გასულ კვირას აქციების ფასები შემცირდა, რის შედეგადაც 2022 წელს Dow Jones Indistrial Average და S&P 500 დაახლოებით 5%-ით არის შემცირებული.
კვარტალური ანგარიშების სეზონი გრძელდება და ამ სტატიაში განვიხილავთ სამ კომპანიას, რომელიც მოგების ანგარიშებს ამ კვირაში წარადგენს: CarMax, Bed Bath & Beyond და Delta Air lines.
- CarMax
მეორეული მანქანების ფასები ისტორიულად მაღალ ნიშნულზეა, მაგრამ ინვესტორები მაინც ღელავენ CarMax-ის მიერ ოთხშაბათს (13 აპრილი) წარსადგენი კვარტალური ანგარიშის შესახებ. ავტომობილების საცალო ვაჭრობის ბიზნესმა ეს პერიოდი ძლიერი იმპულსით დაიწყო, რადგან გაყიდვებმა, მესამე კვარტალში, ნოემბრის ბოლოს, რეკორდი ადვილად დაამყარა.
თუმცა, CarMax მთელი ძალებით ცდილობდა მარაგების შევსებას და მიწოდების ზეწოლამ, შესაძლოა, 2022 წლის დასაწყისში ზრდა შეზღუდოს. თუმცა ინვესტორების უმეტესობა, რომლებიც ამ კომპანიას თვალყურს ადევნებს, მოელის, რომ გაყიდვები $7.6 მილიარდს მიაღწევს, რაც წლიდან წლამდე თითქმის 50%-იანი ზრდაა.
CarMax-ის აღმასრულებელი დირექტორი – ბილ ნეში და მისი გუნდი, სავარაუდოდ, მიწოდების მთავარი პრობლემის გარდა რამდენიმე გამოწვევას განიხილავენ. შრომის დეფიციტმა და დეკემბრის ბოლოს კოვიდ-19-ის შემთხვევების ტალღამ, შესაძლოა, გაყიდვების მოცულობაზე უარყოფითად იმოქმედოს. CarMax-ის მოგებაც არ გაიზრდება, რადგან კომპანია, ბაზრის წილის გასაზრდელად, დაბალი ფასების შენარჩუნებას ცდილობს.
- Bed Bath & Beyond
Bed Bath & Beyond-ის აქციები, მიმი აქციის სტატუსის გამო, უკიდურესად არასტაბილური იყო. ამ ოთხშაბათს, კომპანიის აქციების ფასის რყევები პირდაპირ იქნება დაკავშირებული მის ოპერაციულ შესრულებასთან.
Bed Bath & Beyond, სავარაუდოდ, ამ კუთხით ინვესტორებს არ გააოცებს. მაღაზიის გაყიდვების გასულ კვარტალში, წინა წლის ანალოგიურ კვარტალთან შედარებით, 7%-ით დაეცა და პანდემიამდელ დონეზე დაბლაც კი შემცირდა. კომპანიამ დაადანაშაულა მიწოდების ჯაჭვის გამოწვევები და ინფლაცია. მოსალოდნელია, რომ გაყიდვები დაახლოებით 20%-ით – $2.1 მილიარდამდე შემცირდება.
ზრდის შესაძლებლობა ემყარება მენეჯმენტის უნარს, შეაჩეროს მომხმარებელთა ტრაფიკის შემცირება და იმავდროულად წარმატებას მიაღწიოს ონლაინ პლატფორმაზე. ინვესტორი ასევე იმედოვნებენ, რომ კომპანიას შეუძლია მიიღოს დამატებითი მოგება პოპულარული ბრენდის – buybuyBaby-ის გაყიდვებით. ჩვენ, ალბათ, ამ ოთხშაბათს გავიგებთ, თუ როგორ ვითარდება ეს სტრატეგიები.
- Delta Air Lines
ინვესტორებს, Delta Air Lines-ის ოთხშაბათის (13 აპრილი) კვარტალურ ანგარიშთან დაკავშირებით, დიდი მოლოდინები აქვთ. კომპანიამ, სავარაუდოდ, თავისი შემოსავალი გააორმაგა წინა წელთან შედარებით, როდესაც პანდემია ნეგატიურად მოქმედებდა ტურისტულ ინდუსტრიაზე. ნავთობის ფასის ზრდის მიუხედავად, კომპანიის განახლებული პერსპექტივის მიხედვით, ფულადი სახსრების მოძრაობა და მოგება ძლიერად უნდა გამოიყურებოდეს.
აღმასრულებელმა დირექტორმა – ედ ბასტიანმა და მისმა გუნდმა, იანვარში ივარაუდეს, რომ გაზაფხულსა და ზაფხულში ძლიერი სამოგზაურო სეზონი იქნება, სამომხმარებლო და საქმიანი მოგზაურობის მნიშვნელოვანი მოთხოვნით.
თუ Delta-ს წარმომადგენლები დღეს ამ სცენარის განვითარების პერსპექტივას ხედავენ, მოკლევადიანი მოგების სურათი ნათელი იქნება. ამ კომპანიის აქციების მფლობელი ინვესტორების შემოსავალი კი, გრძელვადიან პერსპექტივაში, ამის შესაბამისად გაიზრდება.
