როდესაც მთავარი ინსაიდერები1 თავიანთი კომპანიის აქციებს ყიდულობენ, როგორც წესი, ისინი მის მომავალში დარწმუნებულნი არიან. რა თქმა უნდა, მათი ამგვარი თავდაჯერება შეიძლება არასწორი იყოს, თუმცა ინვესტორების უმეტესობა ინსაიდერულ შესყიდვებს პოზიტიურ ნიშნად აღიქვამს.
თუმცა მთავარი ინსაიდერების მიერ აქციების გაყიდვის შემთხვევაში შეიძლება ამბავი სრულიად განსხვავებული იყოს. ხანდახან ასეთი ნაბიჯები შეიძლება მიანიშნებდეს, რომ ისინი არ არიან ოპტიმისტურად განწყობილნი კომპანიის პერსპექტივების მიმართ — ყოველ შემთხვევაში უახლოეს პერიოდში.
ბოლო წლების განმავლობაში ჩიპების მწარმოებელი გიგანტის — Nvidia-ს აქციების ფასი წარმოუდგენლად გაიზარდა. წლის დასაწყისიდან კი ეს მაჩვენებელი დაახლოებით 174%-ით არის გაუმჯობესებული. თუმცა გავრცელდა ინფორმაცია, რომ ინსაიდერები მის აქციებს ყიდიან. მოდით ეს სიახლე უფრო დეტალურად განვიხილოთ.
ინსაიდერული გაყიდვები
მაისის დასაწყისიდან აშშ-ის ფასიანი ქაღალდებისა და ბირჟების კომისიაში (SEC) Nvidia-ს მიერ 10 „ფორმა 144“ იქნა წარდგენილი. არსებობს ორი მნიშვნელოვანი რამ, რაც „ფორმა 144-ის“ შესახებ უნდა ვიცოდეთ: 1. ეს არის შეტყობინება ფასიანი ქაღალდების შეთავაზებული გაყიდვის შესახებ; 2. ის გამოიყენება მხოლოდ მაშინ, როდესაც დაგეგმილია 5000+ აქციის გაყიდვა ან გასაყიდი აქციების მთლიანი ღირებულება $50,000-ს აჭარბებს.
ყველაზე ცნობილი ადამიანი, რომელიც Nvidia-ს აქციებს ყიდის, არის კომპანიის აღმასრულებელი დირექტორი — ჯენსენ ჰუანგ. ჩიპების მწარმოებელმა გიგანტმა SEC-ს აცნობა, რომ ჯენსენი 2024 წლის 13 ივნისს Nvidia-ს 120,000 აქციის გაყიდვას გეგმავდა. ამ თარიღისთვის, ბაზრის დახურვისას, ტრანზაქციის ღირებულება დაახლოებით $15.5 მილიონი იქნებოდა.
ჯენსენ ჰუანგი არ იყო Nvidia-ს ერთადერთი აღმასრულებელი, რომელიც აქციებს ყიდდა. 2024 წლის 3 ივნისს ოპერაციების აღმასრულებელმა ვიცე-პრეზიდენტმა — დებორა შოკუისტმა Nvidia-ს $45 მილიონზე მეტის ღირებულების 41,140 აქცია გაყიდა.
გაყიდვებში დირექტორთა საბჭოს რამდენიმე წევრიც ჩაერთო. დაუნ ჰადსონმა 2024 წლის 29 მაისიდან 3 ცალკეულ შემთხვევაში მთლიანობაში Nvidia-ს 25,000 აქცია გაყიდა. ბოლო კვირების განმავლობაში ჩიპების მწარმოებლის აქციები ასევე გაყიდეს საბჭოს წევრებმა ტენჩ კოქსმა, ჯონ დაბირიმ, მაიკლ მაკაფერიმ, ბრუკ სიუელმა და მარკ სტივენსმა.
რას ნიშნავს ეს ინვესტორებისთვის?
ეს ინსაიდერული გაყიდვები შეიძლება ზოგიერთი ინვესტორისთვის საგანგაშო იყოს. თუმცა, დასკვნების გამოტანამდე, სჯობს ამბავს ჩავუღრმავდეთ.
ჯენსენ ჰუანგის გაყიდული აქციები იყო მისი, როგორც აღმასრულებლის, კომპენსაციის პაკეტის ნაწილი. კერძოდ, ეს იყო შეზღუდული საფონდო ერთეულები (RSU)2 და წარმადობის საფონდო ერთეულები (PSU)3. კომპანიის აღმასრულებელი დირექტორები ხშირად ყიდიან ასეთ აქციებს, როდესაც მათ ამის უფლება აქვთ.
მნიშვნელოვანია აღინიშნოს, რომ 2024 წლის 25 მარტის მდგომარეობით, ჯენსენი Nvidia-ს თითქმის 93.5 მილიონ აქციას ფლობდა. ეს კომპანიის მოქმედი აქციების თითქმის 3.8%-ს შეადგენს. შესაბამისად, აღმასრულებელ დირექტორს პორტფელში Nvidia-ს ჯერ კიდევ ბევრი აქცია აქვს დარჩენილი.
სხვა გაყიდვების უმეტესობა ასევე შეზღუდულ საფონდო ერთეულებთან იყო დაკავშირებული. ამიტომ, ეს ტრანზაქციები ინვესტორებისთვის ზედმეტად შემაშფოთებელი არ უნდა იყოს.
როგორ აფასებენ ანალიტიკოსები Nvidia-ს აქციებს?
Nvidia-ს აქციების ამჟამინდელი ფასი დაახლოებით $132.00-ს შეადგენს. კომპანიას ამ ეტაპზე უოლ სტრიტის 40 ანალიტიკოსი აფასებს. საშუალო სამიზნე ფასი $126.93-ს შეადგენს, მაქსიმალური პროგნოზი — $150.00-ს, ხოლო მინიმალური — $90.00-ს. საშუალო სამიზნე ფასი Nvidia-ს აქციების ამჟამინდელი ფასიდან დაახლოებით 3.6%-იან კლებას გულისხმობს. კომპანიის აქციებს 40 ანალიტიკოსიდან 37-მა მიანიჭა ყიდვის რეკომენდაცია, 3-მა — ნეიტრალური რეიტინგი და არცერთმა — გაყიდვის რეკომენდაცია.
Nvidia-ს აქციების შეძენა საქართველოს ბანკის მობილბანკში შეგიძლიათ ბმულზე.
კონტენტი მოწოდებულია საინფორმაციო მიზნით და არ წარმოადგენს ფინანსურ რჩევას. ყველა ინვესტიცია შეიცავს რისკს, ამიტომ აუცილებელია, ინვესტირებამდე საკუთარი კვლევა ჩაატაროთ.
[1] პირი, რომელიც, თავისი სამსახურებრივი მდგომარეობიდან გამომდინარე, კონფიდენციალურ ინფორმაციას ფლობს.
[2] დამსაქმებლის მიერ გაცემული საფონდო კომპენსაცია.
[3] ჯილდო, რომელიც კომპანიის მიერ კონკრეტულ დროში დასახული მიზნის მიღწევის საფუძველზე გაიცემა.
