გასულ ოთხშაბათს, სავაჭრო დღის დაწყებამდე, Shopify-მ მოსალოდნელზე უკეთესი კვარტალური ანგარიში გამოაქვეყნა. თუმცა მას შემდეგ, დღემდე, ელექტრონული კომერციის კომპანიის აქციების ფასი 24%-ზე მეტით შემცირდა. როგორც ჩანს, ინვესტორები უფრო მეტად ფოკუსირდნენ მენეჯმენტის პროგნოზებზე მეორე კვარტლისთვის.
წლის დასაწყისიდან Shopify-ის აქციების ფასი დაახლოებით 20%-ით არის დაკლებული.
კვარტალური შედეგები
2024 წლის პირველ კვარტალში Spotify-ის შემოსავალი წლიურად 23%-ით (29%-ით, თუ Deliverr-ის ლოჯისტიკური ბიზნესის გაყიდვით გამოწვეულ ეფექტს გამოვრიცხავთ) — $1.86 მილიარდამდე გაიზარდა, რამაც გადააჭარბა ანალიტიკოსების პროგნოზს — $1.84 მილიარდს. სააბონენტო-გადაწყვეტების შემოსავალი წლიურად 34%-ით — $511 მილიონამდე გაიზარდა, რაც გამოწვეული იყო პლატფორმაზე ახალი მოვაჭრეების დამატებით და კომპანიის სააბონენტო ფასების გაზრდით. სავაჭრო გადაწყვეტების სეგმენტის შემოსავალი, რომელიც მოიცავს მომსახურებას, როგორიცაა გადახდები, გადაზიდვები და დაფინანსება, წლიურად 20%-ით გაუმჯობესდა და $1.4 მილიარდს მიაღწია.
მთლიანი საქონლის მოცულობა (GMV) 23%-ით — $60.9 მილიარდამდე გაიზარდა, ხოლო გადახდების მთლიანმა მოცულობამ 32%-ით მოიმატა და $36.2 მილიარდს მიაღწია.
კორექტირებულმა მოგებამ თითო აქციაზე (EPS) კი $0.20-ს მიაღწია, რამაც გადააჭარბა უოლ სტრიტის პროგნოზს — $0.17-ს.
პირველ კვარტალში თავისუფალი ფულადი ნაკადების მარჟამ 12% შეადგინა, თუმცა როგორც ეს მაჩვენებელი, ისე კორექტირებული EPS უგულებელყოფს აქციებზე დაფუძნებულ კომპენსაციას, რომელმაც კვარტალში $105 მილიონს მიაღწია.
მომავლის პროგნოზები
რაც შეეხება მომავალს, Shopify-ის მენეჯმენტი მოელის, რომ მიმდინარე კვარტალში შემოსავლების ზრდა შენელდება. კომპანიაში პროგნოზირებენ, რომ მთლიანი მოგების მარჟა, გასულ კვარტალთან შედარებით, 50 საბაზისო პუნქტით შემცირდება.
როგორ აფასებენ ანალიტიკოსები Shopify-ის აქციებს?
Shopify-ის აქციების ამჟამინდელი ფასი დაახლოებით $59.00-ს შეადგენს. კომპანიას ამ ეტაპზე 32 ანალიტიკოსი აფასებს. საშუალო სამიზნე ფასი $77.15-ს შეადგენს, მაქსიმალური პროგნოზი — $95.00-ს, ხოლო მინიმალური — $63.00-ს. საშუალო სამიზნე ფასი Shopify-ის აქციების ამჟამინდელი ფასიდან დაახლოებით 31%-იან ზრდას გულისხმობს. კომპანიის აქციებს 32 ანალიტიკოსიდან 15-მა მიანიჭა ყიდვის რეკომენდაცია, 16-მა — ნეიტრალური რეიტინგი, ხოლო 1-მა — გაყიდვის რეკომენდაცია.
Shopify-ის აქციების შეძენა საქართველოს ბანკის მობილბანკში შეგიძლიათ ბმულზე.
