რა მოხდა?
Zoom Video Communications-ის აქციების ფასი 7.4%-ით სამშაბათს მას შემდეგ შემცირდა, რაც ქლაუდ კომუნიკაციების ლიდერმა კომპანიამ ზრდის ტემპების შენელებასთან დაკავშირებით განცხადება გააკეთა.
და რა?
2022 წლის მეოთხე კვარტალში, რომელიც 31 იანვარს დასრულდა, Zoom-ის შემოსავალი წლიდან წლამდე 21%-ით, $1.1 მილიარდამდე გაიზარდა. ეს იყო მნიშვნელოვანი შენელება მესამე კვარტალში კომპანიის 35%-იანი ზრდისა და მეორე კვარტალში გაყიდვების 54%-იანი ზრდის შემდეგ.
მეოთხე კვარტალში, მომხმარებელი კომპანიების რაოდენობა, რომელსაც 10-ზე მეტი თანამშრომელი ჰყავს, ვიდეოკონფერენციის პლატფორმაზე გასული წლის იმავე პერიოდთან შედარებით 9%-ით – 509 800-მდე გაიზარდა. თუმცა, თუ მესამე კვარტლის ბოლოს დაფიქსირებულ მაჩვენებელს გადავხედავთ ვნახავთ, რომ მომხმარებელთა რაოდენობა ამ პერიოდში 512 100 იყო.
შესაძლოა, მცირე ბიზნესის მომხმარებელთა ზრდის შემცირების გამო, Zoom-მა, მომავალ წელს, უფრო მეტი ყურადღება კორპორატიული ანგარიშების გაზრდაზე გაამახვილოს. ვიდეო კავშირის პროგრამული უზრუნველყოფის მომწოდებელი ორ ახალ მაჩვენებელს შემოგვთავაზებს: მისი პლატფორმის კორპორატიული მომხარებლების რაოდენობას და მათი წმინდა ზრდის მაჩვენებელს დოლარებში.
Zoom-მა 2022 ფისკალური წელი დაახლოებით 191 000 კორპორატიული კლიენტით დაასრულა, რაც წელიწადში 35%-იანი ზრდას ნიშნავს. ამ მომხმარებლების 12-თვიანი წმინდა დოლარის გაფართოების მაჩვენებელი 130% იყო, რაც იმას ნიშნავს, რომ მათ Zoom-ის სერვისებზე წინა წელთან შედარებით 30%-ით მეტი დახარჯეს.
მთლიანობაში, Zoom-ის წმინდა კორექტირებული მოგება 8%-ით – $393.6 მილიონამდე გაიზარდა, რაც თითო აქციაზე $1.29-ის მოგებას გულისხმობს. ანალიტიკოსების მოლოდინი კი თითო აქციაზე $1.06-ის მოგება იყო.
ახლა რა?
აქედან გამომდინარე, რომ ბევრი ადამიანი ტრადიციულ სამუშაო ადგილს უბრუნდება, Zoom მომავალ წელს ზრდის ტემპების შენელებას მოელის. კომპანიის მენეჯმენტი ვარაუდობს, რომ 2023 ფისკალურ წელს შემოსავალი 11%-ზე ნაკლებით – დაახლოებით $4.54 მილიარდამდე გაიზრდება.
გარდა ამისა, Zoom-ის შემდგომ განვითარებაზე ორიენტირებული ინვესტიციები, მოგებას შეამცირებს. კომპანია ვარაუდობს, რომ კორექტირებული წმინდა მოგება თითო აქციაზე დაახლოებით 30%-ით – $3.48-მდე შემცირდება. მიუხედავად ამისა, აღმასრულებელი დირექტორი – ერიკ იუანი თვლის, რომ ეს ინვესტიციები, მზარდი კონკურენტუნარიანი ქლაუდ კომუნიკაციების ინდუსტრიაში Zoom-ის პოზიციას გააძლიერებს.
