ბიზნესის სამყაროში ყველაზე წარმატებული არის ის, ვინც საყვარელ საქმეს აკეთებს

უორენ ბაფეტი, Berkshire Hathaway-ის ცნობილი აღმასრულებელი დირექტორი, ყველა დროის ერთ-ერთ ყველაზე წარმატებულ ინვესტორად ითვლება. ბაფეტმა დააგროვა ფასდაუდებელი გამოცდილება და ცოდნა, რომელიც ფინანსური სამყაროს საზღვრებს სცილდება და ინვესტორს ბიზნეს სამყაროში ყველასთვის საყვარელ ფიგურად აქცევს. იგი ხშირად უზიარებს თავის ცოდნას საზოგადოებას როგორც ინვესტირების, ასევე სხვა, ცხოვრებისეული საკითხების შესახებ.

დღევანდელ სტატიაში უორენ ბაფეტის ერთ-ერთ ყველაზე ცნობილ სიტყვებზე გავამახვილებთ ყურადღებას: „ბიზნესის სამყაროში ყველაზე წარმატებული არის ის, ვინც საყვარელ საქმეს აკეთებს“.

აღსანიშნავია, რომ ლეგენდარულმა ინვესტორმა საყვარელი საქმიანობა, ანუ ინვესტირება სულ რაღაც 11 წლის ასაკში დაიწყო. ასე რომ, ბაფეტი აშკარად ამ ადამიანების კატეგორიას მიეკუთვნება. გარდა იმისა, რომ ინვესტორი ძალიან წარმატებულია, როგორც ცნობილია, ის და მისი დიდი ხნის პარტნიორი — ჩარლი მანგერი (გარდაიცვალა გასული წლის ნოემბერში) სამსახურში სიხარულით დადიოდნენ.

მოდით, უორენ ბაფეტის ზემოთ აღნიშნულ სიტყვებს უფრო ყურადღებით დავუკვირდეთ და გავიაზროთ, თუ რატომ არის ასეთი მნიშვნელოვანი საყვარელი საქმიანობით დაკავება და როგორ გაზრდის ის თქვენს შანსებს, რომ ერთ-ერთი ყველაზე წარმატებული ადამიანი გახდეთ.

მეტად სავარაუდოა, რომ საქმეს მეტი გულმოდგინებით შეუდგებით

თუ ხედავთ, რომ თქვენს საქმიანობაში არსებული გამოწვევების გადალახვა შრომატევადია, დიდია შანსი, რომ მათი თავიდან აცილება მოგინდეთ. თუმცა, თუ საქმე თქვენს საყვარელ სფეროს ეხება, გამოწვევებს საინტერესო თავსატეხებად აღიქვამთ და, შესაძლოა, თქვენთვის მათი ამოხსნა სახალისო პროცესი იყოს. ამიტომ, მეტად სავარაუდოა, რომ მათთან შეჭიდებას დროსა და ძალისხმევას დაუთმობთ.

ნაკლებად სავარაუდოა, რომ სტრესმა შეგაწუხოთ

ალბათ, სტრესისგან სრულიად თავისუფალი ცხოვრება არ არსებობს. სინამდვილეში სტრესი ზოგჯერ კარგია და ჩვენში ახალი შესაძლებლობების, ძალის აღმოჩენაშიც გვეხმარება. უფრო ადვილია გავუმკლავდეთ სტრესს, რომელიც ჩვენს საყვარელ საქმიანობას ახლავს თან. თუმცა, თუ ჩვენთვის არასასურველ სფეროში ვმოღვაწეობთ ეს თავადვე დიდი სტრესია, რასაც ემატება ის სირთულეები, რომლებიც ნებისმიერი სამუშაო პროცესისთვის არის დამახასიათებელი. საყვარელი საქმის შემთხვევაში კი, ამ უკანასკნელს აკომპენსირებს ის, რაც გვამოძრავებს — სიყვარული.

მეტად მოსალოდნელია, რომ თქვენს მომხმარებლებს გაუგებთ

თუ ისეთ სფეროში მუშაობთ, რომელიც გიყვართ, სავარაუდოდ, მომხმარებელთან მეტ სიახლოვეს იგრძნობთ და შეძლებთ, სწორად აღიქვათ ის, რისი ნახვაც მათ თქვენს პროდუქტებსა და სერვისებში სურთ. ეს უფრო რთულია იმ შემთხვევაში, როდესაც კონკრეტული საქმე მხოლოდ პოტენციური შემოსავლის გამო გიზიდავთ.

მეტად სავარაუდოა, რომ თქვენს თანამშრომლებს გაუგებთ

თუ მუსიკოსი ხართ და პარალელურად მუსიკალური ინსტრუმენტების მაღაზიას მართავთ, ალბათ, თქვენს თანამშრომლებს კარგად გაუგებთ, რადგან ყველას ერთი დიდი საერთო ინტერესი გაგაერთიანებთ. ადამიანები, რომლებიც ერთი სფეროთი არიან დაინტერესებულები, როგორც წესი, ერთმანეთთან საერთო ენას სწრაფად პოულობენ. ჯანსაღი სამუშაო გარემოსთვის კი სწორი კომუნიკაცია ძალიან მნიშვნელოვანი ფაქტორია.

მეტად მოსალოდნელია, რომ იამაყებთ და კმაყოფილი იქნებით თქვენი საქმიანობით

შეიძლება გქონდეთ მაღალი ანაზღაურება და მუშაობდეთ პოზიციაზე, რომელიც ბევრი ადამიანისთვის საოცნებოც კია, თუმცა ძნელია იამაყოთ საქმით, რომელიც არ გაინტერესებთ და ბედნიერებას ვერ განიჭებთ. ამის საპირისპიროდ, ბევრი ადამიანი შეიძლება დაკმაყოფილდეს შედარებით დაბალანაზღაურებადი სამსახურითაც იმ შემთხვევაში, თუ ის საყვარელი საქმიანობით იქნება დაკავებული.

უფრო დიდია ალბათობა, რომ გამორჩეული იქნებით

საქმის სიყვარული ერთადერთი ინგრედიენტი არ არის, მაგრამ ის თქვენს წარმატებაში ძალიან მნიშვნელოვან როლს ითამაშებს. თუ საყვარელ საქმეს აკეთებთ, უფრო მაღალი ხარისხის შედეგს მიაღწევთ და მოახერხებთ ისეთი გამოწვევების გადალახვას, რომლებიც მათთვის უინტერესო საქმიანობით დაკავებულ ადამიანებს უკან დახევას აიძულებს.