რა მოხდა?
პარასკევს Carvana-ს აქციების ფასი 24%-ზე მეტით გაიზარდა მიუხედავად იმისა, რომ მეორადი მანქანების ონლაინ დილერის კვარტალური შემოსავალი მნიშვნელოვნად შემცირდა. გასულ წელს Carvana-ს აქციები გაკოტრების შიშმა გაანადგურა, მაგრამ პირველი კვარტლის ანგარიშმა აჩვენა, რომ მენეჯმენტი ბიზნესის სტაბილიზაციისკენ მნიშვნელოვან პროგრესს აღწევს.
და რა?
Carvana-ს კვარტალური შემოსავალმა წლიდან წლამდე 25%-ით — $2.61 მილიარდამდე დაიკლო, მაგრამ ეს გამოწვეული იყო იმით, რომ კომპანიამ, ხარჯების შემცირების მიზნით, მარაგები შეამცირა. ეს შედეგი არსებითად დაემთხვა ანალიტიკოსების პროგნოზს — $2.6 მილიარდს.
მიუხედავად იმისა, რომ შემოსავალი მკვეთრად შემცირდა, კომპანიამ მაინც მოახერხა მთლიანი მოგების გაზრდა, ეს მაჩვენებელი წლიდან წლამდე 14%-ით — $341 მილიონამდე გაიზარდა.
მთლიანმა მოგებამ ერთეულზე (GPU) 52%-ით — $4,303-მდე მოიმატა, რაც პროგრესის კიდევ ერთი ნიშანია. კორექტირებულმა EBITDA-მ (მოგება ვალის მომსახურების ხარჯების, გადასახადების, ცვეთისა და ამორტიზაციის გამოკლებამდე) $24 მილიონი შეადგინა (გასული წლის იმავე კვარტალში $348 მილიონის ოდენობის ზარალი).
რაც შეეხება თავისუფალ ფულად ნაკადებს, Carvana-მ ამ მხრივ $98 მილიონი დაკარგა, რაც 2022 წლის პირველ კვარტალში დაფიქსირებულ $813 მილიონის ტოლ ზარალთან შედარებით მნიშვნელოვანი გაუმჯობესებაა. GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით გამოთვლილმა ზარალმა თითო აქციაზე $1.51 შეადგინა, რაც ანალიტიკოსების პროგნოზზე — $-2.00-ზე უკეთესი შედეგია.
აქციონერებისთვის განკუთვნილ წერილში მენეჯმენტმა განაცხადა, რომ პირველმა კვარტალმა გამოაჩინა გზა, რომლითაც Carvana მომგებიანობის გასაზრდელად და ზრდისკენ დასაბრუნებლად მიემართება.
ახლა რა?
გარდა ამისა, მენეჯმენტის პროგნოზით, მეორე კვარტალში კომპანია დადებით კორექტირებულ EBITDA-ს დააფიქსირებს და პოზიტიური თავისუფალი ფულადი ნაკადების წარმოებისთვის მუშაობას განაგრძობს.
