პიტერ ლინჩი ლეგენდარული ამერიკელი ინვესტორია, რომელმაც საინვესტიციო სამყაროში დიდ წარმატებას მიაღწია. 1977-1990 წლებში ის ცნობილი ერთობლივი საინვესტიციო ფონდის — Magellan Fund-ის მენეჯერი იყო და მისი მმართველობის 13-წლიანი პერიოდის განმავლობაში ფონდის საშუალო წლიურმა ანაზღაურებამ 29.2% შეადგინა, რაც შესანიშნავი შედეგია.
გარდა ამისა, პიტერ ლინჩი რამდენიმე ყველაზე გაყიდვადი საინვესტიციო წიგნების ავტორია. მათ შორის არის One Up on Wall Street და Beating the Street, რომლებმაც ინვესტორს დიდი წარმატება და აღიარება მოუტანა. დღეს კი, სწორედ ამ ორ წიგნზე დაყრდნობით, პიტერ ლინჩის საინვესტიციო რჩევებს შემოგთავაზებთ.
რამდენ განსხვავებულ აქციას უნდა ვფლობდეთ?
აქციების ფიქსირებულ რაოდენობაზე ნუ ფოკუსირდებით, ამის ნაცვლად, სათითაოდ გამოიკვლიეთ მათი გამომშვები კომპანიები და საინვესტიციო გადაწყვეტილებებიც ამაზე დაყრდნობით მიიღეთ. რა თქმა უნდა, მხოლოდ ერთი აქციის ფლობა არ არის უსაფრთხო, რადგან, თქვენი მცდელობის მიუხედავად, ის შეიძლება გაუთვალისწინებელი გარემოებების მსხვერპლი აღმოჩნდეს.
კონკრეტული აქციები უნდა შეიძინოთ მაშინ, თუ ის თქვენი კვლევის ყველა გამოცდას გაივლის და მასში საინტერესო პერსპექტივას აღმოაჩენთ. უცნობ კომპანიებში ინვესტირება მხოლოდ იმისთვის, რომ თქვენი საინვესტიციო პორტფელი დივერსიფიცირებული იყოს, გონივრული ნაბიჯი არ არის.
„ბაზარზე თამაში“
ადამიანები, რომლებიც აქციების შერჩევაში კარგი შედეგებით არ გამოირჩევიან სწორედ ისინი არიან, რომლებიც ამბობენ, რომ ბაზარზე თამაშობენ. ასეთი მიდგომით მოქმედებისას ადამიანს სურს მყისიერი სარგებლის მიღება, რაიმე სამუშაოს შესრულების გარეშე.
სწორედ ასეთი ადამიანების შესახებ ამბობს პიტერ ლინჩი: „საზოგადოება ფრთხილობს, როდესაც ყიდულობს სახლს, მაცივარს, მანქანას. ისინი საათობით მუშაობენ, რათა ორმხრივი ავიაბილეთისთვის $100 დაზოგონ და $5,000-ს ან $10,000-ს დააბანდებენ რაღაც სულელურ იდეაში, რომელიც ავტობუსში მოისმინეს. ეს ავანტიურაა და არა ინვესტირება. ეს არ არის კვლევა, არამედ — სრული სპეკულაცია“.
ფონდების შერჩევა
ზოგიერთი ადამიანი ფონდში ინვესტირებისას გასული წლის გამარჯვებულზე აკეთებს არჩევანს. ეს გონივრული ნაბიჯი ნამდვილად არ არის. ერთი წლის განმავლობაში ფონდის კარგი წარმადობა შეიძლება მრავალმა მოკლევადიანმა ფაქტორმა განაპირობოს, მაგალითად კონკრეტული სექტორის განსაკუთრებულმა წარმატებამ. მომავალ წელს კი შეიძლება ეს ფონდი სიის ბოლოში აღმოჩნდეს.
მომავალი გამარჯვებულების წარსული წარმადობის მიხედვით შერჩევა არ მუშაობს მაშინაც, როდესაც ორიენტირად სამ ან ხუთწლიან პერიოდებს იყენებთ.
რა თქმა უნდა, ეს იმას არ ნიშნავს, რომ ფონდის წარსულ შედეგებს ყურადღება არ უნდა მიქციოთ. თუმცა სჯობს, ფოკუსირდეთ სტაბილურ ფონდზე ნაცვლად იმისა, რომ მოკლევადიან პერიოდებში სხვადასხვა ფონდში დააბანდოთ ფული იმის იმედით, რომ „ტალღებს დაიჭერთ“.
ასევე მნიშვნელოვანია დააკვირდეთ, რა ემართება ამა თუ იმ ფონდს bear market-ის პერიოდში: 1. ზოგი მცირდება უფრო მეტად, ვიდრე სხვები, მაგრამ აღდგენის პერიოდში უფრო მეტი ზრდით ხასიათდება; 2. ზოგი უფრო ნაკლებად კლებულობს, მაგრამ აღდგენისას ასევე მცირედით იზრდება; 3. ზოგი კი მნიშვნელოვნად მცირდება, ხოლო ბაზრის აღდგენის ფაზაში ნაკლები ზრდით ხასიათდება. უნდა მოვერიდოთ იმ ფონდებს, რომლებიც ამ უკანასკნელ ჯგუფს მიეკუთვნება.
ეს არ არის ფინანსური რჩევა. ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა, გამოიწვიოს არსებითი დანაკარგები, ისევე როგორც – მოგება. ამიტომ, დეტალურად უნდა გააანალიზოთ, რამდენად მისაღებია ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა, აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.
