იცოდით, რომ ბოლო 10 წლის განმავლობაში ინვესტირებისთვის Nasdaq ბევრად უკეთესი ადგილი იყო, ვიდრე S&P 500? 300%-ზე მეტი ზრდით მან აჯობა უფრო ფართო ინდექსს, რომელიც ამ დროის განმავლობაში 200%-ზე ნაკლებით გაიზარდა.
Nasdaq მსოფლიოში საუკეთესო მზარდი პოტენციალის აქციებს აერთიანებს. შეფასებების ვარდნამ, შესაძლოა, ფანტასტიკური ყიდვის შესაძლებლობა შექმნას ინვესტორებისთვის, რომლებსაც სურთ, რომ იყიდონ და დიდი ხნის მანძილზე შეინარჩუნონ აქციები. ამ სტატიაში ვისაუბრებთ 2 საუკეთესო აქციაზე, რომლის შეძენაც დღეს Nasdaq-ზე შეგიძლიათ.
- Align Technology
Align Technology – კომპანია, რომელიც პოპულარული კბილების გამჭვირვალე „მომწყობის” უკან დგას, წლების განმავლობაში უზარმაზარ ზრდას განიცდიდა. მიუხედავად იმისა, რომ პანდემიის გამო გარკვეული რყევები იყო, ბოლო ხუთი წლის განმავლობაში კომპანიის საშუალო ზრდის ტემპმა 33%-ს გადააჭარბა.
Align Technology-ის ზრდის ტემპი გვიან შეჩერდა მთელ მსოფლიოში რთული ეკონომიკური სიტუაციის გამო. ჩინეთში კოვიდ-19-ით გამოწვეულმა ლოკდაუნმა კომპანიის ბიზნესზე ასევე უარყოფითად იმოქმედა. შესაძლოა, კომპანიას ჯერ კიდევ რთული გზა ელოდეს წინ, რადგან მისი პროდუქტის ფასი, შეიძლება, $2,000 ან მეტი იყოს. მიუხედავად იმისა, რომ პაციენტებს საფასურის რამდენიმე წლის განმავლობაში გადახდის შესაძლებლობა აქვთ, მაღალმა ფასმა, შესაძლოა, უახლოეს პერსპექტივაში პროდუქტზე მოთხოვნა შეზღუდოს.
გაყიდვების ზრდის შენელებისა და ბიზნესის წინაშე მყოფი გამოწვევების შედეგად, აქციების ფასი წელს 62%-ით შემცირდა, ხოლო Nasdaq უფრო მოკრძალებული – 26%-ით არის შემცირებული. თუმცა, კომპანიამ, თავისი ბიზნესისადმი ნდობის გამოვლენით, გადაწყვიტა, რომ ეს ვარდნა შესანიშნავი დროა აქციების გამოსასყიდად. მაისში Align-მა დააანონსა აქციების შესყიდვის დაჩქარებული ხელშეკრულება, რომლის მიხედვითაც კომპანია ივლისის ბოლომდე $200 მილიონის ღირებულების ჩვეულებრივ აქციებს გამოისყიდის. აღმასრულებელი დირექტორი – ჯო ჰოგანი, ასევე, $2 მილიონის ღირებულების აქციების შეძენას გეგმავს.
Grand View Research-ის ანალიტიკოსები ამ სექტორისგან უზარმაზარ ზრდას ელიან. ისინი იმედოვნებენ, რომ გლობალური ბაზარი 2030 წლამდე 29.5%-იანი წლიური ზრდის ტემპით გაფართოვდება. როგორც ინდუსტრიის ლიდერი, Align, შესაძლოა, შესანიშნავი ყიდვის შესაძლებლობა იყოს.
- Netflix
სტრიმინგ გიგანტმა – Netflix-მა, წელს ასევე დიდი ვარდნა განიცადა. კომპანიის 70%-მდე დანაკარგებმა აქციის ფასი 2017 წლის დონემდე დააბრუნა. შარშან, ინვესტორების უმეტესობა დიდი სიამოვნებით შეიძენდა Netflix-ის აქციებს 2017 წლის ფასად. ახლა კი კომპანიის მდგომარეობა, გამომწერების რაოდენობის შემცირების გამო, მოულოდნელად გაუარესდა. Netflix-მა ამ წელს, ხარჯების შემცირების მიზნით, ასობით თანამშრომელი გაათავისუფლა, რადგან კომპანიის შემოსავლების ზრდა შენელდა.
თუმცა, შეიძლება, ეს გრძელვადიან პერსპექტივაზე ორიენტირებული ინვესტორებისთვის სასარგებლო იყოს. ძალიან დიდი ხნის განმავლობაში, ნეტფლიქსმა პაროლების გაზიარების შესახებ იცოდა (მომხმარებლები ერთმანეთს ნეტფლიქსის ანგარიშის პაროლებს უზიარებენ, შესაბამისად კომპანიას ბევრი „უფასო“ მომხმარებელი ჰყავს) და დაგროვდა იმაზე მეტი კონტენტი, ვიდრე, სავარაუდოდ, საჭირო იყო. ამ ორი პრობლემის მოგვარება, შესაძლოა, კომპანიას შემოსავლის მნიშვნელოვნად ზრდაში დაეხმაროს.
ხარჯების დაზოგვაზე მეტად ფოკუსირებით, ბიზნესმა, შესაძლოა, გრძელვადიან პერსპექტივაში ბევრად უკეთესი წარმადობა აჩვენოს. როდესაც ბიზნეს სწრაფად ვითარდება და გაყიდვები იზრდება, ყველაფერი მშვენივრადაა და ხარჯებზე არავინ ფიქრობს, რადგან კომპანია მოლოდინებს აჭარბებს. თუმცა, როგორც კი ეს ზრდა შენელდება, მოულოდნელად მაღალი ხარჯები შეშფოთებას იწვევს.
თუმცა, Netflix-ის ბიზნესი არავითარ შემთხვევაში არ არის განადგურებული. კომპანიის აქციების მასიური გაყიდვები ექსტრემალური იყო და თუ ბიზნესი არასაჭირო ხარჯების შემცირებას შეძლებს, შესაძლოა, Netflix კარგი გრძელვადიანი ინვესტიცია იყოს. ეს ჯერ კიდევ შესანიშნავი კომპანიაა, რომელმაც ბოლო 12 თვის განმავლობაში $30 მილიარდის ტოლი შემოსავალი და $5 მილიარდზე მეტი მოგება დააფიქსირა. შესაბამისად, მოგების მარჟამ შთამბეჭდავი 16% შეადგინა.
შესაძლოა, ნეტფლიქსი დღეს ერთ-ერთი საუკეთესო გარიგება იყოს – მისი P/E (ფასი/მოგება) კოეფიციენტი ამჟამად დაახლოებით 17-ს შეადგენს.
