გუშინ საფონდო ბირჟაზე გავრცელდა მნიშვნელოვანი სიახლეები, რომლებმაც ცნობილი კომპანიების აქციების ფასებზე მნიშვნელოვანი გავლენა იქონია. დღეს სწორედ მათ მიმოვიხილავთ და შემოგთავაზებთ საინტერესო დეტალებს ისეთი კომპანიების შესახებ, როგორებიც არის Micron Technology, Whirlpool Corporation და Nikola.
Micron Technology
გუშინ, ბაზრის დახურვის შემდეგ, Micron Technology-მ კვარტალური შედეგები გამოაქვეყნა. „After-hours”1 ვაჭრობაში კი ჩიპების მწარმოებელი კომპანიის აქციების ფასი 8%-ით შემცირდა. წლის დასაწყისიდან ეს მაჩვენებელი დაახლოებით 73%-ით არის გაუმჯობესებული.
კვარტალური შედეგები
ფისკალური 2024 წლის მესამე კვარტალში Micron Technology-ის შემოსავალი წლიურად 81%-ზე მეტით — $6.81 მილიარდამდე გაიზარდა. ამ მაჩვენებელმა გადააჭარბა ანალიტიკოსების პროგნოზს — $6.66 მილიარდს.
გასულ კვარტალში კომპანიის წმინდა მოგებამ $332 მილიონს მიღწია (უოლ სტრიტის პროგნოზი — $399.39 მილიონი). შედარებისთვის, გასული წლის იმავე კვარტალში Micron-მა $1.9 მილიარდის მოცულობის ზარალი განიცადა. მოგებამ თითო განზავებულ აქციაზე (EPS) კი $0.30 შეადგინა, რაც ანალიტიკოსების მოლოდინს შეესაბამებოდა.
„ძლიერმა მოთხოვნამ ხელოვნურ ინტელექტზე და შესანიშნავმა წარმადობამ Micron-ს საშუალება მისცა, შემოსავალი კვარტალურად 17%-ით გაუმჯობესებინა და ამ მაჩვენებელმა ჩვენს საპროგნოზო დიაპაზონს გადააჭარბა“ — განაცხადა Micron-ის აღმასრულებელმა დირექტორმა, სანჯაი მეჰროტრამ. მისი თქმით, კომპანია ზრდის წილს მაღალი მარჟის მქონე პროდუქტების ბაზარზე, როგორიც არის, მაგალითად, მაღალი გამტარობის მეხსიერების (HBM) ჩიპები.
მომავლის პროგნოზები
Micron-ის მენეჯმენტი მოელის, რომ ფისკალური 2024 წლის ბოლო კვარტალში კომპანიის შემოსავალი $7.6 მილიარდს მიაღწევს, რაც შეესაბამება Visible Alpha-ს მიერ შედგენილ პროგნოზებს.
Citi-ის ანალიტიკოსები მიიჩნევენ, რომ მეოთხე კვარტალში კომპანიის შემოსავალი $8 მილიარდს მიაღწევს. მათ Micron-ის აქციების სამიზნე ფასი $150-დან $175-მდე გაზარდეს.
გარდა ამისა, ერთი კვირის წინ BofA-მ Micron Technology-ის აქციების სამიზნე ფასი $144-დან $170-მდე გაზარდა და Micron-ს უწოდა „მეხსიერების პროდუქტების საუკეთესო ამერიკული კომპანია“.
ანალიტიკოსების განმარტებით, მათ სჯერათ, რომ მოწყობილობებში AI მახასიათებლების დანერგვა, იგივე Edge AI, ნელა, მაგრამ სტაბილურად შეავსებს ბირთვულ ან მონაცემთა ცენტრის AI აპარატურას. მათ აღნიშნეს, რომ Edge AI-ის ორი ყველაზე მნიშვნელოვანი ბენეფიციარები კომპიუტერული და მეხსიერების ჩიპების მწარმოებლები იქნებიან.
ანალიტიკოსების თქმით, AI პერსონალურ კომპიუტერებზე მზარდი მოთხოვნისა, მათთვის მეტი მეხსიერების საჭიროების და ამ პროდუქტების მაღალი ფასის გამო, ისინი მიიჩნევენ, რომ Micron-ის გაყიდვები, კალენდარულ 2025 და 2026 წლებში, შესაბამისად, 10%-ით და 12%-ით გაუმჯობესდება. ისინი ასევე მიიჩნევენ, რომ კორექტირებული მოგება თითო აქციაზე ამ წლებში, შესაბამისად, 20%-ით და 21%-ით გაიზრდება.
როგორ აფასებენ ანალიტიკოსები Micron-ის აქციებს?
Micron Technology-ის აქციების ამჟამინდელი ფასი დაახლოებით $142.00-ს შეადგენს. კომპანიას ამ ეტაპზე 20 ანალიტიკოსი აფასებს. საშუალო სამიზნე ფასი $156.37-ს შეადგენს, მაქსიმალური პროგნოზი — $225.00-ს, ხოლო მინიმალური — $3.00-ს. საშუალო სამიზნე ფასი Micron Technology-ის აქციების ამჟამინდელი ფასიდან დაახლოებით 9.8%-იან ზრდას გულისხმობს. კომპანიის აქციებს 20 ანალიტიკოსიდან 19-მა მიანიჭა ყიდვის რეკომენდაცია, 1-მა — ნეიტრალური რეიტინგი და არცერთმა — გაყიდვის რეკომენდაცია.
Whirlpool Corporation
გუშინ, პოზიტიური სიახლის შემდეგ, საყოფაცხოვრებო ელექტროტექნიკის მწარმოებელი კომპანიის — Whirlpool Corporation-ის აქციების ფასი 17%-ზე მეტით გაიზარდა. წლის დასაწყისიდან ეს მაჩვენებელი დაახლოებით 17%-ით არის შემცირებული.
მნიშვნელოვანი სიახლე
Whirlpool არის საყოფაცხოვრებო ტექნიკის ერთ-ერთი უმსხვილესი მწარმოებელი, რომელიც დაფუძნებულია შეერთებულ შტატებში. კომპანიის ბიზნესი სულ უფრო მეტად განიცდის ზეწოლა უცხოური კონკურენტებისგან. ბოლო წლების განმავლობაში Whirpool-ის მენეჯმენტმა ახლო აღმოსავლეთსა და აფრიკაში თავისი ოპერაციების დივესტირებას მიმართა და ჩამოაყალიბა ერთობლივი საწარმო, რათა მართოს თავისი ევროპული ბიზნესი. ეს გადაწყვეტილებები საკუთარ ბაზრებზე ნაღდი ფულის დაზოგვისა და კონკურენტების წინააღმდეგ ბრძოლის გეგმის ნაწილს წარმოადგენს.
როგორც ჩანს, გერმანული ინდუსტრიული კონგლომერატი — Robert Bosch აღიქვამს Whirlpool-ს, პოტენციურ საშუალებად, საკუთარ მოწყობილობებთან დაკავშირებული ოპერაციების შესაქმნელად. Reuters-ის ცნობით, Bosch-ის მენეჯმენტი ესაუბრება პოტენციურ მრჩევლებს Whirlpool-ის შეძენის შესაძლებლობის შესახებ.
მოხსენების თანახმად, არ არის გარკვეული, გაკეთდება თუ არა შეთავაზება, ან რამდენად მზად იქნება Bosch, გადაიხადოს მნიშვნელოვანი პრემია Whirlpool-ის ამჟამინდელ $5.5-მილიარდიან საბაზრო კაპიტალიზაციაზე. თუმცა გუშინ ინვესტორებმა შეიძინეს Whirlpool-ის აქციები იმ იმედით, რომ ეს გარიგება პროგრესირდება.
როგორ აფასებენ ანალიტიკოსები Whirpool-ის აქციებს?
Whirlpool Corporation-ის აქციების ამჟამინდელი ფასი დაახლოებით $102.00-ს შეადგენს. კომპანიას ამ ეტაპზე 5 ანალიტიკოსი აფასებს. საშუალო სამიზნე ფასი $101.75-ს შეადგენს, მაქსიმალური პროგნოზი — $135.00-ს, ხოლო მინიმალური — $75.00-ს. საშუალო სამიზნე ფასი Whirlpool Corporation-ის აქციების ამჟამინდელი ფასიდან დაახლოებით 0.15%-იან კლებას გულისხმობს. კომპანიის აქციებს 5 ანალიტიკოსიდან 2-მა მიანიჭა ყიდვის რეკომენდაცია, 1-მა — ნეიტრალური რეიტინგი, ხოლო 2-მა — გაყიდვის რეკომენდაცია.
Nikola
ელექტრომობილების (EV) სექტორში მნიშვნელოვანი სიახლის გავრცელების პარალელურად გუშინ რამდენიმე EV კომპანიის აქციების ფასი გაიზარდა. ელექტრო სატვირთო მანქანების მწარმოებელი Nikola ერთ-ერთი მათგანი იყო, გუშინ მისი აქციების ფასმა თითქმის 6%-ით მოიმატა. წლის დასაწყისიდან ეს მაჩვენებელი დაახლოებით 60%-ით არის შემცირებული.
ერთ-ერთმა EV კომპანიამ დიდი ინვესტიცია მოიზიდა
გუშინ გავრცელდა ინფორმაცია, რომ გერმანული ავტომწარმოებელი — Volkswagen გეგმავს, $5 მილიარდის დაბანდებას ელექტრომობილების (EV) სტარტაპში. მიზანი არის ერთობლივი საწარმოს საშუალებით ინდუსტრიაში წამყვანი ავტომობილების პროგრამული უზრუნველყოფის ტექნოლოგიის შექმნა.
Volkswagen-ის საწყისი ინვესტიცია Rivian Automotive-ში $1 მილიარდს შეადგენს. ავტომწარმოებლების ერთობლივ განცხადებაში ნათქვამია, რომ კიდევ $4 მილიარდის მოცულობის ინვესტიცია 2026 წლისთვის განხორციელდება.
თუმცა ელექტრომობილების ყველა სტარტაპი დიდ ფულად ინვესტიციას ვერ მიიღებს. Nikola-ს კი გასული წლის განმავლობაში არამარტო მოუწია დამატებითი კაპიტალის მოზიდვა, არამედ გარკვეული ზომების მიღება, რათა Nasdaq-ის საფონდო ბირჟის ლისტინგში თავისი აქციები შეენარჩუნებინა.
Nikola-ს აქციონერებმა ცოტა ხნის წინ დაამტკიცეს აქციების რევერსული დაყოფა 30-1 პროპორციით, რომელიც ძალაში გუშინ შევიდა. ეს არ ცვლის კომპანიის ღირებულებას, მაგრამ შესაძლებელია, ინვესტორებმა პოზიტიურად მიიღონ ის ფაქტი, რომ Nikola Nasdaq-ის ბირჟაზე დარჩება. ამით შეიძლება აიხსნას გუშინდელი ზრდა.
მაგრამ თუ ინვესტორების დადებითი განწყობის მიზეზი ის არის, რომ, მათი აზრით, Rivian-ის მსგავსად, Nikola-საც შეუძლია მიიღოს ფინანსური მხარდაჭერა სხვა ავტომწარმოებლისგან, ეს უბრალოდ აზარტულ თამაშს ჰგავს.
ამ კომპანიების აქციების შეძენა საქართველოს ბანკის მობილბანკში შეგიძლიათ ბმულზე.
[1] სავაჭრო აქტივობის პერიოდი, რომელიც რეგულარული საბაზრო სესიის შემდეგ მიმდინარეობს.
