რა მოხდა?
გუშინ Electronic Arts-ის აქციების ფასი 9%-ზე მეტით შემცირდა მას შემდეგ, რაც ვიდეო თამაშების კომპანიამ მოსალოდნელზე სუსტი კვარტალური შედეგები წარადგინა.
და რა?
ფისკალურ მესამე კვარტალში, რომელიც 31 დეკემბერს დასრულდა, EA-ს შემოსავალი წლიდან წლამდე 5%-ით — თითქმის $1.9 მილიარდამდე გაიზარდა. ზრდა ნაწილობრივ გამოწვეული იყო მისი პოპულარული თამაშის — FIFA 23-ის ძლიერი გაყიდვებით, რომელიც ბესტსელერის ტიტულის მოპოვების გზაზეა.
აღსანიშნავია, რომ დეკემბრის ბოლოს Electronic Arts-ის მოთამაშეთა ქსელმა 650 მილიონს გადააჭარბა.
მიუხედავად ამისა, EA-ს შეკვეთებმა (გაყიდვების ძირითადი მეტრიკა ვიდეო თამაშების გამომცემლებისთვის) ინვესტორების მოლოდინები ვერ გაამართლა. კომპანიის წმინდა შეკვეთებმა $2.3 მილიარდი შეადგინა, უოლ სტრიტის ანალიტიკოსების პროგნოზი კი $2.5 მილიარდი იყო.
ახლა რა?
ინვესტორებს არც EA-ს მომავლის პერსპექტივები მოეწონათ. ფისკალურ მეოთხე კვარტალში მენეჯმენტი $1.7-$1.8 მილიარდის ოდენობით შემოსავალს მოელის, რაც ანალიტიკოსების პროგნოზს — $2.1 მილიარდს ჩამორჩება. კომპანიის ასეთი მოლოდინი გამოწვეულია EA-ს გადაწყვეტილებით, Star Wars Jedi: Survivor-ის გამოშვება 6 კვირით, 28 აპრილამდე გადადოს.
ამასთან, Electronic Arts-ის მენეჯმენტმა განაცხადა, რომ კომპანია ხურავს Apex Legends-ის მობილურ ვერსიას და წყვეტს მობილური თამაშის განვითარებას მისი პოპულარული Battlefield-ის ფრანშიზისთვის.
„რამდენადაც კვარტლის განმავლობაში ბაზრის გაურკვევლობა გაიზარდა, ჩვენ მივიღეთ ზომები ძირითადი მომგებიანობის დასაცავად“ — განაცხადა ფინანსურმა დირექტორმა, კრის სუჰმა. „ჩვენ პრიორიტეტს ვანიჭებთ მოთამაშეთა გამოცდილებას, მივმართავთ ინვესტიციებს იქითკენ, სადაც მათ შეუძლია ყველაზე დადებითი გავლენა იქონიოს ჩვენს მოთამაშეებზე და კომპანიის ზრდაზე.“
