შესაძლოა, GameStop, ChargePoint და Conn’s იყოს კომპანიები, რომლებსაც ამ კვირაში უნდა მოერიდოთ. მოდით, თითოეული მათგანი განვიხილოთ.
GameStop
ბოლო სამი სავაჭრო დღის განმავლობაში ვიდეო თამაშების საცალო მოვაჭრის აქციების ფასი 54%-ით გაიზარდა. რამ შეიძლება ეს ზრდა შეაფერხოს? კვარტალური ანგარიშების სეზონმა. ბოლო 14 კვარტალური ანგარიშის წარდგენიდან 11 შემთხვევაში GameStop-ის აქციების ფასი შემცირდა. კომპანია ფისკალური კვარტლის შედეგებს ხვალ წარადგენს.
GameStop-მა ზედიზედ 3 კვარტლის განმავლობაში მოსალოდნელზე მეტი ზარალი დააფიქსირა. $1.32 მილიარდის ტოლი შემოსავალი, რომელსაც ანალიტიკოსები პროგნოზირებენ მცირე ზრდაა და სამი წლის წინ ბოლო პანდემიამდელ პირველ ფისკალურ კვარტალში დაფიქსირებულ შედეგზე 15%-ით ნაკლებია. იმ დროისათვის კი აქციების ფასი ერთნიშნა იყო.
ChargePoint
ეჭვგარეშეა, რომ ელექტრომობილების ბაზარს ფეთქებადი ზრდის წლები ექნება, მაგრამ ალბათ ნაადრევია ფსონის დადება იმ კომპანიების მზარდ რაოდენობაზე, რომლებიც ბაზარს დამტენი სადგურებით ამარაგებენ. მოთამაშეებმა, რომლებიც თავიანთ ქსელებს ახლა ქმნიან, შეიძლება, მოგება ვერასოდეს მოიტანონ. ანალიტიკოსები 2026 წლამდე ChargePoint-ის მომგებიანობას ვერ ხედავენ და იმ დროისთვის ეს ბაზარი, სავარაუდოდ, ბევრად უფრო სახიფათო იქნება ვიდრე ახლაა.
ChangePoint ამ კვარტლის ფინანსურ შედეგებს დღეს, ბაზრის დახურვის შემდეგ წარადგენს. წინა კვარტლებში კომპანიამ იმაზე დიდი ზარალი დააფიქსირა, ვიდრე ანალიტიკოსები პროგნოზირებდნენ. უოლ სტრიტის პროფესიონალები, როგორც ამ კვარტალში, ასევე, მიმდინარე წელს ChargePoint-სთვის დეფიციტს წინასწარმეტყველებენ.
Conn’s
Conn’s კვარტალურ ანგარიშს ხვალ წარადგენს. დიდი ზომის საცალო მოვაჭრე, რომელიც ავეჯს, ტექნიკასა და სამომხმარებლო ელექტრონიკას ყიდის, შესაძლოა, უხეში ფინანსური განახლების წინაშე აღმოჩნდეს. რამდენიმე საცალო მოვაჭრემ ყურადღება გაამახვილა იმაზე, რომ მომხმარებლები სახლისთვის ძვირადღირებული ნივთების ყიდვას ერიდებიან. გარდა ამისა, Conn’s ბოლო დროს უოლ სტრიტის მოლოდინებს ვერ ამართლებდა.
ბოლო მოხსენების შემდეგ ოთხი დღის განმავლობაში კომპანიის აქციების ფასი 26%-ით დაეცა. შესაძლოა, Conn’s-სთვის ეს რთული კვირა იყოს.
თუ უსაფრთხო ინვესტიციებს ეძებთ, ნაკლებად სავარაუდოა, რომ ისინი GameStop-ში, ChargePoint-ში ან Conn’s-ში იპოვოთ.
