S&P Global Market Intelligence-ის მონაცემების მიხედვით, გასული თვის განმავლობაში Meta Platforms-ის აქციების ფასი 25.6%-ით გაიზარდა. აღმავალი სვლის უმეტესი ნაწილი დაფიქსირდა 2 თებერვალს, მას შემდეგ, რაც კომპანიამ 2023 წლის მეოთხე კვარტლის ფინანსური შედეგები გამოაქვეყნა და პირველი კვარტალური დივიდენდი დააანონსა.
გასული წლის დასაწყისში Meta Platforms-ის თანადამფუძნებელმა და აღმასრულებელმა დირექტორმა — მარკ ცუკერბერგმა 2023-ს „ეფექტიანობის წელი“ უწოდა, რითაც ხაზი გაუსვა, რომ მთავარი მიზანი კომპანიის მომგებიანობის გაუმჯობესება იყო. მართლაც, 2023 წელს Meta-ს წმინდა მოგებამ $39 მილიარდს გადააჭარბა, ხოლო წმინდა მოგების მარჟამ 29% შეადგინა. გარდა ამისა, გასულ წელს კომპანიის შემოსავალი 16%-ით გაუმჯობესდა.
მოგება და ზარალი
ასეთი ეფექტიანი წლის წყალობით, Meta აჯილდოებს აქციონერებს უფრო მეტად, ვიდრე — ოდესმე. კომპანია უფლებამოსილია, მენეჯმენტის შეხედულებისამებრ $80 მილიარდზე მეტის ღირებულების აქცია გამოისყიდოს. ამასთან, Meta 26 მარტს გადაიხდის პირველ კვარტალურ დივიდენდს, რომელიც თითო აქციაზე $0.50-ს შეადგენს.
როგორც Meta-ს უმსხვილესი აქციონერი, მარკ ცუკერბერგი ამ გადაწყვეტილებით ყველაზე მოგებული დარჩება — მოსალოდნელია, რომ კომპანიიდან მისი წლიური დივიდენდური შემოსავალი დაახლოებით $700 მილიონს მიაღწევს.
გარდა ამისა, აღსანიშნავია, რომ 2024 წლის იანვრის მონაცემებით, Meta Platforms-ის Facebook-ს, მსოფლიოს სხვა სოციალურ ქსელებთან შედარებით, ყველაზე მეტი ყოველთვიური აქტიური მომხმარებელი (MAU) ჰყავდა.
Meta მოგების გარკვეულ ნაწილს თავის აქციონერებს უნაწილებს, რაც კარგია. თუმცა ისიც უნდა აღინიშნოს, რომ გასულ წელს კომპანიამ Reality Labs-ის ბიზნეს სეგმენტში $16 მილიარდის მოცულობის საოპერაციო ზარალი დააფიქსირა. Meta-ს ამ მიმართულების მიზანია, კომპანიის მეტავერსული მისწრაფებები განავითაროს.
რას უნდა ველოდეთ მომავალში?
რაც შეეხება მომავალს, Meta Platforms-ის მენეჯმენტი მოელის, რომ 2024 წლის პირველ კვარტალში კომპანიის შემოსავალი მინიმუმ 20%-ით გაუმჯობესდება. ასეთი დიდი კომპანიისთვის ეს ძალიან მნიშვნელოვანი მაჩვენებელია.
რა თქმა უნდა, Meta-ში 2024 წლისთვის ხარჯების დიდ ზრდასაც მოელიან. კომპანიის მენეჯმენტმა განაცხადა, რომ კონკრეტულად Reality Labs-ის ბიზნეს სეგმენტთან დაკავშირებული ზარალი მნიშვნელოვნად გაიზრდება.
ანალიტიკოსების შეფასებები
Meta Platforms-ის აქციების ამჟამინდელი ფასი დაახლოებით $496.00-ს შეადგენს. კომპანიას ამ ეტაპზე 43 ანალიტიკოსი აფასებს. საშუალო სამიზნე ფასი $528.80-ს შეადგენს, მაქსიმალური პროგნოზი — $575.00-ს, ხოლო მინიმალური — $430.00-ს. საშუალო სამიზნე ფასი Meta Platforms-ის აქციების ამჟამინდელი ფასიდან დაახლოებით 6.6%-იან ზრდას გულისხმობს. კომპანიის აქციებს 43 ანალიტიკოსიდან 40-მა მიანიჭა ყიდვის რეკომენდაცია, 2-მა — ნეიტრალური რეიტინგი, ხოლო 1-მა — გაყიდვის რეკომენდაცია.
Meta Platforms-ის აქციების შეძენა საქართველოს ბანკის მობილბანკში შეგიძლიათ ბმულზე.
