როგორც Nvidia-ს, ასევე, Advanced Micro Devices-ის (AMD) მენეჯმენტმა ოთხშაბათს გააკეთა განცხადება, რომ აშშ-მ მათ ფაქტობრივად აუკრძალა ჩინეთში მათი ყველაზე მოწინავე ხელოვნური ინტელექტის (AI) ჩიპების ექსპორტი. განცხადების შემდეგ, გუშინ აღმოსავლეთის დროით 1:40 საათზე აქციების ფასები, შესაბამისად, 10.6%-ით და 5.8%-ით დაეცა.
მაღალი ხარისხის ნახევარგამტარები სასიცოცხლოდ მნიშვნელოვანია ტექნოლოგიური ინოვაციებისა და ეროვნული უსაფრთხოების ინტერესებისთვის, მათ შორის AI-სთვის. როგორც ჩანს, აშშ დგამს ნაბიჯებს იმის უზრუნველსაყოფად, რომ მის ხელოვნური ინტელექტისა და მთლიან ტექნოლოგიურ შესაძლებლობებს ჩინეთმა არ გადააჭარბოს. რას ნიშნავს ეს ჩიპების მწარმოებელი წამყვანი კომპანიების აქციებისთვის?
ჩიპებზე წვდომა მთავარ საერთაშორისო საკითხად იქცა
Nvidia და AMD აწარმოებს გრაფიკული დამუშავების ერთეულებს (GPU) და ჩიპებს, რომლებიც გამოიყენება ხელოვნური ინტელექტის, ვიდეო თამაშების აპარატურის, მონაცემთა ცენტრების, მანქანური ხედვისა და სხვა აპლიკაციებისთვის. AI არის კონკურენტული ბრძოლის ძირითადი ველი ქვეყნებისა და კომპანიებისთვის. ნახევარგამტარებზე წვდომა კი ეროვნული უსაფრთხოების სულ უფრო ცენტრალურ ინტერესად იქცა.
გარდა წარმოების ბოლოდროინდელი შეზღუდვებისა და გაურკვევლობისა მოთხოვნის ფრონტზე, მარეგულირებელი ზეწოლა არის პოტენციური წინააღმდეგობა ნახევარგამტარული ინდუსტრიის წამყვანი მოთამაშეებისთვის.
AMD-ის მენეჯმენტის კომენტარების მიხედვით, კომპანია არ მოელის, რომ აკრძალვა მის წარმადობაზე არსებითად იმოქმედებს. მეორეს მხრივ, Nvidia-ს მმართველი გუნდი ბევრად უფრო მნიშვნელოვან გავლენას ხედავს და აფასებს, რომ აკრძალვამ შეიძლება კომპანიას წელს $400 მილიონი დააკარგვინოს.
თითოეული კომპანიის AI ჩიპების ექსპორტის აკრძალვა პოტენციურად ქმნის წინაპირობას სხვა მომავალი პროდუქტების ექსპორტის აკრძალვისთვის, რადგან ამ მიმართულებით აშშ ეყრდნობა რისკს, რომ კომპანიების პროდუქტები შეიძლება ჩინეთში სამხედრო მიზნით იქნას გამოყენებული.
ორივე კომპანიას გააჩნია პროდუქტები და ზრდის შესაძლებლობები AI-ის მიღმა არსებულ კატეგორიებში. მიუხედავად ამისა, ხელოვნურ ინტელექტთან დაკავშირებული ჩიპები ამ კომპანიებისთვის ზრდის მნიშვნელოვანი ფაქტორია. AI ჯერ კიდევ შედარებით ახალგაზრდა ტექნოლოგიაა და შესაძლებელია, რომ ადრეული მიღწევები გრძელვადიან კონკურენტულ უპირატესობაში გადაიზარდოს, როდესაც საქმე ეხება ეროვნულ თავდაცვას, მეთვალყურეობას და ეკონომიკურ პოზიციონირებას მსოფლიო ასპარეზზე. აშშ-ის მთავრობის ნაბიჯები, შეაჩერონ Nvidia-სა და AMD-ის ჩიპების ექსპორტი ამ ტექნოლოგიების მნიშვნელობაზე მეტყველებს.
ქმნის თუ არა ბოლო მასიური გაყიდვები ინვესტირების შესაძლებლობას?
Nvidia-ს აქციების ფასი ახლა ყველა დროის მაქსიმალური მაჩვენებლიდან დაახლოებით 57.5%-ით არის შემცირებული, ხოლო AMD-ის აქციების ფასმა მაქსიმუმიდან დაახლოებით 49.5%-ით არის შემცირდა. მისი საბაზრო კაპიტალიზაცია $127 მილიარდს შეადგენს, ხოლო ფორვარდული P/E – 18-ს. Nvidia-ს საბაზრო კაპიტალი $322 მილიარდად არის შეფასებული, ხოლო ფორვარდული P/E 39-ს შეადგენს.
მიუხედავად იმისა, რომ ნახევარგამტარული კომპანიების უახლოესი პერსპექტივა შეიძლება გაურკვეველი იყოს, გრძელვადიანი მოთხოვნის პერსპექტივა კვლავ იმედისმომცემია. ინვესტორებს მოუწევთ აწონ-დაწონონ, რა დონის ცვალებადობისა და რისკის აღება სურთ საკუთარ თავზე.
გარდა წარმოებისა და მარეგულირებელი შეზღუდვებისა, შესაძლებელია, რომ ეკონომიკურმა შენელებამ ჩიპებზე მოთხოვნა დააზარალოს – გამოიწვიოს უფრო სუსტი გაყიდვები და მოგება. ნახევარგამტარების ინდუსტრია ისტორიულად, უაღრესად ციკლური იყო. ეს რეალობა გარკვეულწილად იცვლება, რადგან ჩიპები უფრო მეტად ინტეგრირდება პროდუქციის ფართო სპექტრში და ტექნოლოგიური ტენდენციები, მათ შორის AI და მონაცემთა ცენტრების ზრდა, მოთხოვნას ზრდის. მაგრამ როგორც ჩანს, მოკლევადიან პერსპექტივაში შეიძლება ყველაფერი გართულდეს.
იმ ინვესტორებისთვის, რომლებიც ნახევარგამტარული ინდუსტრიის დადებით გრძელვადიან პერსპექტივას ხედავენ, Nvidia და AMD წამყვანი მოთამაშეები არიან სივრცეში, რომელსაც გრძელვადიან პერსპექტივაში ძლიერი წარმადობის უზრუნველყოფა შეუძლია. ბოლო დროის მასიურმა გაყიდვებმა შეიძლება ამ კომპანიებში ინვესტირებისთვის ღირებული შესაძლებლობები შექმნას.
თუმცა, ინვესტორებმა უნდა გააცნობიერონ, რომ, შესაძლოა, ამ მზარდი პოტენციალის აქციებმა, ინდუსტრიის სპეციფიკურ მოვლენებთან და ფართო ბაზრის იმპულსთან ერთად, რყევები განიცადოს.
