დღეს, სავაჭრო დღის დაწყებამდე, ჯანდაცვის ტექნოლოგიების კომპანია Philips-მა კვარტალური შედეგები გამოაქვეყნა.
ფისკალური 2023 წლის მესამე კვარტალში ნიდერლანდებში დაფუძნებული კომპანიის შემოსავალმა 4.14 მილიარდ ევროს მიაღწია (ანალიტიკოსების პროგნოზი — 4.18 მილიარდი ევრო). მოგებამ თითო აქციაზე (EPS) კი 0.26 ევრო შეადგინა (პროგნოზი — 0.289 ევრო).
Philips-ის EBITA (მოგება ვალის მომსახურების ხარჯების, გადასახადებისა და ამორტიზაციის გამოკლებამდე) წლიურად 119%-ით — 457 მილიონ ევრომდე გაიზარდა. ერთი და იმავე ლოკაციების გაყიდვებმა1 კი 11%-ით მოიმატა და 4.5 მილიარდი ევრო შეადგინა.
Comps კომპანიის Diagnostic & Treatment განყოფილებაში 14%-ით გაიზარდა, Connected Care სეგმენტში — 10%-ით, ხოლო Personal Care მიმართულებაში — 7%-ით. თუმცა ჩინეთიდან მოთხოვნის შენელებამ შეკვეთების 9%-იანი ვარდნა გამოიწვია.
აღმასრულებელმა დირექტორმა — როი ჯეიკობსმა Philips-ის ძლიერი შედეგები კომპანიის მიწოდების ჯაჭვის საიმედოობის გაძლიერებას და გამარტივებული საოპერაციო მოდელის შექმნას მიაწერა.
როის თქმით, კომპანიის გაუმჯობესებული ეფექტიანობის გამო, იგი მოელის, რომ მთელი წლის განმავლობაში Philips-ის EBITDA-ს 10%-11%-ით გაუმჯობესდება (ძველი პროგნოზი — მაღალი ერთნიშნა პროცენტული მატება). კომპანიაში ასევე მოელიან, რომ გაყიდვები 6%-7%-ით გაიზრდება (წინა პროგნოზი — საშუალო ერთნიშნა პროცენტული მატება).
Philips-ის პრობლემები
მიმდინარე წლის დასაწყისში Philips-ის მენეჯმენტმა განაცხადა, რომ კომპანია შეწყვეტს ძილის აპნოეს მოწყობილობების გაყიდვას აშშ-ში მას შემდეგ, რაც აღმოაჩინა, რომ ისინი მომხმარებლებისთვის პოტენციურ საფრთხეს წარმოადგენს.
კომპანიის წარმომადგენლებმა განაცხადეს, რომ გადაწყვეტილება მიღებულ იქნა იუსტიციის დეპარტამენტის განკარგულების შესაბამისად, რომელიც აშშ-ის სურსათისა და მედიკამენტების ადმინისტრაციას (FDA) წარმოადგენს.
Philips-ის მენეჯმენტმა თქვა, რომ კომპანია აშშ-ში არ გაყიდის ახალ CPAP ან BiPAP ძილის თერაპიის ან რესპირატორული მოვლის სხვა მოწყობილობებს, სანამ დადგენილების შესაბამისი მოთხოვნები არ დაკმაყოფილდება.
ეს პროცესი 2021 წელს დაიწყო. ამ მოწყობილობებში, გარკვეული საწმენდი მასალების გამოყენებისას, პოლიესტერზე დაფუძნებული პოლიურეთანის ქაფი იშლება, რამაც მომხმარებლებში, FDA-ს წარმომადგენლების თქმით, კიბო და სხვა დაზიანებები გამოიწვია. მათი განცხადებით ამ მოწყობილობებთან დაკავშირებით არსებობს 100,000 საჩივარი და 385 გარდაცვალების შემთხვევა.
თუმცა მიმდინარე თვის დასაწყისში FDA-ს წარმომადგენლებმა აღნიშნეს: „არ მივიჩნევთ, რომ ტესტირებისა და ანალიზის შედეგები, რომელიც Philips-მა დღემდე გააზიარა, ადეკვატურია იმ რისკების სრულად შესაფასებლად, რომლებიც კომპანიის მოწყობილობებით არის გამოწვეული“. FDA-ის ოფიციალური პირების განცხადებით, საჭიროა დამატებითი ტესტირება და Philips-ის მენეჯმენტი ამას დათანხმდა.
დღეს, კვარტალური ანგარიშის წარდგენის შემდეგ კი, Philips-ის აღმასრულებელმა დირექტორმა განაცხადა, რომ ამ მოწყობილობების უკან გაწვევის პროცესის დასრულება კომპანიისთვის უმთავრეს პრიორიტეტად რჩება.
Philips-ის აქციების შეძენა საქართველოს ბანკის მობილბანკში შეგიძლიათ ბმულზე.
