გასულ კვირას აქციების ფასები გაიზარდა, მიუხედავად იმისა, რომ ზედიზედ მეორე კვარტალია, რაც აშშ-ის ეკონომიკა მცირდება. Dow Jones Industrial Average და S&P 500 3%-ით გაიზარდა იმ იმედიდან გამომდინარე, რომ 2022 წლის მეორე ნახევარში კორპორაციული მოგება, ბოლო ორი წლის უმეტეს ნაწილში ზრდის შემდეგ, ნელა დაიწევს.
მიმდინარე კვირაში ასობით კომპანია წარადგენს კვარტალურ ანგარიშებს და 2022 წლის პერსპექტივებს. ერთობლივად ეს განცხადებები უპასუხებს ინვესტორების ბევრ კითხვას სამომხმარებლო ხარჯებისა და უფრო ფართო ეკონომიკური ზრდის ტენდენციების შესახებ. დღეს კი განვიხილავთ სამ კომპანიას, რომელიც ამ კვირაში კვარტალურ ანგარიშებს წარადგენს.
Electronic Arts
ფისკალური პირველი კვარტლის მოგების ანგარიშთან დაკავშირებით, რომელსაც Electronic Arts ხვალ წარადგენს, ინვესტორებს რამდენიმე მნიშვნელოვანი შეკითხვა აქვთ. ვიდეო თამაშების გიგანტის ბოლო განახლება უამრავ კარგ სიახლეს შეიცავდა. წმინდა ჯავშნები 18%-იანი ზრდის ტემპით გაიზარდა, დაახლოებით ისევე სწრაფად, როგორც პანდემიის ადრეულ ფაზებში.
მოსალოდნელია, რომ ერთი წლის წინანდელ მზარდ შედეგებთან შედარებით, შემოსავალი დაახლოებით 1%-ით შემცირდება. დიდი კითხვა ის არის, შეუძლია თუ არა კომპანიას, ციფრულ კონტენტზე მოთხოვნის უმნიშვნელო შემცირების შემდეგ სწრაფად დაუბრუნდეს ზრდას.
ნებისმიერ შემთხვევაში, EA ფინანსურად ძლიერდება, მარჟები იზრდება და ფულადი ნაკადები წელიწადში $2 მილიარდამდე უმჯობესდება. თუ ვივარაუდებთ, რომ კონტენტთან დაკავშირებით მნიშვნელოვანი შეფერხებები არ იქნება, ამ ზრდამ ხელი უნდა შეუწყოს ინვესტორების მყარ ანაზღაურებას.
Molson Coors
Molson Coors კვარტალურ ანგარიშს ხვალ წარადგენს. ყურადღება მიაქციეთ შემოსავლების არასტაბილურობას. ალკოჰოლური გიგანტის აქციების ფასი წელს 20%-ზე მეტით გაიზარდა, მაშინაც კი, როდესაც S&P 500 15%-ით დაეცა.
Coors და Miller Light ლუდის ბრენდების მფლობელმა მაისის დასაწყისში გამოაცხადა, რომ გაყიდვების მოცულობა 10%-ით გაიზარდა, რაც მას ბაზრის წილის ზრდის საშუალებას აძლევდა. მოთხოვნა კომპანიის მრავალი ძირითადი ლუდის პროდუქტებისკენ იხრება, მაგრამ ის წარმატებას აღწევს პრემიუმ ნიშაშიც, რომელიც მოიცავს ბრენდებს, როგორიც არის Topo Chico, Simply Spiked და Molson Ultra.
ინვესტორებს სურთ, რომ ამ მხრივ მეტი ზრდა იხილონ. იდეალურ შემთხვევაში Molson შეინარჩუნებს ნათელი შემოსავლის პერსპექტივას, რაც, მიუხედავად მზარდი ხარჯებისა, მომგებიანობის მოკრძალებულ ზრდას მოითხოვს. თუ აღმასრულებლები ამ კვირაში უფრო მაღალი მარჟის პროგნოზირებას განაგრძობენ, აქცია, სავარაუდოდ, მიიპყრობს უფრო მეტ ყურადღებას ინვესტორებისგან, რომლებიც რეცესიისადმი გამძლე ბიზნესს ეძებენ.
ebay
პანდემიის ადრეულ ეტაპებზე მატების შემდეგ, ბოლო კვარტლების განმავლობაში ebay-ის ორგანული ზრდა უარყოფითი იყო და ინვესტორები ამით უკმაყოფილონი არიან.
კომპანია კვარტალურ ანგარიშს ოთხშაბათს [3 აგვისტო] წარადგენს. eBay-ის აღმასრულებლები ვარაუდობდნენ, რომ ამ კვარტალში ორგანული გაყიდვები 9%-ით დაიკლებდა, ფისკალური 2022 წლის დარჩენილი პერიოდისთვის კი ზარალი შემცირდებოდა.
მოსალოდნელი აღდგენის ნიშნებისთვის მყიდველთა რაოდენობას დააკვირდით. ეს მაჩვენებელი უკანასკნელ კვარტალში 13%-ით, ხოლო მანამდე 9%-ით შემცირდა. აქციების ფასის ტრაექტორია, სავარაუდოდ, დამოკიდებული იქნება იმაზე, თუ რამდენად წარმატებული იქნება კომპანია მომდევნო რამდენიმე კვარტლის განმავლობაში ამ დანაკარგების შენელებასა და შემდეგ გამოსწორებაში.
