რა მოხდა?
შეფიცვრისთვის საჭირო მასალისა და მოაჯირების წამყვანი მწარმოებელი კომპანიის — Trex-ის აქციების ფასი 8%-ზე მეტით გაიზარდა მას შემდეგ, რაც კომპანიამ მოსალოდნელზე უკეთესი კვარტალური ანგარიში წარადგინა.
და რა?
Trex-ის ბიზნესი მჭიდროდ არის დაკავშირებული საბინაო და სახლის კეთილმოწყობის ბაზართან და მათმა შენელებამ, კომპანიის წარმადობაზეც უარყოფითად იმოქმედა. შედეგად, კვარტალური შემოსავალი წლიდან წლამდე 30%-ით — $238.7 მილიონამდე შემცირდა, თუმცა ამ მაჩვენებელმა მაინც გადააჭარბა ანალიტიკოსების პროგნოზს — $237.4 მილიონს.
Trex-ის მენეჯმენტმა განაცხადა, რომ გაყიდვების შემცირება უფრო მეტად გამოწვეული იყო შერბილებული ეკონომიკის პირობებში მომხმარებლების მიერ ფრთხილი შესყიდვებით. ასევე, კომპანიამ გაყიდა თავისი Trex Commercial ბიზნესი, რომელიც გასული წლის იმავე კვარტალში დაახლოებით $12 მილიონის მოცულობის გაყიდვებზე იყო პასუხისმგებელი.
შემოსავლების ამ შემცირების მიუხედავად, მთლიანი მარჟა ძირითადად სტაბილური იყო და 39.6%-ს შეადგენდა (წინა წლის იმავე კვარტალში — 39.8%). EBITDA (მოგება ვალის მომსახურების ხარჯების, გადასახადების, ცვეთისა და ამორტიზაციის გამოკლებამდე) $105 მილიონიდან $69 მილიონამდე შემცირდა, ხოლო EPS-მა (მოგება თითო აქციაზე) $0.62-დან $0.38-მდე დაიკლო, მაგრამ მაინც გადააჭარბა ანალიტიკოსების პროგნოზს — $0.34-ს.
ახლა რა?
რაც შეეხება მომავალს, მენეჯმენტი მოელის, რომ მეორე კვარტალში გაყიდვები $310-$320 მილიონს მიაღწევს (ანალიტიკოსების პროგნოზი — $306.8 მილიონი), რაც გასული წლის იმავე კვარტალთან შედარებით 18.5%-ით ნაკლებია. კომპანიაში ასევე მოელიან, რომ მთელი წლის კორექტირებული EBITDA-ს მარჟა 26%-27%-ს შეადგენს, რაც აჩვენებს კომპანიის უნარს, ძლიერი მომგებიანობა რთულ გარემოშიც კი შეინარჩუნოს.
