გუშინ, ბაზრის გახსნამდე, Dick’s Sporting Goods-მა მოსალოდნელზე ძლიერი კვარტალური შედეგები გამოაქვეყნა. სავაჭრო დღის განმავლობაში კი სპორტული საქონლის საცალო ვაჭრობის კომპანიის აქციების ფასმა თითქმის 16%-ით მოიმატა და ისტორიულ მაქსიმუმს მიაღწია. წლის დასაწყისიდან ეს მაჩვენებელი დაახლოებით 55%-ით არის გაუმჯობესებული.
გაყიდვები და მოგება საოცრად ძლიერია
Dick’s Sporting Goods-ისთვის ბოლო რამდენიმე წელიწადი შესანიშნავი იყო და ინვესტორები მაჩვენებლების შემცირებას მოელოდნენ. თუმცა, როგორც ჩანს, მომხმარებლები კვლავ ყიდულობენ სპორტულ საქონელს — გასულ კვარტალში, რომელიც 4 მაისს დასრულდა, კომპანიის ტრანზაქციები და „average ticket” გაუმჯობესდა. შედეგად, Dick’s Sporting Goods-ის ერთი და იმავე ლოკაციების გაყიდვები1 წლიურად 5%-ით გაიზარდა.
ფისკალური 2024 წლის პირველ კვარტალში სპორტული საქონლის კომპანიის შემოსავალი წლიურად 6%-ით — $3.02 მილიარდამდე გაიზარდა (ანალიტიკოსების პროგნოზი — $2.94 მილიარდი). წმინდა მოგებამ კი სამთვიან პერიოდში $275 მილიონს მიაღწია, ანუ მოგება თითო აქციაზე (EPS) $3.3 იყო, რამაც ასევე გადააჭარბა უოლ სტრიტის პროგნოზს — $2.98-ს.
მომავლის პროგნოზები
StreetInsider-ის თანახმად, Bank of America-ს ანალიტიკოსი — რობერტ ოჰმესი აღფრთოვანებული დარჩა კვარტალური შედეგებით და Dick’s-ის აქციების ნეიტრალური რეიტინგი ყიდვის რეკომენდაციით შეცვალა. ასევე სასიამოვნოდ გაკვირვებული ჩანდა მენეჯმენტი — კომპანიის წარმომადგენლებმა მთელი წლისთვის comps-ის საპროგნოზო დიაპაზონი 1%-2%-დან 2%-3%-მდე გაზარდეს.
გარდა ამისა, Dick’s-ში ახლა მოელიან, რომ მიმდინარე წელს EPS $13.35-$13.75-ს მიაღწევს, რაც ასევე აღემატება ძველ დიაპაზონს, რომლის ზედა ზღვარიც $13.25-ს შეადგენდა.
როგორ აფასებენ ანალიტიკოსები Dick’s-ის აქციებს?
Dick’s Sporting Goods-ის აქციების ამჟამინდელი ფასი დაახლოებით $226.00-ს შეადგენს. კომპანიას ამ ეტაპზე უოლ სტრიტის 23 ანალიტიკოსი აფასებს. საშუალო სამიზნე ფასი $232.99-ს შეადგენს, მაქსიმალური პროგნოზი — $280.00-ს, ხოლო მინიმალური — $197.00-ს. საშუალო სამიზნე ფასი Dick’s Sporting Goods-ის აქციების ამჟამინდელი ფასიდან დაახლოებით 3%-იან ზრდას გულისხმობს. კომპანიის აქციებს 23 ანალიტიკოსიდან 13-მა მიანიჭა ყიდვის რეკომენდაცია, 9-მ — ნეიტრალური რეიტინგი, ხოლო 1-მა — გაყიდვის რეკომენდაცია.
Dick’s Sporting Goods-ის აქციების შეძენა საქართველოს ბანკის მობილბანკში შეგიძლიათ ბმულზე.
[1] Comps — ფინანსური მეტრიკა, რომელსაც საცალო ინდუსტრიის კომპანიები იყენებს, რათა შეაფასოს გაყიდვების მთლიანი მოცულობა კომპანიის ლოკაციებზე, რომლებიც ერთი წლის ან მეტი ხნის განმავლობაში ფუნქციონირებს.
