჩაატაროთ.
