გუშინ, პოზიტიური სიახლის შემდეგ, ელექტრომობილების (EV) მწარმოებელი ამერიკული კომპანიის — Tesla-ს აქციების ფასმა 10%-ზე მეტით მოიმატა და იანვრის შემდეგ უმაღლეს ნიშნულს მიაღწია. წლის დასაწყისიდან ეს მაჩვენებელი დაახლოებით 7%-ით არის შემცირებული.
Tesla-მ გუშინ გამოაქვეყნა მეორე კვარტლის წარმოებისა და მიწოდების მაჩვენებლები, რომლებმაც ანალიტიკოსების მოლოდინებს გადააჭარბა.
მეორე კვარტლის შედეგები
მიმდინარე წლის მეორე კვარტალში ელექტრომობილების მწარმოებელმა გიგანტმა 410,831 მანქანა აწარმოა, ხოლო ბაზარს 443,956 მიაწოდა. მიუხედავად იმისა, რომ 2023 წლის მეორე კვარტალთან შედარებით, მიწოდების მაჩვენებელი 5%-ით შემცირდა, მან გადააჭარბა უოლ სტრიტის ანალიტიკოსების პროგნოზს, რომელიც დაახლოებით 439,000-ს შეადგენდა.
გუშინ იყო ზედიზედ მეორე დღე, როდესაც Tesla S&P 500 ინდექსში საუკეთესო წარმადობით გამოირჩეოდა. ბოლო ორი სავაჭრო სესიის განმავლობაში კომპანიის აქციების ფასი დაახლოებით 17%-ით გაუმჯობესდა.
კვარტალური ანგარიში და რობოტაქსის ღონისძიება ახლოვდება
2024 წლის რთული პირველი ნახევრის შემდეგ, გასულ კვირაში Tesla-ს აქციებმა აღდგენა დაიწყო მას შემდეგ, რაც კომპანიის კვარტალური მაჩვენებლების მიმართ ოპტიმიზმი გაჩნდა. ელექტრომობილების მწარმოებლის აქციების ფასი ორშაბათს კვლავ გაიზარდა მისი რამდენიმე ჩინური კონკურენტის მიწოდების დადებითი მაჩვენებლების ფონზე.
Wedbush-ის ანალიტიკოსებმა Tesla-ს მიწოდების ანგარიში გამოქვეყნებისთანავე განაცხადეს, რომ, მათი აზრით, EV კომპანიისთვის ყველაზე ცუდი უკვე უკანა ხედვის სარკეშია.
მათ ასევე ხაზი გაუსვეს იმ ფაქტს, რომ Tesla-ს მომავალ თვეში დაგეგმილი აქვს რობოტაქსის ღონისძიება, სადაც მისი სრულად ავტონომიური ტაქსის დებიუტი შედგება. კომპანია ამ პროდუქტით კონკურენციას გაუწევს ინდუსტრიის სხვა მოთამაშეებს, როგორიც არის, მაგალითად, Alphabet-ის Waymo.
Wedbush-ის ანალიტიკოსებმა განაცხადეს: „ჩვენ კვლავ გვჯერა, რომ Tesla უფრო მეტად არის ხელოვნური ინტელექტისა და რობოტექნიკის კომპანია, ვიდრე ტრადიციული ავტომობილების ფირმა. ახლა კი უოლ სტრიტი მოუთმენლად მოელის 8 აგვისტოს, როგორც საკვანძო დღეს Tesla-ს ისტორიისთვის“.
გუშინ Tesla-ს წარმომადგენლებმა ასევე განაცხადეს, რომ კომპანია ფისკალური 2024 წლის მეორე კვარტლის ფინანსურ შედეგებს 23 ივლისს, სავაჭრო დღის დასრულების შემდეგ გამოაქვეყნებს.
როგორ აფასებენ ანალიტიკოსები Tesla-ს აქციებს?
Tesla-ს აქციების ამჟამინდელი ფასი დაახლოებით $231.00-ს შეადგენს. ამ ეტაპზე კომპანიას უოლ სტრიტის 34 ანალიტიკოსი აფასებს. საშუალო სამიზნე ფასი $182.82-ს შეადგენს, მაქსიმალური პროგნოზი — $310.00-ს, ხოლო მინიმალური — $22.86-ს. საშუალო სამიზნე ფასი Tesla-ს აქციების ამჟამინდელი ფასიდან დაახლოებით 21%-იან კლებას გულისხმობს. კომპანიის აქციებს ამ 34 ანალიტიკოსიდან 12-მა მიანიჭა ყიდვის რეკომენდაცია, 14-მა — ნეიტრალური რეიტინგი, ხოლო 8-მ — გაყიდვის რეკომენდაცია.
Tesla-ს აქციების შეძენა საქართველოს ბანკის მობილბანკში შეგიძლიათ ბმულზე.
