Trump Media & Technology Group-ის აქციების ფასი 16%-ზე მეტით გაიზარდა პირველ სავაჭრო დღეს მას შემდეგ, რაც კომპანიამ საბოლოოდ დაასრულა Digital World Acquisition Corp.-თან შერწყმის პროცესი. Nasdaq-ის საფონდო ბირჟაზე კომპანიის აქციები ხელმისაწვდომია აბრევიატურით — “DJT”.
Truth Social-ის მშობელი კომპანია საჯარო ხდება
Digital World Acquisition-ისა და Trump Media-ს გარიგების დაანონსებიდან წლების შემდეგ, შერწყმის დღე საბოლოოდ დადგა. კომპანიების წარმომადგენლებმა განაცხადეს, რომ DWAC-ის აქციონერებმა პარასკევს გაერთიანების გადაწყვეტილება დაამტკიცეს.
აშშ-ის ყოფილი პრეზიდენტი — დონალდ ტრამპი კომპანიის დაახლოებით 80 მილიონ აქციას ფლობს, რომელთა საერთო ღირებულებაც გასულ კვირას, შერწყმის შესახებ გამოცხადების დროს, $3-$4 მილიარდს შეადგენდა. გუშინ, ბაზრის დახურვისას კი ეს მაჩვენებელი $4.6 მილიარდს აჭარბებდა.
აღსანიშნავია, რომ ბიზნესს ხელმძღვანელობს ყოფილი კონგრესმენი — დევინ ნუნესი, რომელმაც თქვა: „ჩვენ ავაშენეთ ეს კომპანია ამერიკელი ხალხის ხმისა და მათი თავისუფლების დასაცავად“. მენეჯმენტი პლატფორმას — Truth Social ცნობილი სოციალური ქსელების ალტერნატივად მიიჩნევს.
Truth Social-ის გარდა, კომპანია ასევე გეგმავს გამოუშვას TMTG+, ვიდეო სტრიმინგ სერვისი, რომელიც ფოკუსირებულია გართობაზე, სიახლეებზე, დოკუმენტურ ფილმებზე, პოდკასტებზე და სხვა პროგრამებზე.
ფინანსური შედეგები
Truth Social ამოქმედდა მალევე მას შემდეგ, რაც დონალდ ტრამპმა 2020 წლის საპრეზიდენტო არჩევნები წააგო და Twitter-მა მისი პროფილი დაბლოკა. აშშ-ის ფასიანი ქაღალდებისა და ბირჟის კომისიაში (SEC) შეტანილი დოკუმენტების მიხედვით, კომპანიას ფულის გამომუშავება უჭირს. 2023 წლის პირველი სამი კვარტლის განმავლობაში შემოსავალმა მხოლოდ $3.4 მილიონი შეადგინა და ბუღალტრული აღრიცხვის საყოველთაოდ მიღებული პრინციპების (GAAP) მიხედვით გამოთვლილმა ზარალმა $49 მილიონს მიაღწია. მათ შორის $37.7 მილიონი საპროცენტო ხარჯებთან იყო დაკავშირებული.
ამ დროისთვის, როგორც ჩანს, Trump Media ტრამპის პერსონას ეყრდნობა, მაგრამ საბოლოო ჯამში, ბიზნესმა წარმატებას უნდა მიაღწიოს იმისთვის, რომ მისით მეტი ინვესტორი დაინტერესდეს და აქციების ფასი გაიზარდოს.
