გასული თვის განმავლობაში MercadoLibre-ს აქციების ფასი 18%-ზე მეტით გაიზარდა მას შემდეგ, რაც ლათინოამერიკული ელექტრონული კომერციის ლიდერმა, მიუხედავად არგენტინაში არსებული ეკონომიკური პრობლემებისა, კიდევ ერთი ძლიერი კვარტალური ანგარიში გამოაქვეყნა.
როგორც ქვემოთ მოცემულ გრაფიკზე ჩანს, MercadoLibre-ს აქციების ფასი თავდაპირველად მაისის დასაწყისში, კვარტალური შედეგების წარდგენის შემდეგ გაიზარდა. შემდეგ კი, თვის განმავლობაში ნიშნულმა უფრო მაღლა აიწია ფართო საბაზრო ტენდენციების შესაბამისად.
კიდევ ერთი ძლიერი კვარტალური ანგარიში
MercadoLibre-მ კვარტალური შედეგები 2 მაისს, სავაჭრო დღის დასრულების შემდეგ, გამოაქვეყნა. მომდევნო დღეს კი კომპანიის აქციების ფასი 8%-ზე მეტით გაუმჯობესდა.
კომპანიამ განაგრძო სწრაფი ზრდის სერია როგორც ელექტრონულ კომერციაში, ისე ციფრულ გადახდებში — ვალუტის უცვლელი კურსის პირობებში მთლიანი საქონლის მოცულობა (GMV) წლიურად 71%-ით გაიზარდა, ხოლო გადახდების მთლიანი მოცულობა — 86%-ით.
მთლიანი კვარტალური შემოსავალი წლიურად 36%-ით — $4.33 მილიარდამდე გაიზარდა, რამაც ბევრად გადააჭარბა ანალიტიკოსების პროგნოზს — $3.85 მილიარდს.
MercadoLibre-მ აჩვენა ძლიერი ზრდა ბრაზილიაში, საიდანაც ის შემოსავლის დაახლოებით ნახევარს იღებს. ამ რეგიონში GMV 30%-ით გაიზარდა. კომპანიამ ასევე დააფიქსირა მსგავსი მატება მექსიკაში, კიდევ ერთ წამყვან ბაზარზე.
MercadoLibre-მ ასევე აჩვენა პროგრესი MELI+ ლოიალობის პროგრამის მიმართულებით, რომელიც გთავაზობთ Amazon Prime-ის მსგავს სარგებელს — უფასო მიწოდებას და სტრიმინგ კონტენტს მესამე მხარის სტრიმინგ სერვისებთან პარტნიორობით.
გარდა ამისა, ლათინოამერიკული კომპანიის კორექტირებული საოპერაციო შემოსავალი წლიურად 44%-ით — $477 მილიონამდე გაიზარდა, ხოლო მოგებამ თითო აქციაზე (EPS) $3.97-დან $6.78-მდე მოიმატა. ამ მაჩვენებელმაც გადააჭარბა უოლ სტრიტის პროგნოზს — $6.03-ს.
თვის დარჩენილ ნაწილში MercadoLibre-ს აქციების ფასი კიდევ უფრო გაიზარდა იმის ფონზე, რომ Nasdaq Composite დაუბრუნდა რეკორდულ მაჩვენებლებს Nvidia-სა და სხვა ტექნოლოგიური გიგანტების ძლიერი კვარტალური შედეგების გამო. ამას ხელი შეუწყო იმანაც, რომ აშშ-ში საპროცენტო განაკვეთის შემცირება უფრო სავარაუდო გახდა.
რას უნდა მოველოდეთ მომავალში?
MercadoLibre-ს მენეჯმენტს მომავლისთვის პროგნოზები არ წარმოუდგენია, მაგრამ ხაზი გაუსვა გარკვეულ დამატებით ზეწოლას მარჟებზე, რომლებიც დაკავშირებულია მისი საკრედიტო ბიზნესის ზრდასთან და ვადაგადაცილების შემთხვევების მატებასთან, ასევე არგენტინის ეკონომიკაში არსებულ გამოწვევებთან.
როგორ აფასებენ ანალიტიკოსები MercadoLibre-ს აქციებს?
MercadoLibre-ს აქციების ამჟამინდელი ფასი დაახლოებით $1,629.00-ს შეადგენს. კომპანიას ამ ეტაპზე 11 ანალიტიკოსი აფასებს. საშუალო სამიზნე ფასი $1,960.00-ს შეადგენს, მაქსიმალური პროგნოზი — $2,200.00-ს, ხოლო მინიმალური — $1,650.00-ს. საშუალო სამიზნე ფასი MercadoLibre-ს აქციების ამჟამინდელი ფასიდან დაახლოებით 20.3%-იან ზრდას წარმოადგენს. კომპანიის აქციებს 11 ანალიტიკოსიდან 10-მა მიანიჭა ყიდვის რეკომენდაცია, 1-მა — ნეიტრალური რეიტინგი და არცერთმა — გაყიდვის რეკომენდაცია.
MercadoLibre-ს აქციების შეძენა საქართველოს ბანკის მობილბანკში შეგიძლიათ ბმულზე.
