S&P Global Market Intelligence-ის მონაცემებით, გასული კვირის განმავლობაში ელექტრომობილების (EV) მწარმოებლის — Tesla-ს აქციების ფასი დაახლოებით 13.5%-ით შემცირდა. კომპანია აწყდება გაძლიერებულ საფასო კონკურენციას ჩინური ფირმების მხრიდან და სუსტ გაყიდვებს აღმოსავლეთ აზიის მნიშვნელოვან ბაზარზე. Tesla-ს ასევე მოუწია ხანძართან გამკლავება, რომელმაც დროებით შეაჩერა წარმოება კომპანიის გერმანულ ქარხანაში.
2023 წლის განმავლობაში ელექტრომობილების მწარმოებლის აქციების ფასი დაახლოებით 102%-ით გაუმჯობესდა.
გლობალური საფასო კონკურენცია და ხანძარი ბერლინის ქარხანაში
გასულ კვირაში Tesla-ს აქციებზე ნეგატიური სიახლეები ზემოქმედებდა. კომპანიის მენეჯმენტმა განაცხადა, რომ Tesla-მ თებერვალში ბაზარს ჩინეთის ქარხნიდან დაახლოებით 60,000 ავტომობილი მიაწოდა. 2022 წლის დეკემბრის შემდეგ ეს ყველაზე დაბალი მაჩვენებელია. ჩინეთი Tesla-სთვის უზარმაზარი ბაზარი იყო, მაგრამ ამჟამად ქვეყანა ეკონომიკურად რთულ მდგომარეობაშია. სწორედ ამიტომ, Tesla იძულებული გახდა, იქ მოთხოვნის გასაძლიერებლად ფასები შეემცირებინა.
ელექტრომობილების ჩინურმა მწარმოებელმა — BYD-მა კი, Tesla-სთან კონკურენციის მიზნით, იგივე გადაწყვეტილება მიიღო და თავის ავტომობილებზე ფასები შეამცირა. კომპანია ამჟამად საკმაოდ კარგად მუშაობს თავისი დაბალფასიანი მანქანებით და ცოტა ხნის წინ მან გაყიდვებში Tesla-ს აჯობა. ახლა BYD-ის მენეჯმენტი გეგმავს გაყიდვების გაფართოებას ჩინეთის ფარგლებს გარეთ და მიზნად ისახავს ევროპასა და ავსტრალიაში შესვლას, სადაც Tesla-ც მუშაობს. სავარაუდოდ, კონკურენციის გაზრდის პერსპექტივა Tesla-ს ზოგიერთ ინვესტორს აშინებს.
გარდა ამისა, კომპანიის ბერლინთან ახლოს მდებარე ქარხანაში მუშაობა დროებით შეჩერდა ელექტროენერგიის გათიშვის გამო, რაც, სავარაუდოდ, ხანძრით იყო გამოწვეული. ჯერჯერობით დაუდგენელმა პირებმა ქარხნის მახლობლად მდებარე ელექტროგადამცემს ცეცხლი წაუკიდეს. გერმანულმა ულტრამემარცხენე ექსტრემისტულმა ორგანიზაციამ, სახელწოდებით Volcano Group, კი აიღო პასუხისმგებლობა მოვლენაზე, რომელსაც ქვეყნის მთავარი პროკურორი იძიებს. Tesla-ს მოუწია ქარხანაში წარმოების შეჩერება, რამაც შეიძლება კვარტლის განმავლობაში კომპანიის წარმადობა შეამციროს და მისი ხარჯები გაზარდოს.
ანალიტიკოსების შეფასებები
Tesla-ს აქციების ამჟამინდელი ფასი დაახლოებით $175.00-ს შეადგენს. ამ ეტაპზე კომპანიას უოლ სტრიტის 35 ანალიტიკოსი აფასებს. საშუალო სამიზნე ფასი $210.78-ს შეადგენს, მაქსიმალური პროგნოზი — $320.00-ს, ხოლო მინიმალური — $23.53-ს. საშუალო სამიზნე ფასი Tesla-ს აქციების ამჟამინდელი ფასიდან დაახლოებით 20%-იან ზრდას გულისხმობს. კომპანიის აქციებს ამ 35 ანალიტიკოსიდან 11-მა მიანიჭა ყიდვის რეკომენდაცია, 19-მა — ნეიტრალური რეიტინგი, ხოლო 5-მა — გაყიდვის რეკომენდაცია.
Tesla-ს აქციების შეძენა საქართველოს ბანკის მობილბანკში შეგიძლიათ ბმულზე.
