გუშინ, პოზიტიური სიახლეების შემდეგ, ელექტრონული კომერციის ამერიკული გიგანტის — Amazon-ის (AMZN) აქციების ფასი 2%-ზე მეტით გაიზარდა. წლის დასაწყისიდან ეს მაჩვენებელი დაახლოებით 19%-ით არის გაუმჯობესებული.
Amazon-ის აქციებზე პოზიტიურად ორმა სიახლემ იმოქმედა — დადებითმა შეფასებამ უოლ სტრიტის ანალიტიკოსისგან და Amazon Web Services-ის (AWS) მიერ ახალი მსხვილი კლიენტის დამატებამ.
ძლიერი და მზარდი იმპულსი
ფინანსური სერვისების ფირმა Cantor Fitzgerald-ის ანალიტიკოსმა — დიპაკ მატივანანმა Amazon-ის აქციებს ყიდვის რეკომენდაცია და $230-ის ტოლი სამიზნე ფასი მიანიჭა. ოთხშაბათს, სავაჭრო დღის დასრულებისას, დაფიქსირებულ ფასთან შედარებით ეს 33%-იან ზრდას წარმოადგენს. ანალიტიკოსმა ხაზი გაუსვა Amazon-ის შესაძლებლობებს, როგორც ონლაინ საცალო ვაჭრობაში, ისე AWS-ის მიმართულებით. დიპაკ მატივანანი თვლის, რომ ამაზონს აქვს შესაძლებლობა, გააფართოოს თავისი საცალო მარჟა, რაც გააუმჯობესებს მოგებას. ის ასევე ვარაუდობს, რომ AWS-ის ზრდა დაჩქარებას გააგრძელებს.
ანალიტიკოსი აღნიშნავს, რომ ამაზონის დომინანტური კონკურენტუნარიანი პოზიცია ორ დიდ — სამომხმარებლო და პროგრამული უზრუნველყოფის — საბოლოო ბაზარზე, საცალო და ქლაუდ ბიზნესთან ერთად, ბევრ მიზეზს ქმნის კომპანიის მომდევნო 12-18-თვიანი პერიოდის მიმართ პოზიტიური განწყობის შესაქმნელად.
მეორე კატალიზატორი, რომელმაც Amazon-ის აქციების ფასზე დადებითი გავლენა იქონია იყო განცხადება, რომ ცენტრალური იაპონიის რკინიგზის კომპანიამ თავისი ოპერაციების გასაუმჯობესებლად არჩევანი AWS-ზე გააკეთა. ჩქაროსნული რკინიგზა ყოველწლიურად 170 მილიონ მგზავრს ემსახურება. კომპანია გამოიყენებს AWS-ის ნივთების ინტერნეტს (IoT), მანქანათმცოდნეობისა და გენერაციული ხელოვნური ინტელექტის (AI) შესაძლებლობებს, რათა ხელი შეუწყოს მონაცემებზე დაფუძნებული გადაწყვეტილებების მიღებას, გააუმჯობესოს ოპერატიული ეფექტიანობა და შეამციროს ტექნიკური ხარჯები.
მრავალი შესაძლებლობა
მნიშვნელოვანი ახალი კლიენტის შეძენით, ამაზონმა, როგორც ჩანს, ხაზი გაუსვა ანალიტიკოსის აზრს AWS-ის ზრდის ტემპის აჩქარების შესახებ. აღსანიშნავია, რომ მიმდინარე წლის მეორე მეოთხედში Amazon Web Services-ის გაყიდვები წლიურად 19%-ით — $26.3 მილიარდამდე გაიზარდა. ეს იყო ზედიზედ მეოთხე კვარტალი, როდესაც კომპანიამ ამ მიმართულებით წლიური ზრდის ტემპის აჩქარება დააფიქსირა.
გარდა ამისა, ამაზონს არ ჰყავს თანაბარი კონკურენტი ციფრული საცალო ვაჭრობის სფეროში — მეორე კვარტალში ამ სეგმენტში კომპანიის გაყიდვებმა $122 მილიარდს მიაღწია. შესაბამისად, მოსალოდნელია, რომ კომპანიის მარჟის მცირედი გაუმჯობესებაც კი მოგების დიდ ზრდას გამოიწვევს.
სხვა კვარტალური მაჩვენებლები
ბოლო კვარტალური შედეგები Amazon-მა გასული თვის დასაწყისში გამოაქვეყნა. 2024 წლის მეორე მეოთხედში Amazon-ის შემოსავალი წლიურად 10%-ით — $147.98 მილიარდამდე გაიზარდა, რაც ჩამორჩა ანალიტიკოსების პროგნოზს — $148.67 მილიარდს. მოგებამ თითო აქციაზე (EPS) კი $1.26-ს მიაღწია და ამ მაჩვენებელმა გადააჭარბა უოლ სტრიტის მოლოდინს — $1.03-ს. შედარებისთვის, გასული წლის იმავე კვარტალში Amazon-ის EPS-მა $0.65 შეადგინა.
ამაზონის რეკლამირების ბიზნესის შემოსავალი კვარტალში წლიურად 20%-ით — $12.77 მილიარდამდე გაიზარდა, რაც ჩამორჩა ანალიტიკოსების პროგნოზს — $13 მილიარდს. ეს მიმართულება კომპანიისთვის მოგების ერთ-ერთი უდიდესი გენერატორი იყო.
როგორია მოლოდინები?
რაც შეეხება მომავალს, Amazon-ის მენეჯმენტი მოელის, რომ მიმდინარე კვარტალში შემოსავალი $154-$158.5 მილიარდს მიაღწევს. შედარებისთვის, უოლ სტრიტის ანალიტიკოსების პროგნოზი $158.42 მილიარდს შეადგენს. მენეჯმენტის საპროგნოზო დიაპაზონი მოიცავს Amazon-ის უახლეს Prime Day გაყიდვების ღონისძიებას, რომელიც, კომპანიის წარმომადგენლების თქმით, ისტორიაში ყველაზე მასშტაბური იყო.
Amazon-ში ასევე მოელიან, რომ მესამე კვარტალში საოპერაციო შემოსავალი $11.5-$15 მილიარდს მიაღწევს. შედარებისთვის, გასული წლის იმავე მეოთხედში ამ მაჩვენებელმა $11.2 მილიარდი შეადგინა, ხოლო ანალიტიკოსების პროგნოზი $15.3 მილიარდს უტოლდება.
როგორ აფასებენ ანალიტიკოსები Amazon-ის აქციებს?
Amazon-ის აქციების ამჟამინდელი ფასი $178.00-ს შეადგენს. კომპანიას ამ ეტაპზე უოლ სტრიტის 43 ანალიტიკოსი აფასებს. საშუალო სამიზნე ფასი $222.69-ს შეადგენს, მაქსიმალური პროგნოზი — $265.00-ს, ხოლო მინიმალური — $186.00-ს. საშუალო სამიზნე ფასი Amazon-ის აქციების ამჟამინდელი ფასიდან დაახლოებით 25.2%-იან ზრდას გულისხმობს. კომპანიის აქციებს 43 ანალიტიკოსიდან 42-მა მიანიჭა ყიდვის რეკომენდაცია, 1-მა — ნეიტრალური რეიტინგი და არცერთმა — გაყიდვის რეკომენდაცია.
Amazon-ის აქციების შეძენა საქართველოს ბანკის მობილბანკში შეგიძლიათ ბმულზე.
