აშშ-ის ფედერალური სარეზერვო ბანკის (Fed) თავმჯდომარე — ჯერომ პაუელი მიმდინარე კვირაში კონგრესს მიაწვდის განახლებებს ეკონომიკური პირობებისა და საპროცენტო განაკვეთების შესახებ. ამას მოჰყვება სამომხმარებლო ფასების ინდექსისა (CPI) და მწარმოებელთა ფასების ინდექსის (PPI) მონაცემების გამოქვეყნება კვირის ბოლოს. ბაზრის დამკვირვებლები ასევე გაეცნობიან მომხმარებელთა განწყობის მონაცემებს ივლისისთვის.
გარდა ამისა, მიმდინარე კვირაში გამოქვეყნდება მეორე კვარტლის მნიშვნელოვანი ფინანსური ანგარიშები. საბანკო სექტორიდან კვარტალურ შედეგებს წარადგენენ JPMorgan Chase, Wells Fargo და Citigroup. ინვესტორთა საზოგადოებას მეორე კვარტლის ფინანსურ შედეგებს გააცნობენ სხვა ცნობილი კომპანიებიც: PepsiCo, Delta Air Lines, Helen Of Troy, Manchester United, WD-40 და ა. შ.
ინვესტორები ყურადღებით მოელიან ჯერომ პაუელის განცხადებას CPI მონაცემების შესახებ
ბაზრის დამკვირვებლები ყურადღებას გაამახვილებენ ფედერალური სარეზერვო სისტემის თავმჯდომარის — ჯერომ პაუელის განცხადებაზე. დაგეგმილია, რომ ის ხვალ სიტყვით მიმართავს სენატის საბანკო კომიტეტს, ხოლო ოთხშაბათს — კონგრესის ფინანსური მომსახურების კომიტეტს. სავარაუდოდ, კანონმდებლები პაუელს დაუსვამენ კითხვებს მიმდინარე ეკონომიკური პირობების, ასევე Fed-ის მიერ საპროცენტო განაკვეთების შემცირების პერსპექტივის შესახებ.
მიმდინარე კვირაში განცხადებებს ასევე გააკეთებენ ფედერალური სარეზერვო სისტემის ვიცე-თავმჯდომარე მაიკლ ს. ბარი, Fed-ის მმართველი საბჭოს წევრი — მიშელ ბოუმენი და ატლანტას ფედერალური სარეზერვო ბანკის პრეზიდენტი — რაფაელ ბოსტიჩი.
სამომხმარებლო ფასების ინდექსის უახლესი მონაცემები, რომლებიც ხუთშაბათს გამოქვეყნდება, დაგვეხმარება იმის გარკვევაში, განაგრძობდა თუ არა ინფლაციის მაჩვენებელი ივნისში ვარდნას მას შემდეგ, რაც მაისში 3.3%-მდე დაეცა. მწარმოებელთა ფასების ინდექსი კი პარასკევს გამოქვეყნდება — ის ასახავს ინფლაციას საბითუმო დონეზე.
ასევე პარასკევს, მომხმარებელთა განწყობის კვლევის მონაცემები აჩვენებს, რა დამოკიდებულება აქვთ მომხმარებლებს აშშ-ის ეკონომიკასთან დაკავშირებით.
მეორე კვარტლის ფინანსური შედეგები
ამ კვირაში კვარტალური ანგარიშების კიდევ ერთი რაუნდი დაიწყება. საინვესტიციო საზოგადოებას ფინანსურ შედეგებს აშშ-ის ზოგიერთი უმსხვილესი ბანკი გააცნობს,
ხოლო სხვა კომპანიების კვარტალური ანგარიშები წარმოდგენას შეგვიქმნის ამერიკელი მომხმარებლების ფინანსური სიჯანსაღის შესახებ.
აღსანიშნავია, რომ პირველ კვარტალში JPMorgan Chase-ის, Wells Fargo-სა და Citigroup-ის მიერ გამოქვეყნებულმა შედეგებმა ანალიტიკოსების საშუალო პროგნოზებს გადააჭარბა. თუმცა მათ, წინა კვარტალთან შედარებით, წმინდა საპროცენტო შემოსავლის კლება დააფიქსირეს.
სამშაბათს, Helen of Troy-ის კვარტალური ანგარიში გვიჩვენებს, თუ როგორ რეაგირებენ მომხმარებლები სილამაზისა და ველნესის ბრენდებზე, როგორებიც არის Revlon, Braun და Vicks. ხოლო WD-40-ის კვარტალური შედეგები მოგვაწვდის ინფორმაციას სამრეწველო და დასუფთავების პროდუქტების გაყიდვების შესახებ.
რაც შეეხება PepsiCo-ს, წინა კვარტალურმა ანგარიშმა აჩვენა, რომ კომპანიის Quaker Foods განყოფილებაში გაყიდვები ზეწოლის ქვეშ არის და საინტერესოა, გამოსწორდა თუ არა მდგომარეობა ამ მიმართულებით. Delta Air Lines-ის მენეჯმენტმა კი ივარაუდა, რომ მეორე კვარტალში შემოსავალი წლიურად 5%-7%-ით გაუმჯობესდებოდა მოგზაურობაზე ძლიერი მოთხოვნის გამო.
