პერსონალური ფინანსების სწორი მენეჯმენტი ადამიანს ფულის დაზოგვაში, ინვესტირებაში და სხვა მოკლევადიანი თუ გრძელვადიანი მიზნების მიღწევაში ეხმარება. ამ სფეროში გათვითცნობიერება საშუალებას გვაძლევს, ჩვენი ცხოვრება უფრო მოვაწესრიგოთ. თუ პერსონალურ ფინანსებზე წარმოდგენა არ გაქვთ ან გსურთ, მის შესახებ მეტი გაიგოთ, დღეს შემოგთავაზებთ რამდენიმე წიგნს, რომელიც ამ მიზნის განხორციელებაში დაგეხმარებათ.
The Total Money Makeover (ავტორი: დეივ რემსი)
ეს არის შესანიშნავი წიგნი, რომელშიც მოცემულია მრავალი რეალური მაგალითი იმ ადამიანებისა, რომლებიც დეივის რჩევებს მიჰყვებოდნენ და სასურველ შედეგებს აღწევდნენ. ფულზე სრული კონტროლისთვის ერთ-ერთ ყველაზე მნიშვნელოვან ბარიერს წარმოადგენს ცხოვრების წესის კორექტირებისთვის სურვილისა და მხარდაჭერის ნაკლებობა. ეს წიგნი კი დაგეხმარებათ ახლებურად დაინახოთ მიზნები და ჯილდოები, რომლებსაც ამ მიზნების მიღწევით მიიღებთ.
You’re So Money: Live Rich, Even When You’re Not (ავტორი: ფარნუშ ტორაბი)
ეს ფარნუშ ტორაბის ერთ-ერთი ყველაზე მნიშვნელოვანი ნამუშევარია. ის ამარტივებს ფინანსების სირთულეებს და ბიუჯეტის შედგენას. ავტორი ყურადღებას ამახვილებს ხარჯების გაწევისას პრიორიტეტების განსაზღვრაზე იმის საფუძველზე, თუ რა სურს ყველაზე მეტად მკითხველს.
ეს იუმორისტული წიგნი მოგვიწოდებს, სავსე ცხოვრებით ვიცხოვროთ. ფარნუშის ნამუშევარი არის ახალი იდეებისა და გაბედული მიდგომის იდეალური კომბინაციაა. ავტორის წერის სტილი მიმზიდველი, პირდაპირი და მტკიცეა.
Rich Dad Poor Dad (ავტორი: რობერტ კიოსაკი)
ეს წიგნი მოიცავს თითქმის ყველაფერს პერსონალური ფინანსების შესახებ. ეს ორი მამის ისტორიაა — ერთი განათლებულია, მეორე კი სკოლიდან წამოვიდა. პირველმა მათგანმა გარდაცვალების შემდეგ შვილს ვალის გარდა არაფერი დაუტოვა, ხოლო მეორემ — ბიზნეს იმპერია გადასცა.
ეს წიგნი იძლევა ფასდაუდებელ გაკვეთილებს ფულის შესახებ, ნათელს ხდის იმას, თუ როგორ შეიძლება ადამიანმა იფიქროს „მეორე მამის“ მსგავსად და სიმდიდრე დააგროვოს.
The Little Book of Common Sense Investing: The Only Way to Guarantee Your Fair Share of Stock Market Returns (ავტორი: ჯონ ბოგლი)
ამ საინვესტიციო წიგნში ბოგლი თავის იდეებს ლაკონიურად აცნობს იმ ადამიანებს, რომელთათვისაც ეს სფერო უცნობია. ავტორი ხაზს უსვამს ინდექსებში ინვესტირებას, აქციების შერჩევის სტრატეგიებს და ინვესტირების საფუძვლებს. 2014 წელს აქციონერებისადმი მიწერილ წერილში უორენ ბაფეტმა ამ წიგნის წაკითხვა ყველას ურჩია.
თავად ავტორის თქმით, მასაც კი სჭირდებოდა დროდადრო საკუთარი რჩევების შეხსენება. ტონი რობინსთან საუბრისას ჯონმა აღნიშნა, რომ ბაზრის მკვეთრი ვარდნა მასზე მაინც ზემოქმედებდა და ამ დროს ხელახლა კითხულობდა თავის რამდენიმე წიგნს, რათა „კურსზე“ დაბრუნებულიყო.
The Millionaire Next Door (ავტორები: თომას სტენლი და უილიამ დანკო)
ეს წიგნი ნათელს ფენს ინტელექტუალური ინვესტორების საინვესტიციო სტილს. The Millionaire Next Door გვესაუბრება იმაზე, თუ რამდენად ორიენტირებულნი არიან მილიონერები სიმდიდრის გამომუშავებაზე.
ავტორები ამ წიგნში აანალიზებენ იმ ამერიკელი მილიონერების ჩვევებს, რომლებმაც სიმდიდრე სახალხო ცნობადობის გარეშე დააგროვეს. ავტორთა აზრით, მდიდარი ადამიანების უმეტესობა თავს არიდებს საკუთარი სიმდიდრის დემონსტრირებას და ურჩევნია, რეალურ შესაძლებლობებზე უფრო მოკრძალებულად იცხოვროს, რაც მათ დროთა განმავლობაში მნიშვნელოვანი ქონების დაგროვების საშუალებას აძლევს.
