გუშინ, ბაზრის გახსნამდე, Macy’s-მა მოსალოდნელზე ძლიერი კვარტალური ანგარიში წარადგინა. სავაჭრო დღის განმავლობაში კი უნივერსალური მაღაზიების ქსელის აქციების ფასი დაახლოებით 6%-ით გაიზარდა. წლის დასაწყისიდან ეს მაჩვენებელი თითქმის 34%-ით არის შემცირებული.
Macy’s-მა მოახერხა ანალიტიკოსების მოლოდინების გადაჭარბება, რადგან კომპანიის მარჟები გაუმჯობესდა, ამასთან შემცირდა ხარჯები და მარაგები.
ფისკალური 2023 წლის მესამე კვარტალში საცალო ვაჭრობის კომპანიის შემოსავალი წლიდან წლამდე 7%-ით გაიზარდა და $4.86 შეადგინა, ხოლო კორექტირებულმა EPS-მა (მოგება თითო აქციაზე) $0.21-ს მიაღწია. ორივე მაჩვენებელმა გადააჭარბა უოლ სტრიტის ანალიტიკოსების პროგნოზებს, რომლებიც, შესაბამისად, ასეთი იყო: შემოსავალი — $4.79 მილიარდი; კორექტირებული EPS — -$0.0005.
გარდა ამისა, GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით გამოთვლილმა EPS-მა $0.15 შეადგინა და ამ მაჩვენებელმა ანალიტიკოსების მოლოდინს $0.13-ით გადააჭარბა.
აღსანიშნავია, რომ Macy’s-ის მთლიანი მოგების მარჟა 160 საბაზისო პუნქტით (bps) — 40.3%-მდე გაიზარდა, საქონლის მთლიანმა მარჟამ კი 110 bps-ით მოიმატა Macy’s-ის ბრენდის ფასების მცირე კლებისა და ტვირთების გადაზიდვის ხარჯების შემცირების გამო.
გარდა ამისა, კომპანიამ გაყიდვების, ზოგადი და ადმინისტრაციული ხარჯები $48 მილიონით — $2 მილიარდამდე შეამცირა, რაც მიმდინარე ხარჯების დისციპლინაზე მიუთითებს.
ამასთან, Macy’s-მ მარაგები 6%-ით შეამცირა, აღმასრულებელმა დირექტორმა — ტონი სპრინგმა კი აღნიშნა, რომ კომპანია სადღესასწაულო პერიოდს მარაგების ჯანსაღი დონით იწყებს.
რაც შეეხება მომავალს, Macy’s-ის მენეჯმენტი მოელის, რომ მთელი წლის განმავლობაში კომპანიის გაყიდვები $22.9-$23.2 მილიარდს მიაღწევს, ხოლო EPS — $2.88-$3.13-ს. ეს დიაპაზონები აღემატება წინა პროგნოზებს, რომლებიც, შესაბამისად, $22.8-$23.2 მილიარდს და $2.70-$3.20-ს შეადგენდა.
Macy’s-ის აქციების ამჟამინდელი ფასი დაახლოებით $13.00-ს შეადგენს. ამ ეტაპზე კომპანიას უოლ სტრიტის 15 ანალიტიკოსი აფასებს. საშუალო სამიზნე ფასი $14.46-ს შეადგენს, მაქსიმალური პროგნოზი — $19.00-ს, ხოლო მინიმალური — $10.00-ს. საშუალო სამიზნე ფასი Macy’s-ის აქციების ამჟამინდელი ფასიდან დაახლოებით 8.5%-იან ზრდას გულისხმობს. კომპანიის აქციებს ამ 15 ანალიტიკოსიდან 5-მა მიანიჭა ყიდვის რეკომენდაცია, 8-მ — ნეიტრალური რეიტინგ, ხოლო 2-მა — გაყიდვის რეკომენდაცია.
