გუშინ საფონდო ბირჟაზე გავრცელდა მნიშვნელოვანი სიახლეები, რომლებმაც ცნობილი კომპანიების აქციების ფასებზე მნიშვნელოვანი გავლენა იქონია. დღეს სწორედ მათ მიმოვიხილავთ და შემოგთავაზებთ საინტერესო დეტალებს ისეთი კომპანიების შესახებ, როგორებიც არის McCormick, Walgreens Boots Alliance, AeroVironment, Salesforce და Chipotle Mexican Grill.
McCormick
გუშინ, ბაზრის გახსნამდე, McCormick-მა მოსალოდნელზე ძლიერი კვარტალური შედეგები გამოაქვეყნა. სავაჭრო დღის განმავლობაში კი არომატიზატორებისა და სანელებლების კომპანიის აქციების ფასი 4%-ზე მეტით გაიზარდა. წლის დასაწყისიდან ეს მაჩვენებელი დაახლოებით 2%-ით არის გაუმჯობესებული.
კვარტალური შედეგები
ფისკალური 2024 წლის მეორე კვარტალში McCormick-ის შემოსავალი წლიურად 1%-ით — $1.64 მილიარდამდე შემცირდა, თუმცა ამ მაჩვენებელმა გადააჭარბა ანალიტიკოსების პროგნოზს — $1.63 მილიარდს. მოგებამ თითო აქციაზე (EPS) კი $0.69 შეადგინა, რაც ასევე აღემატება უოლ სტრიტის მოლოდინს — $0.59-ს.
McCormick განაგრძობს მდგომარეობის გამოსწორებას
მაღალი ინფლაციის ორწლიანი მონაკვეთის შემდეგ, როგორც ჩანს, კომპანიის მარჟები უმჯობესდება.
პროდუქციის წარმოების ხარჯების ზრდამ განაპირობა ის, რომ კომპანიას თავის საცალო მომხმარებლებთან ხელახალი მოლაპარაკება, ახალი კონტრაქტების დადება და ფასების გაზრდა მოუწია.
აღსანიშნავია, რომ McCormick-ის მთლიანი მოგების მარჟა ზედიზედ მეოთხე კვარტალში გაიზარდა და კომპანია განაგრძობს სამი წლის წინანდელ ნორმალურ მარჟებთან მიახლოებას.
როგორ აფასებენ ანალიტიკოსები McCormick-ის აქციებს?
McCormick-ის აქციების ამჟამინდელი ფასი დაახლოებით $71.00-ს შეადგენს. ამ ეტაპზე კომპანიას უოლ სტრიტის 8 ანალიტიკოსი აფასებს. საშუალო სამიზნე ფასი $76.33-ს შეადგენს, მაქსიმალური პროგნოზი — $92.00-ს, ხოლო მინიმალური — $60.00-ს. საშუალო სამიზნე ფასი McCormick-ის აქციების ამჟამინდელი ფასიდან დაახლოებით 8%-იან ზრდას გულისხმობს. კომპანიის აქციებს ამ 8 ანალიტიკოსიდან 4-მა მიანიჭა ყიდვის რეკომენდაცია, 3-მა — ნეიტრალური რეიტინგი, ხოლო 1-მა — გაყიდვის რეკომენდაცია.
Walgreens Boots Alliance
გუშინ, ბაზრის გახსნამდე, Walgreens Boots Alliance-მა კვარტალური შედეგები გამოაქვეყნა. სავაჭრო დღის განმავლობაში კი სააფთიაქო ქსელის ოპერატორის აქციების ფასი 22%-ზე მეტით — 27-წლიან მინიმუმამდე შემცირდა.
კვარტალური შედეგები
ფისკალური 2024 წლის მესამე კვარტალში Walgreens Boots Alliance-ის შემოსავალი წლიურად 2.6%-ით — $36.4 მილიარდამდე გაიზარდა. ამ მაჩვენებელმა გადააჭარბა ანალიტიკოსების პროგნოზს — $36 მილიარდს. EPS-მა კი $0.63 შეადგინა (უოლ სტრიტის მოლოდინი — $0.71).
რაც შეეხება მომავალს, Walgreens-ის მენეჯმენტმა მთელი წლის EPS-ის პროგნოზი $3.20-$3.35-დან $2.80-$2.95-მდე შეამცირა. წელს ეს უკვე მეორე შემთხვევაა, როდესაც კომპანია მომავლის პროგნოზებს ამცირებს.
მენეჯმენტმა განაცხადა, რომ დახურავს ზოგიერთ წამგებიან ლოკაციას და შეწყვეტს იმ პროდუქტების გაყიდვას, რომლებსაც ის ძალიან დაბალ მარჟიანად მიიჩნევს.
როგორ აფასებენ ანალიტიკოსები Walgreens-ის აქციებს?
Walgreens Boots Alliance-ის აქციების ამჟამინდელი ფასი დაახლოებით $12.00-ს შეადგენს. კომპანიას ამ ეტაპზე უოლ სტრიტის 11 ანალიტიკოსი აფასებს. საშუალო სამიზნე ფასი $21.00-ს შეადგენს, მაქსიმალური პროგნოზი — $35.00-ს, ხოლო მინიმალური — $13.00-ს. საშუალო სამიზნე ფასი Walgreens Boots Alliance-ის აქციების ამჟამინდელი ფასიდან დაახლოებით 72.3%-იან ზრდას გულისხმობს. კომპანიის აქციებს 11 ანალიტიკოსიდან 2-მა მიანიჭა ყიდვის რეკომენდაცია, 7-მა — ნეიტრალური რეიტინგი, ხოლო 2-მა — გაყიდვის რეკომენდაცია.
AeroVironment
ოთხშაბათს, სავაჭრო დღის დასრულების შემდეგ, AeroVironment-მა კვარტალური შედეგები გამოაქვეყნა. გუშინ კი მცირე ზომის სამხედრო დრონების მწარმოებლის აქციების ფასი თითქმის 8%-ით შემცირდა. წლის დასაწყისიდან ეს მაჩვენებელი დაახლოებით 44%-ით არის გაუმჯობესებული.
კვარტალური ანგარიში
ფისკალური 2024 წლის მეოთხე კვარტალში AeroVironment-ის შემოსავალმა $197 მილიონს მიაღწია, რამაც გადააჭარბა ანალიტიკოსების პროგნოზს — $188.56 მილიონს.
კორექტირებულმა მოგებამ თითო აქციაზე კი $0.43 შეადგინა (პროგნოზი — $0.21). თუმცა ბუღალტრული აღრიცხვის საყოველთაოდ მიღებული პრინციპების (GAAP) მიხედვით გამოთვლილი EPS $0.21-ს გაუტოლდა, რაც უოლ სტრიტის მოლოდინს ემთხვევა.
მთლიანი წლის GAAP EPS უკეთესი იყო — $2.18, რაც ბევრად კარგი შედეგია, ვიდრე გასულ წელს დაფიქსირებული ზარალი $7.04-ის ოდენობით. თუმცა წლის განმავლობაში თავისუფალმა ფულადმა ნაკადებმა -$7.7 მილიონი შეადგინა.
მომავლის პროგნოზები
რაც შეეხება მომავალს, AeroVironment-ის მენეჯმენტი მოელის, რომ ფისკალური 2025 წელს შემოსავალი $790-$820 მილიონს მიაღწევს, რაც შეესაბამება უოლ სტრიტის მოლოდინს. თუ ვივარაუდებთ, რომ AeroVironment ამ დიაპაზონის შუა წერტილს მიაღწევს, ეს იქნება 12%-იანი ზრდა, რაც მნიშვნელოვანი შენელებაა ფისკალურ 2024 წელს დაფიქსირებულ 33%-იან აღმასვლასთან შედარებით. კომპანიაში ასევე მოელიან, რომ წლიური კორექტირებული EPS $3.18-$3.49-ს შეადგენს. ამ დიაპაზონის შუა წერტილი — $3.33 ჩამოუვარდება ანალიტიკოსების პროგნოზს — $3.36-ს.
როგორ აფასებენ ანალიტიკოსები AeroVironment-ის აქციებს?
AeroVironment-ის აქციების ამჟამინდელი ფასი დაახლოებით $178.00-ს შეადგენს. კომპანიას ამჟამად უოლ სტრიტის 3 ანალიტიკოსი აფასებს და მის აქციებს ყველა მათგანი ყიდვის რეკომენდაციას ანიჭებს. საშუალო სამიზნე ფასი $228.33-ს შეადგენს, მაქსიმალური პროგნოზი — $255.00-ს, ხოლო მინიმალური — $200.00-ს. საშუალო სამიზნე ფასი AeroVironment-ის აქციების ამჟამინდელი ფასიდან დაახლოებით 28.3%-იან ზრდას გულისხმობს.
Salesforce
გუშინ Salesforce აქციების ფასი 4%-ით გაიზარდა მას შემდეგ, რაც მომხმარებელთან ურთიერთობის მართვის (CRM) პროგრამული უზრუნველყოფის მწარმოებელმა აქციონერთა ყოველწლიური შეხვედრა გამართა და ინვესტორებმა კენჭი უყარეს სხვადასხვა საკითხს.
წლის დასაწყისიდან Salesforce-ის აქციების ფასი დაახლოებით 1%-ით არის შემცირებული.
აღმასრულებელი დირექტორის ანაზღაურების პაკეტი დამტკიცდა და საბჭო ხელახლა აირჩიეს
აქციონერებმა მხარი დაუჭირეს კომპანიის ყველა წინადადებას, მათ შორის დირექტორთა საბჭოს წევრების ხელახლა არჩევას.
მათ ფისკალური 2024 წლისთვის ასევე დაამტკიცეს Salesforce-ის აღმასრულებელი დირექტორის — მარკ ბენიოფის კომპენსაცია $39.65 მილიონის ოდენობით, რაც გასული წლის ანაზღაურებას 32%-ით აღემატება.
Salesforce-ის აქციონერებმა ასევე მხარი დაუჭირეს თანამშრომლების წახალისების შეცვლილ გეგმას, რომელიც გამოშვებისთვის დარეზერვებული აქციების რაოდენობას 36 მილიონით ზრდის.
ბოლო კვარტალური ანგარიში
Salesforce-მა ბოლო კვარტალური შედეგები 29 მაისს გამოაქვეყნა. ფისკალური 2025 წლის პირველ კვარტალში კომპანიის შემოსავალი წლიურად 11%-ით — $9.13 მილიარდამდე გაიზარდა, თუმცა ეს მაჩვენებელი ჩამორჩა ანალიტიკოსების პროგნოზს — $9.15 მილიარდს.
კორექტირებულმა მოგებამ თითო აქციაზე $2.44-ს მიაღწია (ანალიტიკოსების პროგნოზი — $2.37).
ბუღალტრული აღრიცხვის საყოველთაოდ მიღებული პრინციპების (GAAP) მიხედვით გამოთვლის შემთხვევაში კი წმინდა მოგებამ $1.53 მილიარდი შეადგინა, ანუ მოგება თითო განზავებულ აქციაზე $1.56 იყო. ამ მაჩვენებელმა კი გადააჭარბა უოლ სტრიტის მოლოდინს — $1.45-ს. შედარებისთვის, გასული წლის იმავე მეოთხედში EPS-მა $0.20 შეადგინა.
| მაჩვენებელი | ფისკალური 2025 წლის I კვ. | ანალიტიკოსების პროგნოზები | ფისკალური 2024 წლის I კვ. |
| შემოსავალი | $9.13 მილიარდი | $9.15 მილიარდი | $8.25 მილიარდი |
| განზავებული EPS | $1.56 | $1.45 | $0,20 |
| წმინდა მოგება | $1.53 მილიარდი | $1.44 მილიარდი | $199 მილიონი |
რაც შეეხება მომავალს, Salesforce-ის მენეჯმენტი მოელის, რომ მეორე კვარტალში შემოსავალი $9.2-$9.25 მილიარდს მიაღწევს, რაც ჩამოუვარდება უოლ სტრიტის ანალიტიკოსების პროგნოზს — $9.35 მილიარდს.
მთელი წლის შემოსავლისთვის კი კომპანიაში შეინარჩუნეს ძველი პროგნოზი — $37.7-$38 მილიარდი.
Salesforce-ის აღმასრულებელმა დირექტორმა — მარკ ბენიოფმა ხაზი გაუსვა, რომ კომპანიას ხელოვნური ინტელექტის (AI) ეპოქისგან დიდი სარგებლის მიღება შეუძლია. მან თქვა: „ეს ჩვენი მომხმარებლებისთვის არის უზარმაზარი შესაძლებლობის დასაწყისი, ხელოვნური ინტელექტის საშუალებით თავიანთ კლიენტებს სრულიად ახალი გზით დაუკავშირდნენ“.
როგორ აფასებენ ანალიტიკოსები Salesforce-ის აქციებს?
Salesforce-ის აქციების ამჟამინდელი ფასი დაახლოებით $253.00-ს შეადგენს. კომპანიას ამ ეტაპზე 40 ანალიტიკოსი აფასებს. საშუალო სამიზნე ფასი $297.11-ს შეადგენს, მაქსიმალური პროგნოზი — $365.00-ს, ხოლო მინიმალური — $230.00-ს. საშუალო სამიზნე ფასი Salesforce-ის აქციების ამჟამინდელი ფასიდან დაახლოებით 17.5%-იან გაუმჯობესებას გულისხმობს. კომპანიის აქციებს 40 ანალიტიკოსიდან 29-მ მიანიჭა ყიდვის რეკომენდაცია, 10-მა — ნეიტრალური რეიტინგი და 1-მა — გაყიდვის რეკომენდაცია.
Chipotle Mexican Grill
სამშაბათს, სავაჭრო დღის დასრულების შემდეგ, ამერიკული სარესტორნო ქსელის — Chipotle Mexican Grill-ის აქციები დაიყო, ხოლო გუშინ მათი ფასი 5%-ზე მეტით შემცირდა. წლის დასაწყისიდან ეს მაჩვენებელი 39%-ით არის გაუმჯობესებული.
აქციების დაყოფა
სამშაბათს Chipotle-ის აქციები 1/50 პროპორციით დაიყო. შესაბამისად, თითოეულ ინვესტორს, რომელიც 25 ივნისის მდგომარეობით კომპანიის აქციონერთა რიგებში იყო, დამატებით 49 აქცია გადაეცა. მათ პორტფელში Chipotle-ის აქციების რაოდენობა 50-ჯერ გაიზარდა, თუმცა ფასი, შესაბამისად, 50-ჯერ შემცირდა.
კოეფიციენტი საკმაოდ მაღალია, მაგრამ ეს კარგი ნაბიჯია იმის გათვალისწინებით, თუ რამდენად ძვირი იყო სარესტორნო ქსელის აქციები. იაფი აქცია უფრო მიმზიდველია და, სავარაუდოდ, ცოტა ხნის წინ ბევრმა ინვესტორმა ჩადო ინვესტიცია Chipotle-ში იმ იმედით, რომ აქციების დაყოფის შემდეგ მისი პოპულარობა გაიზრდებოდა.
ასეთ დროს ბევრი ინვესტორი ანაღდებს მოგებას. აქციების სწრაფი და დიდი რაოდენობით გაყიდვა კი ფასს ამცირებს. Chipotle-სთვის რაიმე ნეგატიური ფუნდამენტური სიახლეების არარსებობის პირობებში, მოგების განაღდება, სავარაუდოდ, გუშინდელი ვარდნის მთავარი მიზეზია.
როგორ აფასებენ ანალიტიკოსები Chipotle-ის აქციებს?
Chipotle Mexican Grill-ის აქციების ამჟამინდელი ფასი დაახლოებით $62.00-ს შეადგენს. კომპანიას ამ ეტაპზე უოლ სტრიტის 27 ანალიტიკოსი აფასებს. საშუალო სამიზნე ფასი $66.47-ს შეადგენს, მაქსიმალური პროგნოზი — $80.00-ს, ხოლო მინიმალური — $53.73-ს. საშუალო სამიზნე ფასი Chipotle Mexican Grill-ის აქციების ამჟამინდელი ფასიდან დაახლოებით 62.4%-იან ზრდას გულისხმობს. კომპანიის აქციებს 27 ანალიტიკოსიდან 19-მა მიანიჭა ყიდვის რეკომენდაცია, 8-მ — ნეიტრალური რეიტინგი და არცერთმა — გაყიდვის რეკომენდაცია.
ამ კომპანიების აქციების შეძენა საქართველოს ბანკის მობილბანკში შეგიძლიათ ბმულზე.
