როგორ დავძლიოთ ინვესტირების შიში?

საფონდო ბირჟაზე ინვესტირება შეიძლება შესანიშნავი გზა იყოს დროთა განმავლობაში სიმდიდრის დასაგროვებლად, მაგრამ ბევრ დამწყებში უცნობის შიში სრულ უმოქმედობას იწვევს. ბაზრის არასტაბილურ პირობებში რთულად გამომუშავებული ფულის დაბანდების იდეამ შეიძლება ადამიანში შფოთვისა და გაურკვევლობის ემოციები გამოიწვიოს. თუმცა სწორი მიდგომით ნებისმიერს შეუძლია, დაძლიოს ინვესტირების შიში და საინვესტიციო სამყაროს თავდაჯერებული წევრი გახდეს.

იზრუნეთ ცოდნის დაგროვებაზე

ცოდნა შიშის ანტიდოტია. სანამ ინვესტიციების სამყაროში გადაეშვებით, დაუთმეთ დრო იმის შესწავლას, თუ როგორ მუშაობს საფონდო ბირჟა, რა სახის საინვესტიციო პროდუქტები ან სტრატეგიები არსებობს და ა. შ. დღესდღეობით ნებისმიერი მსურველისთვის ხელმისაწვდომია უამრავი რესურსი, დაწყებული წიგნებით და ონლაინ კურსებით, დასრულებული ფინანსური ახალი ამბების ვებგვერდებით და თემატური პოდკასტებით. ინვესტირების საფუძვლების დაუფლება დაგეხმარებათ პროცესის უკეთ გააზრებაში, უფრო თავდაჯერებულად მოქმედებაში და ინფორმირებული გადაწყვეტილებების მიღებაში.

დაიწყეთ პატარა ნაბიჯებით

შიშის დაძლევის ერთ-ერთი საუკეთესო გზა პატარა, მართვადი ნაბიჯების გადადგმაა. დაიწყეთ მცირე თანხის ინვესტირებით, რომლის დაკარგვაც ფინანსურ დაძაბულობას არ შეგიქმნით. ეს შეიძლება გულისხმობდეს უბრალოდ საბროკერო ანგარიშის გახსნას და, მაგალითად, S&P 500-ის საინდექსო ფონდში ინვესტირებას, რაც მყისიერი დივერსიფიკაციით უზრუნველგყოფთ. პატარა ნაბიჯებით დაწყება საშუალებას მოგცემთ, საფონდო ბირჟაზე აღმოჩნდეთ ისე, რომ დიდი რისკი არ გაწიოთ, ამასთან, თანდათან ისწავლოთ და პრაქტიკაში გამოცდილება დააგროვოთ.

მიმართეთ დივერსიფიკაციას

დივერსიფიკაცია ინვესტირებაში რისკის მართვის საკვანძო სტრატეგიას წარმოადგენს. საინვესტიციო თანხის სხვადასხვა აქტივთა კლასზე, ინდუსტრიებსა და გეოგრაფიულ რეგიონზე გადანაწილებით შეგიძლიათ, მთელ საინვესტიციო პორტფელზე ერთი ინვესტიციის სუსტი წარმადობის ნეგატიური ეფექტი შეამციროთ. დივერსიფიკაცია ხელს უწყობს არასტაბილურობის აღმოფხვრას და ბაზრის ვარდნის პერიოდში თქვენი პორტფელის დაცვას. განიხილეთ აქციების, ობლიგაციების, უძრავი ქონების და სხვა აქტივების ნაზავში ინვესტირება, რათა კარგად დივერსიფიცირებული საინვესტიციო პორტფელი შექმნათ.

დაადგინეთ მკაფიო მიზნები და სტრატეგია

საფონდო ბირჟაზე შებიჯებამდე აუცილებელია საინვესტიციო მიზნების განსაზღვრა და მათ მისაღწევად მკაფიო სტრატეგიის შემუშავება. დაფიქრდით, რისთვის გსურთ ინვესტირება — პენსიაზე მშვიდად გასასვლელად, სახლის შესაძენად, თუ პასიური შემოსავლის გამოსამუშავებლად. მიზნის დადგენის შემდეგ, შექმენით გეგმა, რომელშიც ასახულია, თუ როგორ გაანაწილებთ აქტივებს, რა მოცულობის ინვესტიციას განახორციელებთ რეგულარულად და რა კრიტერიუმებს გამოიყენებთ პოტენციური ინვესტიციების შესაფასებლად. გეგმის არსებობა მიმართულებით და საინვესტიციო გადაწყვეტილებების მიღებისას თავდაჯერებულად უზრუნველგყოფთ.

ფოკუსირდით გრძელვადიან პერსპექტივაზე

მოკლევადიან პერსპექტივაში შეიძლება საფონდო ბირჟა არაპროგნოზირებადი იყოს, მაგრამ, ისტორიულად, გრძელვადიან პერიოდში ის ინვესტორებს სოლიდური შემოსავლით უზრუნველყოფს. ამიტომ, ბაზარზე შესვლისთვის იდეალური დროის გამოცნობის და მოკლევადიანი მოგების დევნის ნაცვლად, თქვენი ინვესტიციების გრძელვადიან პოტენციალზე ფოკუსირდით. შეინარჩუნეთ მოთმინება და წინააღმდეგობა გაუწიეთ ბაზრის რყევებზე იმპულსურად რეაგირების სურვილს. დარჩით თქვენი საინვესტიციო გეგმის ერთგული და გჯეროდეთ, რომ დროთა განმავლობაში თქვენი დისციპლინირებული მიდგომა ანაზღაურდება.

აკონტროლეთ ემოციები

ინვესტირებაში არაფერი უნდა იყოს ემოციური. მიუხედავად იმისა, რომ მოგებისა და ზარალის მიღება მღელვარების ან შიშის გარეშე რთულია, თქვენ მიერ მიღებული გადაწყვეტილებები მათ არ უნდა ეყრდნობოდეს. ამ პროცესიდან ემოციების გამორიცხვა საშუალებას მოგცემთ, შეინარჩუნოთ არჩეული კურსი მაშინ, როდესაც ბაზარზე მოკლევადიან დადებით ან უარყოფით მოვლენებს აქვს ადგილი.

მოიძიეთ რჩევები პროფესიონალებისგან

ინვესტირების დაწყებამდე პროფესიონალური რჩევების მოძიება შეიძლება გონივრული გადაწყვეტილება იყოს შიშების დასაძლევად, განსაკუთრებით იმ შემთხვევაში, თუ კომპლექსური ფინანსური მიზნები გაქვთ. ფინანსურ მრჩევლებს შეუძლიათ მოგაწოდონ საჭირო ინფორმაცია და პერსონალიზებული სტრატეგიები, რომლებიც ინფორმირებული ფინანსური გადაწყვეტილებების მიღებაში დაგეხმარებათ.