ხუთშაბათს, სავაჭრო დღის დასრულების შემდეგ, Ross Stores-მა მოსალოდნელზე ძლიერი კვარტალური ანგარიში წარადგინა და მთელი წლის პროგნოზებიც გაზარდა. პარასკევს კი ჩამოფასებული საქონლით მოვაჭრე კომპანიის აქციების ფასმა 7%-ზე მეტით მოიმატა. მიმდინარე წლის განმავლობაში ეს მაჩვენებელი დაახლოებით 11%-ით არის გაუმჯობესებული.
ფისკალური 2023 წლის მესამე კვარტალში Ross Stores-ის შემოსავალი წლიდან წლამდე 7.9%-ით — $4.92 მილიარდამდე გაიზარდა (ანალიტიკოსების პროგნოზი — $4.83 მილიარდი), ხოლო EPS-მა $1.33 შეადგინა (პროგნოზი — $1.22).
ერთი და იმავე მაღაზიების გაყიდვები1, უპირველეს ყოვლისა უფრო მაღალი ტრაფიკის შედეგად, 5%-ით გაიზარდა. უოლ სტრიტის ანალიტიკოსების პროგნოზს ამ მაჩვენებელმაც გადააჭარბა.
Ross Stores-ის აღმასრულებელმა დირექტორმა — ბარბარა რენტლერმა განაცხადა, რომ მყიდველებმა დადებითად უპასუხეს კომპანიის მიერ შეთავაზებულ შესანიშნავ ფასეულობებს. მან დაამატა, რომ საოპერაციო მარჟა 9.8%-დან 11.2%-მდე გაიზარდა, რადგან comps-ის ზრდა და ტვირთების გადაზიდვის დაბალი ხარჯები ნაწილობრივ უფრო მაღალი ხელფასებით იყო კომპენსირებული.
თუმცა ბარბარამ ასევე აღნიშნა, რომ Ross Stores მაკროეკონომიკური არასტაბილურობის, ინფლაციისგან მუდმივი ზეწოლის და გეოპოლიტიკური გაურკვევლობის პირობებში ოპერირებას განაგრძობს. აღმასრულებელმა დირექტორმა განაცხადა, რომ ამის გათვალისწინებით გონივრული იქნება პროგნოზირებისადმი ფრთხილი მიდგომის შენარჩუნება.
რაც შეეხება მომავალს, Ross Stores-ის მენეჯმენტი მოელის, რომ მიმდინარე კვარტალში კომპანიის EPS $1.56-$1.62-ს მიაღწევს, ანალიტიკოსების პროგნოზი კი $1.61-ს შეადგენს. გარდა ამისა, მთელი წლისთვის კომპანიაში მოელიან, რომ EPS $5.30-$5.36-ს მიაღწევს (წინა პროგნოზი — $5.15-$5.26).
Ross Stores-ის აქციების ამჟამინდელი ფასი დაახლოებით $129.00-ს შეადგენს. ამ ეტაპზე კომპანიას უოლ სტრიტის 18 ანალიტიკოსი აფასებს. საშუალო სამიზნე ფასი $136.73-ს შეადგენს, მაქსიმალური პროგნოზი — $147.00-ს, ხოლო მინიმალური — $112.00-ს. საშუალო სამიზნე ფასი Ross Stores-ის აქციების ამჟამინდელი ფასიდან დაახლოებით 6%-იან ზრდას გულისხმობს. კომპანიის აქციებს ამ 18 ანალიტიკოსიდან 15-მა მიანიჭა ყიდვის რეკომენდაცია, 3-მა — ნეიტრალური რეიტინგი, და არცერთმა — გაყიდვის რეკომენდაცია.
[1] Comps — ფინანსური მეტრიკა, რომელსაც საცალო ინდუსტრიის კომპანიები იყენებს, რათა შეაფასოს გაყიდვების მთლიანი მოცულობა კომპანიის ლოკაციებზე, რომლებიც ერთი წლის ან მეტი ხნის განმავლობაში ფუნქციონირებს.
