Apple და Microsoft ტექნოლოგიური ინდუსტრიის ორი ტიტანი და მსოფლიოში ორი უდიდესი კომპანიაა. მაშინ, როდესაც Microsoft შემოსავლის უმეტეს ნაწილს პროგრამული უზრუნველყოფის ბიზნესებიდან გამოიმუშავებს, Apple-ის მთავარი მამოძრავებელი ძალა მობილური აპარატურის პროდუქტება. ამ მსხვილი ტექნოლოგიური ლიდერებიდან რომელში ინვესტირებაა ახლა უკეთესი?
Apple ათწლეულების განმავლობაში ნერგავს ინოვაციებს
Apple მსოფლიოში ერთ-ერთი ყველაზე გამორჩეული ბიზნესია. მან ამ სტატუსს ინოვაციური პროდუქტების (iPhone, iPod, iPad, Apple Watch და AirPods) შექმნით მიაღწია. ინოვაციების ეს ისტორია Apple-ში ინვესტირების ერთ-ერთი მთავარი მიზეზია. ეს ნაკლებად მომგებიანი აქცია იქნებოდა, თუ მის პოპულარობას მხოლოდ iPhone განსაზღვრავდა, თუმცა მრავალი პროდუქტის მილიარდობით გაყიდვები კიდევ ერთხელ უსვამს ხაზს კომპანიის სიძლიერეს.
სწორედ ეს დაეხმარა Apple-ს 2012 წლიდან 2021 წლამდე შემოსავალი $156 მილიარდიდან $366 მილიარდამდე გაეზარდა. მომხმარებლებს იმდენად სურთ კომპანიის პროდუქტი, რომ მან ამ პერიოდში საოპერაციო შემოსავალი $55 მილიარდიდან $109 მილიარდამდე გაზარდა. აქციონერებისთვის დამატებითი სარგებელი არის ის, რომ Apple-მა ძალიან მიმზიდველი ეკოსისტემა ჩამოაყალიბა. ნაკლებად სავარაუდოა, რომ iPhone-ის მომხმარებლები სხვა ბრენდზე გადაერთონ.
Apple-ის აქციების ყიდვამდე ყოყმანის ერთ-ერთი მიზეზი არის აქციების მაღალი შეფასება – P/E კოეფიციენტი 28.6-ს შეადგენს, ხოლო P/FCF (ფასი/თავისუფალი ფულადი ნაკადები) კოეფიციენტი – 26.5-ს. მიუხედავად ამისა, ამ კომპანიას შეუძლია გრძელვადიან პერსპექტივაში ინვესტორებს დიდი სარგებელი მოუტანოს.
Microsoft: პროგრამული უზრუნველყოფის გიგანტი მომავლისთვის არის შექმნილი
Apple-ის ტექნოლოგიური ბიზნესი, ასოცირებული პროგრამული ეკოსისტემა და ბრენდის სიძლიერე უდავოდ ფანტასტიკურია, მაგრამ, შესაძლოა, გრძელვადიან პერსპექტივაში Microsoft უფრო მიმზიდველი იყოს. ქლაუდ გამოთვლებზე დაფუძნებული აპლიკაციებისა და სერვისების ზრდა ჯერ კიდევ ახლა იწყება, Microsoft კი მზად არის ამით ისარგებლოს.
Microsoft-ის Azure ქლაუდ ინფრასტრუქტურის სერვისი არის ერთ-ერთი უდიდესი და მომგებიანი შეთავაზება ამ კატეგორიაში და მას გრძელვადიან პერსპექტივაში უდიდესი პოტენციალი გააჩნია. მიუხედავად გარკვეულწილად რთული მაკროეკონომიკური ფონისა, Microsoft-ის მენეჯმენტმა განაცხადა, რომ გასულ კვარტალში კომპანიამ ახალი კონტრაქტების რეკორდული რაოდენობა გააფორმა – $100 მილიონზე მეტი.
ქლაუდ ინფრასტრუქტურა არის სეკულარული მზარდი ბაზარი და Azure-ის ძლიერი მხარეები Microsoft-ს გრძელვადიანი გაფართოების პოტენციალს სძენს. ციფრული ტრანსფორმაციის ინიციატივებისა და ქლაუდ სივრცეში მიგრაციის მიმართულებით ხარჯვა კვლავ გაგრძელდება მაშინაც კი, თუ უახლოეს პერსპექტივაში ეკონომიკური პირობები არახელსაყრელი იქნება და, შესაძლოა, ეს დინამიკა, დღევანდელი ფასების გათვალისწინებით, Microsoft-ს Apple-თან შედარებით უპირატესობას ანიჭებდეს.
Apple-მა მობილურ აპარატურაზე ფანტასტიკური მარჟების გენერირება შეძლო და მისი მომხმარებელთა ბაზა, Alphabet-ის Android-ის ოპერაციული სისტემის მომხმარებლებთან შედარებით, გაცილებით მეტს ხარჯავს აპლიკაციების შესყიდვებზე. თუმცა, ტექნიკის გაყიდვებზე დიდმა დამოკიდებულებამ, შესაძლოა, შემდგომში კომპანიის ზრდა გაართულოს – განსაკუთრებით, თუ ახალი პროდუქტების კატეგორიებში განშტოების მცდელობები წარმატებული არ იქნება.
რომელ ტექნოლოგიურ გიგანტში უნდა ჩადოთ ინვესტიცია დღეს?
ინვესტორებისთვის, რომლებიც ტექნოლოგიური სექტორის გრძელვადიან ზრდაში დარწმუნებულნი არიან, ინვესტირება როგორც Microsoft-ში, ასევე, Apple-ში შეიძლება სწორი გადაწყვეტილება იყოს. წინააღმდეგ შემთხვევაში, არჩევანი ორ ტექნოლოგიურ გიგანტს შორის დამოკიდებული უნდა იყოს იმაზე, თუ რომელი კომპანიის შესაბამისი პროდუქტის შეთავაზება და ზრდის შესაძლებლობები არის უფრო ძლიერი.
თუ აპირებთ, რომ ქლაუდ ინფრასტრუქტურის ევოლუციით და პროდუქტიულობის პროგრამული სერვისებით ისარგებლოთ, Microsoft, ალბათ, უკეთესი არჩევანია. თუმცა, თუ Apple-ის მაღალი მარჟის მქონე აპარატურის, ასევე, განვითარებადი პროგრამული უზრუნველყოფისა და სერვისების ეკოსისტემაში უფრო დიდ მომავალს ხედავთ, Apple-ის აქციები აშკარად კარგი შენაძენი იქნება თქვენი საინვესტიციო პორტფელისთვის.
