არაფრის კეთებით ფულის გამომუშავება ყველა ინვესტორის ოცნებაა. ეს შესაძლებელია პასიური შემოსავლის საშუალებით და მისი გენერირების ერთ-ერთი საუკეთესო გზა დივიდენდურ აქციებში ინვესტირებაა.
დივიდენდების გადამხდელ კომპანიებს, როგორც წესი, მყარი ბალანსი გააჩნია, რაც მათ საშუალებას აძლევს, რომ დივიდენდები ბაზრის ციკლის მიუხედავად გადაიხადოს. ერთ-ერთი ინდუსტრია, რომელშიც ყველაზე უსაფრთხო დივიდენდურ კომპანიებს შეხვდებით, არის საბანკო სექტორი. დღეს კი სამი საუკეთესო საბანკო დივიდენდური აქციის შესახებ ვისაუბრებთ.
- U.S. Bancorp
U.S. Bancorp არის U.S. Bank-ის მშობელი კომპანია და აქტივების ზომის მიხედვით აშშ-ში მეხუთე უდიდესი ბანკია. შესაძლოა, ინვესტორები ამ ბანკს უორენ ბაფეტის წყალობით იცნობდნენ, რომლის Berkshire Hathaway ბანკში $6.6 მილიარდის მოცულობის ინვესტიციას ფლობს, რაც მას კომპანიის სიდიდით მეათე ჰოლდინგად აქცევს.
U.S. Bancorp ორიენტირებულია ტრადიციული საბანკო საქმიანობის უზრუნველყოფაზე, როგორიც არის დეპოზიტების გაზრდა და სესხების გაცემა. ბანკი ფოკუსირებულია მხოლოდ მაღალი ხარისხის (დაბრუნების მაღალი ალბათობა) სესხების წარმოებაზე, რაც მას თავის კონკურენტებთან შედარებით კაპიტალის რენტაბელობის თვალსაზრისით უპირატესობას ანიჭებს.
მაღალხარისხიან სესხებზე ფოკუსირება ბანკს ასევე მგრძნობიარეს ხდის საპროცენტო განაკვეთების ცვლილების მიმართ. ფედერალური სარეზერვო ბანკის მიერ საპროცენტო განაკვეთების აგრესიულმა ზრდამ ხელი შეუწყო წელს ბანკის წმინდა საპროცენტო შემოსავლის 6.6%-ით ზრდას. ბოლო მარეგულირებენ განცხადებაში ბანკის მენეჯმენტმა განაცხადა, რომ კიდევ 50 საბაზისო პუნქტით (0.5%) ზრდა წმინდა საპროცენტო შემოსავლის 1.17%-ით მატებას გამოიწვევს.
უკვე ზედიზედ 11 წელია, რაც U.S. Bancorp დივიდენდებს ზრდის. ამჟამად მისი დივიდენდური სარგებელი 3.8%-ს შეადგენს.
- United Bankshares
United Bankshares უზრუნველყოფს საბანკო მომსახურებას დასავლეთ ვირჯინიის მასშტაბით. 1982 წლიდან კომპანიამ 33 პატარა რეგიონული ბანკი შეისყიდა.
United Bankshares-ის უნარმა, შეიძინოს და გააერთიანოს მცირე ბანკები, ინვესტორებისთვის შედეგი გამოიღო – უკვე ზედიზედ 48 წელია, რაც კომპანია დივიდენდურ ანაზღაურებას ყოველწლიურად ზრდის. United Bankshares S&P 500-ის წევრი რომ იყოს, კიდევ ორი ასეთი წელი ბანკს დივიდენდ მეფეების კლუბში გააერთიანებდა. ამჟამად მისი დივიდენდური ანაზღაურება 3.59%-ს შეადგენს.
- Bank OZK
Bank OZK მომხმარებლებს საბანკო მომსახურებას 240 ოფისში – ფლორიდაში, ჯორჯიაში, არკანზასში, ჩრდილოეთ კაროლინაში, მისისიპიში, ტეხასში, კალიფორნიასა და ნიუ-იორკში სთავაზობს. Bank OZK თავის ანგარიშებზე მხოლოდ მაღალი ხარისხის სესხებს ფლობს.
ბანკი ასევე მგრძნობიარეა საპროცენტო განაკვეთების ცვლილებების მიმართ. წლის პირველი 6 თვის განმავლობაში Bank OZK-ის წმინდა საპროცენტო შემოსავალი 8.3%-ით გაიზარდა. მისი ბოლო მარეგულირებელი დოკუმენტაციის თანახმად, საპროცენტო განაკვეთების 1%-იანი ზრდა წმინდა საპროცენტო შემოსავლის 4.6%-ით ზრდას გამოიწვევს, ხოლო 2%-იანი ზრდა – 9.3%-იან მატებას.
Bank OZK-ის ფოკუსირებამ მაღალხარისხიან სესხებზე საშუალებას მისცა მას აქციონერებისთვის დივიდენდური ანაზღაურება ზედიზედ 12 წლის განმავლობაში გაეზარდა. ამჟამად ბანკის დივიდენდური სარგებელი 2.85%-ს შეადგენს.
