გუშინ, სავაჭრო დღის დასრულების შემდეგ, Nvidia-მ მოსალოდნელზე ძლიერი კვარტალური შედეგები გამოაქვეყნა, რადგან, ხელოვნურ ინტელექტზე (AI) არსებული მზარდი მოთხოვნის ფონზე, მონაცემთა ცენტრების გაყიდვებმა რეკორდულად მოიმატა. „After-hours”1 ვაჭრობაში კი ჩიპების მწარმოებელი გიგანტის აქციების ფასი 6%-ით გაიზარდა. წლის დასაწყისიდან ეს მაჩვენებელი დაახლოებით 97%-ით არის გაუმჯობესებული.
ფისკალური 2025 წლის პირველ კვარტალში Nvidia-ს შემოსავალი წლიურად სამზე მეტჯერ გაიზარდა და რეკორდულ ნიშნულს — $26.04 მილიარდს მიაღწია (ანალიტიკოსების პროგნოზი — $24.74 მილიარდი). კომპანიის მონაცემთა ცენტრების გაყიდვები, გასული წლის იმავე პერიოდთან შედარებით, 5-ჯერ — $22.6 მილიარდამდე გაიზარდა. ამ მაჩვენებელმა მოხსნა რეკორდი, რომელიც წინა კვარტალში დაფიქსირდა.
გასულ მეოთხედში Nvidia-ს წმინდა მოგებამ $14.88 მილიარდს მიაღწია, ანუ მოგება თითო განზავებულ აქციაზე (EPS) $5.98 იყო (ანალიტიკოსების პროგნოზი — $5.19). ეს მაჩვენებლები საგრძნობლად აღემატება გასული წლის იმავე კვარტალში დაფიქსირებულ შედეგებს, რომლებიც, შესაბამისად, $2.04 მილიარდს და $0.82-ს შეადგენდა.
| მაჩვენებელი | ფისკალური 2025 წლის I კვ. | ანალიტიკოსების პროგნოზები | ფისკალური 2024 წლის I კვ. |
| შემოსავალი | $26.04 მილიარდი | $24.74 მილიარდი | $7.19 მილიარდი |
| განზავებული EPS | $5.98 | $5.19 | $0.82 |
| წმინდა მოგება | $14.88 მილიარდი | $12.91 მილიარდი | $2.04 მილიარდი |
გარდა რეკორდული ფინანსური მაჩვენებლების გამოქვეყნებისა, Nvidia-ს მენეჯმენტმა დააანონსა აქციების დაყოფა 1/10 პროპორციით. ეს იმას ნიშნავს, რომ აქციონერები დამატებით 9 აქციას მიიღებენ თითოეული აქციისთვის, რომელიც დაყოფამდე ჰქონდათ. ჩიპების მწარმოებელი კომპანიის მენეჯმენტმა განაცხადა, რომ აქციების დაყოფა ხელს შეუწყობს მათ ხელმისაწვდომობას თანამშრომლებისთვის და ინვესტორებისთვის.
ის ინვესტორები, რომლებიც 6 ივნისის მდგომარეობით Nvidia-ს აქციონერთა შორის იქნებიან, პარასკევს, 7 ივნისს, სავაჭრო დღის დასრულების შემდეგ, კომპანიის დამატებით 9 ჩვეულებრივ აქციას მიიღებენ. უკვე დაყოფილი აქციები საფონდო ბირჟა ხელმისაწვდომი 10 ივნისიდან იქნება.
გარდა ამისა, Nvidia-ს მენეჯმენტმა კვარტალური დივიდენდის $0.04-დან $0.10-მდე გაზრდა დააანონსა.
„მორიგი ინდუსტრიული რევოლუცია დაიწყო — კომპანიები და ქვეყნები თანამშრომლობენ NVIDIA-სთან, რათა ტრილიონი დოლარის ღირებულების ტრადიციული მონაცემთა ცენტრები დაჩქარებული გამოთვლებით ჩაანაცვლონ და ააშენონ ახალი ტიპის AI ქარხნები, რათა აწარმოონ ახალი საქონელი: ხელოვნური ინტელექტი“ — განაცხადა Nvidia-ს აღმასრულებელმა დირექტორმა, ჯენსენ ჰუანგმა.
როგორ აფასებენ ანალიტიკოსები Nvidia-ს აქციებს?
Nvidia-ს აქციების ამჟამინდელი ფასი დაახლოებით $949.00-ს შეადგენს. კომპანიას ამ ეტაპზე უოლ სტრიტის 37 ანალიტიკოსი აფასებს. საშუალო სამიზნე ფასი $1,077-ს შეადგენს, მაქსიმალური პროგნოზი — $1,400.00-ს, ხოლო მინიმალური — $850.00-ს. საშუალო სამიზნე ფასი Nvidia-ს აქციების ამჟამინდელი ფასიდან დაახლოებით 13%-იან ზრდას გულისხმობს. კომპანიის აქციებს 37 ანალიტიკოსიდან 36-მა მიანიჭა ყიდვის რეკომენდაცია, 1-მა — ნეიტრალური რეიტინგი და არცერთმა — გაყიდვის რეკომენდაცია.
Nvidia-ს აქციების შეძენა საქართველოს ბანკის მობილბანკში შეგიძლიათ ბმულზე.
