ჯერ კიდევ მარტში ელექტრონული კომერციის გიგანტმა – Amazon-მა აქციების 1/20-თან შეფარდებით დაყოფის შესახებ გამოაცხადა, აქციონერებმა კი მაისში კომპანიის ამ ნაბიჯის დამტკიცების სასარგებლოდ მისცეს ხმა. დაყოფა უკვე ოფიციალურად შევიდა ძალაში, მაგრამ რა შეიცვალა რეალურად?
ამაზონის თითოეული აქცია 20 ტოლ ნაწილად დაიყო, შესაბამისად აქციების ფასიც პროპორციულად შემცირდა. დაყოფამდე, გასულ პარასკევს ამაზონის თითო აქციის ფასი $2447-ს შეადგენდა, ამიტომ ამ რიცხვის 20-ზე გაყოფა ნიშნავს, რომ აქციის ახალი ფასი $122.35-ს შეადგენს. მაგრამ ამაზონის საბაზრო ღირებულება იგივე დარჩა – $1.2 ტრილიონი, რაც აქციების დაყოფის პროცესს მთლიანად კოსმეტიკურს ხდის.
კომპანიები, როგორიც არის Amazon, ასე იმიტომ იქცევიან, რომ მათი აქციები მცირე ინვესტორებისთვის უფრო ხელმისაწვდომი გახდეს.
მრავალფეროვან ბიზნესში წარმატების პოვნა
Amazon 1994 წელს დაარსდა ჯეფ ბეზოსის მიერ, რომელმაც გადაწყვიტა წიგნების ონლაინ გაყიდვისთვის ელექტრონული კომერციის კონცეფცია გამოეყენებინა. მის იდეას დიდი სკეპტიციზმი მოჰყვა, მაგრამ 1997 წლისთვის კომპანიას 1 მილიონზე მეტი მომხმარებელი ჰყავდა და ტექნოლოგიურ კომპანიებზე ორიენტირებული Nasdaq-ის ლისტინგშიც მოხვდა. ახლა ის მსოფლიოში ყველაზე დიდი ონლაინ გამყიდველია.
ამაზონი თავის წარმატებას უნდა უმადლოდეს ახალ ბაზრებზე აგრესიული გაფართოების სტრატეგიას, რომელსაც კომპანია ახლაც ინარჩუნებს. კომპანია იმ დონემდე გაიზარდა, რომ მსოფლიოში ერთ-ერთი ყველაზე ცნობილი ინვესტორი – უორენ ბაფეტი ნანობს, რომ ადრეულ დღეებში ამაზონის აქციები არ შეიძინა. ელექტრონული კომერციის მიღმა, კომპანია ახლა, Amazon Web Services (AWS) განყოფილების მეშვეობით, ქლაუდ სერვისების მთელ ინდუსტრიაში ლიდერობს. ეს მიმართულება კომპანიის მოგების მთავარ ძრავად იქცა.
გარდა ამისა, Amazon-ს გააჩნია სარეკლამო ბიზნესი, რომელმაც 2021 წელს მსოფლიოს უდიდეს ვიდეო პლატფორმას – Alphabet-ის Youtube-ს $31 მილიარდით აჯობა. კომპანიას აქვს შესანიშნავი შესაძლებლობა, რომ თავისი სარეკლამო სეგმენტი გაზარდოს მეტი საინტერესო აქტივის საშუალებით, როგორიც არის Amazon Music და Amazon Prime-ის სტრიმინგის პლატფორმა, რომელიც ახლა NFL-ის ხუთშაბათის ღამის ფეხბურთზე ექსკლუზიურ უფლებას ფლობს. გარდა ამისა, არ უნდა უგულებელვყოთ Amazon-ის წამყვანი ვებგვერდი, რომელიც თვეში 2 მილიარდზე მეტ ნახვას აგროვებს.
ამაზონი მომავალზე ორიენტირებას აგრძელებს. 2019 წელს კომპანიამ ელექტრომობილების მწარმოებელ Rivian Automotive-ის წილი შეიძინა. შესაძლოა, ეს სეგმენტი მომავალ ათწლეულებში მრავალ ტრილიონ დოლარიან ინდუსტრიად იქცეს.
ფინანსური ძალა
Amazon-მა ბოლო 12 თვის განმავლობაში ყველა ბიზნეს ერთეულიდან $477 მილიარდზე მეტი მთლიანი შემოსავალი გამოიმუშავა და ამ პერიოდის განმავლობაში კომპანია საკმაოდ მომგებიანი იყო $41.41-ის ტოლი მოგებით თითო აქციაზე (EPS).
აქციების დაყოფიდან გამომდინარე EPS უნდა გაიყოს 20-ზე და მივიღებთ $2.07-ის ტოლ მოგებას ერთ აქციაზე, რაც აქციების უფრო მეტ რაოდენობას შეესაბამება.
მიუხედავად იმისა, რომ AWS გასული წლის მთლიანი შემოსავლის მხოლოდ 14%-ს შეადგენდა, ეს მიმართულება მთელ ოპერაციულ შემოსავალზეა პასუხისმგებელი. სინამდვილეში, AWS-ის გარეშე Amazon ამ პერიოდისთვის საოპერაციო ზარალს განიცდიდა.
მას შემდეგ, რაც AWS-ის შემოსავალი 2022 წლის პირველ კვარტალში წლიდან წლამდე 36.5%-ით გაიზარდა, ის აჭარბებს კომპანიის მთლიანი შემოსავლის ზრდას – 7.3%. ეს იმას ნიშნავს, რომ AWS დროთა განმავლობაში ამაზონის სულ უფრო დიდი ნაწილი ხდება, რაც მიუთითებს იმაზე, რომ, შესაძლოა, მომავალში კომპანია კიდევ უფრო მომგებიანი გახდეს.
შესაძლოა, აქციების დაყოფა დადებითი მოვლენა იყოს
თუ Amazon-ის აქციების შემცირებული ფასი მცირე ინვესტორებს მოიზიდავს, ეს, შეიძლება, კომპანიას ღირებულების ამაღლებაში დაეხმაროს. ეს განსაკუთრებით გამოსადეგი იქნება მიმდინარე საბაზრო გარემოში, სადაც Nasdaq-100 ინდექსი bear market-ის ტერიტორიაზეა და ყველა დროის უმაღლესი მაჩვენებლიდან 25%-ით არის შემცირებული.
რაც შეეხება ამაზონის აქციებს, მათი ფასი იმავე პერიოდში 35%-ით შემცირდა. ინვესტორები, გეოპოლიტიკური დაძაბულობისა და მზარდი საპროცენტო განაკვეთების ფონზე, ტექნოლოგიური აქციების მიმართ თავიანთი ზრდის მოლოდინებს ხელახლა განიხილავენ, რამაც, შესაძლოა, სამომხმარებლო ხარჯვა დააზარალოს.
მიუხედავად ყველაფრისა, აქციების დაყოფის ნებისმიერი ეფექტი მოკლევადიანი იქნება. ინვესტორებს, რომლებიც Amazon-ის აქციებს ყიდულობენ 5-10 წლიანი დროის ჰორიზონტი უნდა ჰქონდეთ.
