ინვესტირება შესაძლოა რთული იყოს და მუდამ სწორი გადაწყვეტილებების მიღება შეუძლებელია. თქვენი ინვესტიციებისგან მნიშვნელოვანი ანაზღაურების მიღებას ხშირად ათწლეულები სჭირდება, რაც რთულს ხდის იმის გაგებას, იღებთ თუ არა სწორ გადაწყვეტილებებს მოკლევადიან პერიოდში.
ინვესტირება დროთა განმავლობაში მნიშვნელოვანი სიმდიდრის დაგროვების ერთ-ერთი ყველაზე ეფექტური გზაა. მიუხედავად იმისა, რომ ინვესტირებასთან დაკავშირებით ერთიანი, უნივერსალური მიდგომა არ არსებობს, ეს სინანულის მიზეზი, რომელსაც სტატიაში განვიხილავთ ბევრისთვის ნაცნობია და მისი თავიდან აცილება საკმაოდ მარტივი გზით შეიძლება.
არასტაბილურობის მართვა სწორი (და არასწორი) გზით
როდესაც ინვესტირებას იწყებთ, აუცილებლად უნდა იცოდეთ, რომ საფონდო ბირჟას არასტაბილურობა ახასიათებს. ამისთვის მზად უნდა იყოთ. მრავალ ინვესტორს, ბირჟის ვარდნის ფონზე, პანიკა იპყრობს, ეს კი კარგს არაფერს მოგიტანთ. ამის შემდეგ, შესაძლოა, თქვენი ინვესტიციების გამუდმებით შემოწმებით შეპყრობილი გახდეთ, საბოლოოდ კი ასეთ რთულ პერიოდში, მრავალი ახალბედა ინვესტორი ფულის ბირჟიდან გამოტანას ირჩევს.
თუ მსგავს მდგომარეობაში ხართ, გახსოვდეთ, რომ მარტო არ ხართ. საფონდო ბირჟაზე ოპერირება შეიძლება სტრესული იყოს და ვარდნასთან გამკლავება ზოგჯერ ძალიან რთულია – განსაკუთრებით მაშინ, როდესაც თქვენი სასიცოცხლო დანაზოგი ინვესტიციებთან არის დაკავშირებული.
თუმცა, არასტაბილურობა ნორმალური მოვლენაა. მიუხედავად იმისა, რომ ამის თქმა უფრო ადვილია, ვიდრე გაკეთება, საუკეთესო რამ, რაც შეგიძლიათ ამ დროს გააკეთოთ არის იგნორირება და გრძელვადიანი პერსპექტივის შენარჩუნება.
შეინარჩუნეთ სიმშვიდე, როდესაც ბაზარი მერყევია
ინვესტირება გრძელვადიანი სტრატეგიაა. რთული ნაწილი ის არის, რომ მნიშვნელოვანი შემოსავლის მიღებას, შეიძლება, წლები დასჭირდეს.
თუმცა, გრძელვადიანი მიდგომის გამოყენების ერთ-ერთი დადებითი მხარე არის ის, რომ ასეთ დროს თქვენთვის მოკლევადიანი ცვალებადობა მნიშვნელობას კარგავს. შესაძლოა, თქვენმა ინვესტიციებმა კვირების ან თვეების განმავლობაში დიდი დარტყმები მიიღოს, მაგრამ მთავარია მათი წარმადობა ათწლეულების განმავლობაში. როდესაც ორიენტირებული ხართ გრძელვადიან პერსპექტივაზე, ბაზრის ყოველდღიური რყევების იგნორირება უფრო ადვილია.
გასაგებად რომ ვთქვათ, ეს სულაც არ ნიშნავს იმას, რომ განზრახ უნდა დარჩეთ არაინფორმირებული იმის შესახებ, თუ რა ხდება საფონდო ბირჟაზე და ეკონომიკაში. მაგრამ შეეცადეთ ემოციებზე დაყრდნობით გადაწყვეტილებების მიღებას მოერიდოთ.
როდესაც ეჭვები შეგიპყრობთ, გახსოვდეთ, რომ საფონდო ბირჟამ ათეულობით მნიშვნელოვანი ვარდნა განიცადა და საბოლოოდ ყველა დაბრკოლება გადალახა. მიუხედავად ყველაფრისა, 2000 წლიდან S&P 500 190%-ით არის გაზრდილი.
საფონდო ბირჟის არასტაბილურობასთან გამკლავება გამოცდილ ინვესტორებსაც კი უჭირთ. თუმცა გამოცდილება მათ სიტუაციის სხვა კუთხით გაანალიზების უნარს სძენს. თუ შეძლებთ, რომ მოკლევადიანი რყევები უგულებელყოთ და ფული ბაზარზე გრძელვადიან პერსპექტივაში დააბანდოთ, სიმდიდრის გამომუშავებისკენ მიმავალ სწორ გზაზე დადგებით.
