აშშ-ში ინფლაცია მაღალ ნიშნულზე მოსალოდნელზე მეტ ხანს რჩება და, ამის საპასუხოდ, ფედერალური სარეზერვო ბანკის (Fed) საპროცენტო განაკვეთებიც უცვლელია. ეს მაჩვენებელი კვლავ 23-წლიან მაქსიმალურ ნიშნულზეა.
ფედერალურმა ღია ბაზრის კომიტეტმა (FOMC), ორგანომ, რომელიც ცენტრალური ბანკის მონეტარულ პოლიტიკას ადგენს, ოთხშაბათს ოფიციალურად განაცხადა ის, რასაც ბაზრის მონაწილეები ბოლო კვირების განმავლობაში მოელოდნენ — Fed-მა საპროცენტო განაკვეთები 5.25%-5.50%-ის დიაპაზონში შეინარჩუნა. 2001 წლის შემდეგ ეს ყველაზე მაღალი მაჩვენებელია, რომელიც გასული წლის ივლისის შემდეგ უცვლელად ნარჩუნდება. FOMC-მა საპროცენტო განაკვეთები ამ დონეზე დატოვა მას შემდეგ ჩატარებული ხუთი შეხვედრის განმავლობაში.
გასული წლის ბოლოს, საფონდო ბირჟაზე მოვაჭრეები პროგნოზირებდნენ, რომ საპროცენტო განაკვეთები 2024 წლის გაზაფხულზე შემცირდებოდა, თუმცა მას შემდეგ ინფლაციამ მოულოდნელი „სიჯიუტე“ გამოავლინა.
FOMC-ის განცხადების მიხედვით, საპროცენტო განაკვეთების შესამცირებლად, ეკონომიკურმა მონაცემებმა უნდა აჩვენოს, რომ ინფლაციის დონე სამიზნე მაჩვენებლისკენ — 2%-სკენ მტკიცედ მიემართება. ეს სიტყვები ფედერალური ღია ბაზრის კომიტეტის მიერ იანვარში გაკეთებული განცხადების იდენტურია.
FOMC-მა ასევე გამოაქვეყნა ეკონომიკური პროგნოზები, რომლებიც აჩვენებს, რომ მონეტარული პოლიტიკის შემქმნელები ჯერ კიდევ მოელიან წლის ბოლომდე საპროცენტო განაკვეთების 0.75%-ით შემცირებას.
განაკვეთების დაწევის შესახებ ეს პერსპექტივა წელს არ შეცვლილა, მიუხედავად იმისა, რომ იანვარსა და თებერვალში ინფლაციის მოსალოდნელზე მაღალი ანგარიშები გამოქვეყნდა.
პრესკონფერენციაზე, Fed-ის თავმჯდომარემ — ჯერომ პაუელმა განაცხადა, რომ მიუხედავად გასული ორი თვის შედეგების გაცნობიერებისა, დიდი სურათი უცვლელია. პაუელმა ისიც აღნიშნა, რომ Fed-ს მოლოდინები ზედმეტად არ გაუზრდია მაშინ, როდესაც ადრეული ანგარიშები მოსალოდნელზე უკეთესი იყო.
„ჩვენ არ ვაპირებთ ამ ორი თვის მონაცემებზე ზედმეტად რეაგირებას და არც მათ იგნორირებას“ — განაცხადა მან.
გრძელვადიან პერსპექტივაში კი, გუშინდელი შეხვედრის მიხედვით, Fed-ში მოელიან, რომ საპროცენტო განაკვეთები უფრო მაღალ დონეზე შენარჩუნდება, ვიდრე ადრე პროგნოზირებდნენ. კომიტეტის ვარაუდით, 2025 წლის ბოლოსთვის ეს მაჩვენებელი 3.75%-4%-მდე შემცირდება, რაც მეოთხედი პუნქტით აღემატება წინა პროგნოზს.
ამავდროულად, FOMC-ის წარმომადგენლებმა შეცვალეს შეფასებები იმის შესახებ, თუ რამდენად სწრაფად გაიზრდება ეკონომიკა. კომიტეტში მოელიან, რომ წელს აშშ-ში მთლიანი შიდა პროდუქტი (მშპ) 2.1%-ით მოიმატებს. ეს მაჩვენებელი კი აღემატება დეკემბრის პროგნოზს — 1.4%-ს.
