ფისკალური წლის პირველ ნახევარში იაპონური ავტომწარმოებლის — Toyota Motor-ის გლობალური გაყიდვები წლიდან წლამდე 8.3%-ით გაიზარდა და თითქმის 5.6 მილიონ ავტომობილს მიაღწია, რაც კომპანიისთვის ახალ რეკორდს წარმოადგენს.
Toyota Motor-ის მენეჯმენტმა განაცხადა, რომ მიმდინარე წლის აპრილიდან სექტემბრის ჩათვლით, წლიდან წლამდე გაყიდვებისა და წარმოების მაჩვენებლები გაიზარდა, რადგან ნახევარგამტარებზე დეფიციტი შემცირდა. გლობალურმა წარმოებამ, მათ შორის შვილობილი კომპანიების — Daihatsu Motor Co.-სა და Hino Motors Ltd-ს ჩათვლით, 10%-ით მოიმატა და 5.7 მილიონ ერთეულს მიაღწია.
მიწოდების უკეთესმა პირობებმა და მომხმარებელთა მძლავრმა მოთხოვნამ Toyota კიდევ ერთი სტაბილური ზრდის წელიწადის გზაზე დააყენა. ეს არის გაყიდვების პირველი მატება ბოლო ორი წლის განმავლობაში.
Toyota-სა და Lexus-ის ბრენდის გაყიდვები აფრიკაში 22%-ით გაიზარდა, რაც ყველაზე მაღალი ზრდაა კომპანიის ნებისმიერ რეგიონთან შედარებით. მას მოჰყვება ახლო აღმოსავლეთი 17%-იანი მატებით, ჩრდილოეთ ამერიკა — 9.4%-ით და ევროპა 7%-ით. თუმცა აღსანიშნავია, რომ ეკონომიკურმა შენელებამ ტაილანდსა და ინდონეზიაში ხელი შეუწყო შედარებით სუსტ გაყიდვებს აზიის ზოგიერთ ნაწილში.
ამასთან, აღსანიშნავია, რომ Toyota Motor-ის წარმომადგენლებმა აშშ-ში ხელი მოაწერეს $3 მილიარდის ღირებულების ხელშეკრულებას, რომელიც კომპანიის ელექტრო მანქანებისთვის ბატარეების მიწოდებას გულისხმობს.
LG Energy Solution გააძლიერებს ახალ საწარმოო ხაზებს EV ბატარეებისთვის და მოდულებისთვის, რომლებიც ექსკლუზიურად Toyota-სთვის დამზადდება და დაგეგმილია, რომ ეს პროცესი 2025 წლისთვის დასრულდება. ეს მნიშვნელოვანი გარიგებაა წამყვანი ავტომობილების მწარმოებლისთვის, რადგან Toyota გეგმავს EV წარმოების მასშტაბირებას 2030 წლამდე.
Toyota Motor კვარტალურ ანგარიშს ხვალ, სავაჭრო დღის დასრულების შემდეგ, წარადგენს. უოლ სტრიტის ანალიტიკოსების პროგნოზირებენ, რომ იაპონური ავტომწარმოებლის კვარტალური შემოსავალი $71.09 მილიარდს მიაღწევს.
