გუშინ, pre-market ვაჭრობაში1 Intel-ის აქციების ფასი 1%-ზე მეტით გაუმჯობესდა. ზრდას მას შემდეგ დაფიქსირდა, რაც თეთრი სახლის წარმომადგენლებმა განაცხადეს, რომ, CHIPS Act-ის ფარგლებში, ჩიპების მწარმოებელი $8.5-მილიარდიან გრანტს მიიღებს, რათა კომპანიამ აშშ-ში წარმოება გააფართოოს.
Intel-ს დამატებით ასევე შეუძლია მიიღოს $11 მილიარდის მოცულობის სესხი CHIPS and Science Act-ის ფარგლებში. ეს აქტი მიღებულ იქნა 2022 წელს, ჩინეთთან მზარდი გეოპოლიტიკური დაძაბულობის ფონზე და მიზნად ისახავს წარმოების გაზრდას აშშ-ის ისეთ ძირითად ინდუსტრიაში, როგორიც არის, მაგალითად, ჩიპების წარმოება.
„ეს გადაწყვეტილება ხელს შეუწყობს Intel-ის ქარხნების მშენებლობას და გაფართოებას არიზონაში, ოჰაიოში, ნიუ-მექსიკოსა და ორეგონში, ამასთან შექმნის დაახლოებით 30,000 სამუშაო ადგილს“ — ნათქვამია თეთრი სახლის განცხადებაში.
კომერციის დეპარტამენტის განცხადებით კი, Intel-ის მენეჯმენტი მოელის, რომ კომპანიის ინვესტიციები $100 მილიარდს გადააჭარბებს იმის ფონზე, რომ Intel ამ ოთხს შტატში შესაძლებლობებს აფართოებს. კომერციის დეპარტამენტის წარმომადგენლებმა განაცხადეს, რომ Intel შექმნის 10,000-ზე მეტ სამუშაო ადგილს წარმოების სფეროში და თითქმის 20,000 სამუშაო ადგილს მშენებლობაში.
Intel-მა, შემოსავლის თვალსაზრისით აშშ-ს ჩიპების უმსხვილესმა მწარმოებელმა, დღემდე CHIPS Act-დან ყველაზე დიდი გრანტის მიღება შეძლო.
Chipmaker GlobalFoundries-ის წარმომადგენლებმა გასულ თვეში განაცხადეს, რომ კომპანიამ, CHIPS Act-ის ფარგლებში, ნიუ-იორკში ახალი ობიექტის ასაშენებლად და ვერმონტში ოპერაციების გასაფართოებლად, $1.5 მილიარდის მოცულობის გრანტი მოიპოვა. Microchip Technology-ს კი, ნახევარგამტარების და მიკროკონტროლერების წარმოების გასაძლიერებლად, ამ წლის დასაწყისში $162 მილიონი გადაეცა.
თავდაცვის კონტრაქტორი — BAE Systems იყო პირველი კომპანია, რომელმაც CHIPS Act-ის გრანტი მიიღო (გასული წლის დეკემბერში). კომპანიას, ნიუ ჰემფშირის დაძველებული ქარხნის მოდერნიზებისთვის, $35 მილიონი გადაეცა. ეს თანხა BAE Systems-ს საშუალებას მისცემს, ჩიპების წარმოების შესაძლებლობები გააოთხმაგოს.
ანალიტიკოსების შეფასებები
Intel-ის აქციების ამჟამინდელი ფასი დაახლოებით $42.00-ს შეადგენს. კომპანიას ამ ეტაპზე 36 ანალიტიკოსი აფასებს. საშუალო სამიზნე ფასი $47.05-ს შეადგენს, მაქსიმალური პროგნოზი — $68.00-ს, ხოლო მინიმალური — $17.00-ს. საშუალო სამიზნე ფასი Intel-ის აქციების ამჟამინდელი ფასიდან დაახლოებით 11.5%-იან ზრდას გულისხმობს. კომპანიის აქციებს 36 ანალიტიკოსიდან 8-მ მიანიჭა ყიდვის რეკომენდაცია, 24-მა — ნეიტრალური რეიტინგი, ხოლო 4-მა — გაყიდვის რეკომენდაცია.
Intel-ის აქციების შეძენა საქართველოს ბანკის მობილბანკში შეგიძლიათ ბმულზე.
[1] pre-market ვაჭრობა არის სავაჭრო აქტივობის პერიოდი, რომელიც რეგულარულ საბაზრო სესიამდე მიმდინარეობს.
