Meta-მ (META) თავისი ყოველწლიური „Connect“ კონფერენცია გუშინ აღმასრულებელი დირექტორის — მარკ ცუკერბერგის გამოსვლით დაიწყო, რომელმაც წარადგინა Quest 3S ჩაფხუტის იაფი ვერსია, Orion-ის გაფართოებული რეალობის (AR) სათვალეები, ხელოვნური ინტელექტის (AI) ახალი ფუნქციები და სხვა.
აღსანიშნავია, რომ გუშინ Meta Platforms-ის აქციების ფასმა თითქმის 1%-ით მოიმატა და ისტორიულ მაქსიმუმს მიაღწია. წლის დასაწყისიდან ეს მაჩვენებელი დაახლოებით 64%-ით არის გაუმჯობესებული.
Quest 3S
ღონისძიება ცუკერბერგმა დაიწყო 299.99$-იანი Quest 3S-ის წარდგენით — წინასწარი შეკვეთები დაიწყო გუშინვე, ხოლო ახალი VR სათვალე ხელმისაწვდომი უკვე 15 ოქტომბრიდან იქნება. სხვა ვერსია უფრო მაღალი მეხსიერებით ეღირება $399.99, რაც ჯერ კიდევ დაბალია გასულ წელს გამოსული Quest 3-ის ფასზე, რომელიც 499.99$-ს შეადგენს.
აღმასრულებელი დირექტორის თქმით, Quest 3S-ს ექნება ისეთივე ტექნოლოგიური უნარები, როგორიც — Quest 3-ს. ეს მოდელი შეძლებს იმავე ფუნქციების და აპლიკაციების გამოყენებას. ამ ორ ვერსიას შორის ძირითადი განსხვავებები შენახვის მოცულობა და ეკრანი იქნება.
Ray-Ban ჭკვიანი სათვალეების განახლებები
Meta-მ წარადგინა ახალი ფუნქციები თავისი ჭკვიანი სათვალეებისთვის, რომლებიც დამზადებულია Ray-Ban-თან პარტნიორობით. ამ ფუნქციებს შორის არის ლაივ თარგმანი; გაფართოებული პარტნიორობა, რომელიც მომხმარებლებს საშუალებას აძლევს, სათვალეების საშუალებით აკონტროლონ აპლიკაციები, როგორიც არის, მაგალითად, Spotify (SPOT); ისეთი ინფორმაციის დამახსოვრების შესაძლებლობა, როგორიც არის ტელეფონის ნომრები ან საპარკინგე ადგილები.
კონფერენცია ასევე მოიცავდა Meta’s Orion-ის ჭკვიანი სათვალეების, პროტოტიპული AR სათვალეების წარდგენას, რომელიც კომპანიის წარმომადგენლების თქმით, შეიძლება იყოს „ყველაზე მოწინავე AR სათვალე, რომელიც ოდესმე შექმნილა“. თუმცა ცუკერბერგი ვარაუდობს, რომ შესაძლოა კომპანიას, სამომხმარებლო ვერსიის გამოშვებამდე, გარკვეული დრო დასჭირდეს — მისი თქმით, Meta ამ პერიოდს პროდუქტისთვის შიდა პროგრამული უზრუნველყოფის განვითარებისთვის გამოიყენებს.
ხელოვნური ინტელექტის ახალი ფუნქციები და ცნობილი ადამიანების ხმები
მარკ ცუკერბერგმა წარმოადგინა Ray-Ban-ის სმარტ სათვალეების თარგმანის ფუნქცია, სხვა ახალ AI სიახლეებთან ერთად, როგორიცაა ცნობილი ადამიანების ხმები მისი Meta AI ასისტენტისთვის. სხვა ახალი ფუნქციები მოიცავდა ფოტოს რედაქტირების გაძლიერებულ შესაძლებლობებს და ავტომატური თარგმანის ხელსაწყოს Reels-ში.
Meta AI ცდილობს, ყველაზე პოპულარული AI ასისტენტი გახდეს
Meta ასევე გამოუშვებს თავის უახლეს AI მოდელს, Llama 3.2-ს, რათა გააძლიეროს ახალი AI ფუნქციები და დეველოპერებს მისცეს საშუალება, კომპანიის მოდელები საკუთარი AI ინსტრუმენტების შესაქმნელად გამოიყენონ. მარკ ცუკერბერგმა გუშინდელ ღონისძიებაზე ასევე განაცხადა, რომ Meta-ს AI ასისტენტს ამჟამად დაახლოებით 500 მილიონი ყოველთვიური აქტიური მომხმარებელი ჰყავს. აღმასრულებელი დირექტორის თქმით, 2024 წლის ბოლოსთვის Meta AI ინდუსტრიაში ყველაზე ხშირად გამოყენებული AI ასისტენტი იქნება.
როგორ აფასებენ ანალიტიკოსები Meta-ს აქციებს?
Meta Platforms-ის აქციების ამჟამინდელი ფასი დაახლოებით $568.00-ს შეადგენს. კომპანიას ამ ეტაპზე 45 ანალიტიკოსი აფასებს. საშუალო სამიზნე ფასი $586.49-ს შეადგენს, მაქსიმალური პროგნოზი — $660.00-ს, ხოლო მინიმალური — $475.00-ს. საშუალო სამიზნე ფასი Meta Platforms-ის აქციების ამჟამინდელი ფასიდან დაახლოებით 3.2%-იან ზრდას გულისხმობს. კომპანიის აქციებს 45 ანალიტიკოსიდან 41-მა მიანიჭა ყიდვის რეკომენდაცია, 3-მა — ნეიტრალური რეიტინგი, ხოლო 1-მა — გაყიდვის რეკომენდაცია.
Meta Platforms-ის აქციების შეძენა საქართველოს ბანკის მობილბანკში შეგიძლიათ ბმულზე.
