გუშინ, ბაზრის გახსნამდე, Dick’s Sporting Goods-მა მოსალოდნელზე ძლიერი კვარტალური ანგარიში წარადგინა. სავაჭრო დღის განმავლობაში კი სპორტული საქონლის საცალო მოვაჭრის აქციების ფასი 2%-ზე მეტით გაიზარდა. წლის დასაწყისიდან ეს მაჩვენებელი თითქმის უცვლელია — დაახლოებით 1%-ით არის გაუმჯობესებული.
ფისკალურ პირველ კვარტალში, რომელიც 28 ოქტომბერს დასრულდა, Dick’s Sporting Goods-ის შემოსავალმა $3.04-ს მიაღწია (ანალიტიკოსების პროგნოზი — $2.95 მილიარდი), ხოლო კორექტირებულმა EPS-მა (მოგება თითო აქციაზე) $2.85 შეადგინა (უოლ სტრიტის პროგნოზი — $2.46). GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით გამოთვლილმა EPS-მა კი $2.39-ს მიაღწია და ეს მაჩვენებელი ანალიტიკოსების პროგნოზს $0.04-ით ჩამორჩა.
კომპანიის ერთი და იმავე ლოკაციების გაყიდვები1, გასული წლის იმავე კვარტალთან შედარებით, 1.7%-ით გაიზარდა, ნაწილობრივ ტრანზაქციების მატების გამო. სხვა სიტყვებით რომ ვთქვათ, ადამიანები კვლავ ყიდულობენ სპორტულ საქონელს და მასთან დაკავშირებულ პროდუქტებს, მიუხედავად წლევანდელი რთული ეკონომიკური პირობებისა.
მესამე კვარტალში Dick’s Sporting Goods-ის საოპერაციო მოგების მარჟა დაახლოებით 9%-მდე შემცირდა. გასული წლის იმავე მეოთხედში ეს მაჩვენებელი 11%-ს შეადგენდა. თუმცა 9%-იანი საოპერაციო მარჟა კომპანიისთვის ისტორიულად მაინც საკმაოდ კარგი შედეგია. უფრო მეტიც, Dick’s Sporting Goods ახლა ხარჯებს განიცდის ბიზნესის ოპტიმიზაციის მიმართულებით, ეს კი კომპანიის შემოსავალს აზარალებს.
გარდა ამისა, აქციების ფასის ვარდნის შემდეგ, რომელიც Dick’s Sporting Goods-ის მეორე კვარტლის ანგარიშს მოჰყვა, მენეჯმენტმა 3.5 მილიონი აქცია გამოისყიდა. გასული მეოთხედის განმავლობაში კომპანიის მიერ გამოსყიდული აქციების რაოდენობამ ჯამში 388 მილიონს მიაღწია.
რაც შეეხება მომავალს, მენეჯმენტი მოელის, რომ მთელი ფისკალური წლის განმავლობაში გაყიდვები ოდნავ გაიზრდება იმ რეკორდულ მაჩვენებელთან შედარებით, რომელიც გასულ წელს დაფიქსირდა. Dick’s Sporting Goods-ის წარმომადგენლები ასევე პროგნოზირებენ, რომ EPS $11.45-$12.05-ს მიაღწევს, რაც მინიმუმ 6%-იანი ზრდა იქნება.
Dick’s Sporting Goods-ის აქციების ამჟამინდელი ფასი დაახლოებით $122.00-ს შეადგენს. კომპანიას ამ ეტაპზე 18 ანალიტიკოსი აფასებს. საშუალო სამიზნე ფასი $129.47-ს შეადგენს, მაქსიმალური პროგნოზი — $150.00-ს, ხოლო მინიმალური — $106.00-ს. საშუალო სამიზნე ფასი Dick’s Sporting Goods-ის აქციების ამჟამინდელი ფასიდან დაახლოებით 6.5%-იან ზრდას გულისხმობს. კომპანიის აქციებს 18 ანალიტიკოსიდან 8-მ მიანიჭა ყიდვის რეკომენდაცია, 10-მა — ნეიტრალური რეიტინგი და არცერთმა — გაყიდვის რეკომენდაცია.
[1] Comps — ფინანსური მეტრიკა, რომელსაც საცალო ინდუსტრიის კომპანიები იყენებს, რათა შეაფასოს გაყიდვების მთლიანი მოცულობა კომპანიის ლოკაციებზე, რომლებიც ერთი წლის ან მეტი ხნის განმავლობაში ფუნქციონირებს.
