PayPal-ის აქციებმა, მომავალი წლის არასახარბიელო პერსპექტივის შემდეგ, წლის განმავლობაში ღირებულების თითქმის ნახევარი დაკარგა.
მიუხედავად იმისა, რომ Bank Of America (BofA) 2022 წელს კომპანიის აქციების რაიმე წინსვლას ვერ ხედავს, ძნელია ინვესტორმა გაუძლოს იმ მაცდურ ღირებულებას, რომელიც ახლა PayPal-ის აქციებს აქვს. კომპანიის აქციების P/E (ფასი/მოგება) კოეფიციენტი ახლა 21-ის ტოლია.
ფეიფალის ხელმძღვანელობა ვარაუდობს, რომ 2022 წლის განმავლობაში კორექტირებული მოგება თითო აქციაზე არ შეიცვლება და 2021 წელთან შედარებით 3%-ით მეტი იქნება. ასე რომ, მიუხედავად იმისა, რომ ფეიფალის აქციები ბაზარზე კომპანიის საჯარო ასპარეზზე გამოსვლის შემდეგ ყველაზე დაბალი P/E კოეფიციენტით მიმოიქცევა, სავსებით შესაძლებელია, რომ მისი აქციები ჩამორჩენას ამ წელსაც განაგრძობს.
ზოგიერთმა ანალიტიკოსმა ეჭვქვეშ დააყენა საკითხი იმის შესახებ, ხომ არ იჭრება PayPal-ის ტერიტორიაზე ისეთი კონკურენტები, როგორიც არის Apple Pay, რომელიც Apple-ის მოწყობილობებშია ინტეგრირებული. წლის დასაწყისისთვის Apple Pay-ის მთელი ბაზა 1.8 მილიარდს შეადგენდა. თუმცა PayPal-ის ბოლო კვარტლის ანგარიშში არსებობს რამდენიმე მაჩვენებელი, რომელიც მიუთითებს, რომ კომპანია 400 მილიონზე მეტი მომხმარებლისთვის კვლავ სანდო ბრენდია.
ფეიფალი იტყობინება, რომ თითო ანგარიშზე ტრანზაქციების რაოდენობა, წინა წლის შესაბამის კვარტალთან შედარებით, 11%-ით გაიზარდა. ეს მნიშვნელოვანი ზრდაა 2020 წლის მეოთხე კვარტლის იმავე მაჩვენებელთან შედარებით, რომელიც მხოლოდ 1% იყო.
PayPal-ს 49 მილიონი აქტიური ანგარიში დაემატა და კომპანიამ 2021 წელს ეს მაჩვენებელი 426 მილიონამდე გაზარდა. ეს კი იმაზე მიუთითებს, რომ PayPal დამკვიდრებული და სანდო ბრენდია.
მომხმარებელთა ანგარიშების რაოდენობის ზრდა 2022 წელს შენელდა, რადგან კომპანია ახლა უფრო თითო მომხმარებლიდან მეტი შემოსავლის მიღებაზეა ორიენტირებული, ვიდრე ანგარიშების რაოდენობაზე. როგორც ჩანს, ეს არის ყველაზე დიდი ფაქტორი, რომელიც აქციების წარმადობაზე ახდენს გავლენას.
ფეიფალის ადრეული პროგნოზის მიხედვით, 2023 წელს შემოსავალი და კორექტირებული მოგება 20%-ზე მეტით უნდა გაიზარდოს. ბოლოდროინდელი, ინვესტორების მიერ ფეიფალის აქციების მასიური გაყიდვები, შესაძლოა, ზრდის დროებით შენელებაზე გადაჭარბებული რეაქციით იყოს გამოწვეული. შენელების მიზეზი კი ნაწილობრივ მენეჯმენტის ზრდის სტრატეგიის ცვლილებამ და eBay-ის მიერ გადახდების საკუთარ სისტემაზე გადასვლამ გამოიწვია.
PayPal-ში ინვესტიციის ჩადებამდე, შეგვიძლია დაველოდოთ, რეალურად დააჩქარებს თუ არა კომპანია 2022 წლის ბოლოსკენ ზრდას.
