Amazon 1994 წლის 5 ივლისს ჯეფ ბეზოს მიერ დაარსდა. თავდაპირველად ეს იყო წიგნების ონლაინ მაღაზია, დღეს კი Amazon მსოფლიოში უდიდესი ელექტრონული კომერციის კომპანიაა, რომლის ფლაგმან ვებგვერდზე დაახლოებით 350 მილიონ პროდუქტს შეხვდებით. Amazon.com ყოველთვიურად 2.5 მილიარდ ვიზიტორს იზიდავს.
თუმცა Amazon ონლაინ საცალო ვაჭრობის საზღვრებს გასცდა. ახლა კომპანია მართავს მსოფლიოს უდიდეს ქლაუდ გამოთვლით პლატფორმას — Amazon Web Services-ს (AWS), რომლის საშუალებითაც ის ბიზნეს კლიენტებს ასობით ციფრულ გადაწყვეტას სთავაზობს, რათა მათ ონლაინ ოპერირებაში დაეხმაროს. AWS Amazon-ის ხელოვნური ინტელექტის ინიციატივების ერთგვარი „საცავია“, დაწყებული ნახევარგამტარების დაპროექტებით, დასრულებული ენობრივი მოდელების შემუშავებით.
Amazon ასევე მართავს მსოფლიოში ერთ-ერთ უდიდეს ვიდეო სტრიმინგის პლატფორმას და ციფრულ სარეკლამო ბიზნესს, რომელიც მთელ ორგანიზაციაში ყველაზე სწრაფად მზარდი სეგმენტია.
Amazon-ის შემოსავალი ბოლო 20 წლის განმავლობაში საოცრად გაიზარდა
20 წლის წინ, ანუ 2004 წელს, Amazon-ის ბიზნესს ქლაუდ გამოთვლის, სტრიმინგის და ციფრული რეკლამირების მიმართულება არ ჰქონდა. იმ წელს კომპანიის ელექტრონული კომერციის ბიზნესმა ყველაზე დიდი წვლილი შეიტანა შემოსავალში, რომელმაც $6.9 მილიარდი შეადგინა.
20 წლის განმავლობაში კი ეს მაჩვენებელი უზარმაზარი 8230%-ით გაუმჯობესდა და გასულ წელს $574.8 მილიარდს მიაღწია. ამ მაჩვენებლით Amazon აშშ-ის კომპანიებს შორის მეორე ადგილს იკავებს — მას წინ უსწრებს Walmart, რომლის შემოსავალმაც გასული 12 თვის განმავლობაში $638.78 მილიარდს მიაღწია.
2023 წელს ონლაინ გაყიდვებმა ამაზონის მთლიანი შემოსავლის 40.3% შეადგინა, ამიტომ ელექტრონული კომერცია კომპანიის უდიდესი სეგმენტის სტატუსს ინარჩუნებს. მეორე მხრივ, კომპანიის საოპერაციო მოგებაში ყველაზე დიდი წვლილი AWS-ს შეაქვს, ამიტომ ის ინვესტორების ყურადღების ცენტრში მოექცა.
რაც შეეხება სეგმენტების მიხედვით განაწილებას, ბოლო 10 წლის განმავლობაში Amazon-ის შემოსავალი ასე გამოიყურებოდა:
*ცხრილში მონაცემები მოცემულია მილიარდებში.
წყარო: Amazon
ანალიტიკოსების შეფასებები
Amazon-ის აქციების ამჟამინდელი ფასი დაახლოებით $173.00-ს შეადგენს. კომპანიას ამ ეტაპზე 41 ანალიტიკოსი აფასებს და აქციებს ყველა მათგანი ყიდვის რეკომენდაციას ანიჭებს. საშუალო სამიზნე ფასი $208.23-ს შეადგენს, მაქსიმალური პროგნოზი — $230.00-ს, ხოლო მინიმალური — $175.00-ს. საშუალო სამიზნე ფასი Amazon-ის აქციების ამჟამინდელი ფასიდან დაახლოებით 20.3%-იან ზრდას გულისხმობს.
Amazon-ის აქციების შეძენა საქართველოს ბანკის მობილბანკში შეგიძლიათ ბმულზე.
