ორ წელზე ნაკლები გავიდა მას შემდეგ, რაც Walmart-მა Walmart+ გამოუშვა და მისი გამომწერების ზრდა უკვე ნელდება. Consumer Intelligence Research Partners-ის (CIRP) მკვლევრების აზრით, საცალო მოვაჭრემ დაახლოებით 11 მილიონი მომხმარებელი მოიზიდა. გარდა იმისა, რომ ეს მაჩვენებელი Amazon Prime-ის 172 მილიონ მომხმარებელს საგრძნობლად ჩამორჩება, წლის დასაწყისიდან Walmart+-ის გამომწერების რაოდენობა შემცირდა.
მიუხედავად იმისა, რომ გამომწერთა რაოდენობის ზრდის შენელება ამაზონისთვის გამოწვევაა, იქიდან გამომდინარე, რომ ვოლმარტის შეთავაზება შედარებით ახალია და კომპანიას გამომწერთა მცირე ბაზა აქვს, შესაძლოა, ზრდისთვის მეტი სივრცე არსებობდეს.
ახალი პარტნიორების ძებნა
Walmart-ის სტრატეგია გამომწერების რაოდენობის გასაზრდელად მდგომარეობს სხვადასხვა კომპანიებთან პარტნიორობაში ან გამომწერებისთვის დამატებითი შეღავათების მინიჭებაში.
სულ ახლახან კომპანია პარტნიორობდა Paramount Global-თან, რათა Walmart+-ის წევრებისთვის Paramount+-ის რეკლამით მხარდაჭერილ სერვისებზე უფასო წვდომა შეეთავაზებინა. ივნისის ბოლოს Paramount+-ის გლობალური გამომწერების რაოდენობა 43 მილიონს შეადგენდა.
ვიდეო სტრიმინგის სერვისის დამატება ეხმიანება Amazon-ის ნაბიჯს, თავისი წევრობის პროგრამაში Prime Video შეიტანოს. თუ ამას გავითვალისწინებთ, როგორც ჩანს, Walmart სტრიმინგის ბიზნესის მომავალზე დიდ ზემოქმედებას ვერ შეძლებს. იმავდროულად, Amazon მილიარდობით დოლარის მოცულობის ინვესტიციებს ახორციელებს, რათა მომხმარებლებისთვის ერთ-ერთ საუკეთესო სტრიმინგ ვარიანტად იქცეს.
გარდა ამისა, Walmart-მა ითანამშრომლა American Express-თან, რათა პლატინის ბარათის მფლობელები უფასო წევრობით უზრუნველყოს. ეს ნაბიჯი მიზნად ისახავს Walmart-ში უფრო შეძლებული ოჯახების მოზიდვას.
ასევე, კომპანია ExxonMobil-თან და Murphy USA-სთან თანამშრომლობდა, რათა მომხმარებლებისთვის მათ ბენზინგასამართ სადგურებზე საწვავზე ფასდაკლება შეეთავაზებინა.
მნიშვნელოვანი შეჯიბრი
ვოლმარტი ახლა რთულ გარემოში ოპერირებს. ინფლაცია მისი ბევრი მყიდველის ბიუჯეტს ანადგურებს, რის გამოც მათ, სასურსათო პროდუქტების მიღმა, დისკრეციული საქონლის შესაძენად მცირე ფულადი რესურსი რჩებათ. სასურსათო პროდუქტები კი დაბალი მარჟებით ხასიათდება.
გარდა ამისა, რადგან ბევრი მომხმარებელი მხოლოდ სასურსათო პროდუქტებს ყიდულობს, უფრო დაბალი ფასები არის ისეთ სასურსათო მაღაზიებში, როგორიც არის Aldi. როიტერის მოხსენების თანახმად, ბოლო ორი თვის განმავლობაში Walmart-ის ტრაფიკი შემცირდა. Walmart-ის მენეჯმენტმა განაცხადა, რომ აშშ-ის მაღაზიებში (მათ შორის ონლაინ) მეორე კვარტალში ტრანზაქციების საერთო რაოდენობა მხოლოდ 1%-ით გაიზარდა.
იმავდროულად, მარტში Amazon-ის Prime-ის ფასების ზრდის ნებისმიერი უარყოფითი გავლენა იმაზე ბევრად ნაკლები იყო, ვიდრე მენეჯმენტი მოელოდა. მართლაც, როგორც ჩანს, Amazon ნაკლებად მგრძნობიარე უფრო მდიდარ მომხმარებლებს და, იმავდროულად, ფართო მიმზიდველობას ინარჩუნებს.
Walmart-ის გამოწვევა არის ის, რომ ძნელია მისი სერვისი უკვე არსებულისგან განასხვაოს. ის Amazon Prime-ის ჩრდილშია.
სწორედ ამიტომ, კომპანია თავის უნიკალურ შეთავაზებებზე უნდა ორიენტირდეს. შესაძლოა, Walmart-ში შოპინგის მოხერხებულობაზე ფოკუსირება კომპანიას უფრო მეტად დაეხმაროს, ვიდრე სხვა კომპანიებთან პარტნიორობის მცდელობა. Walmart-მა შეიძლება ასობით მილიონი (ან მილიარდები) დახარჯოს ამ მიმართულებით, როდესაც ამ თანხების შიდა ზრდისთვის რეინვესტირება უკეთესი არჩევანი იქნებოდა.
