რა მოხდა?
სამშაბათს Walmart-ის აქციების ფასი 6.5%-ით გაიზარდა მას შემდეგ რაც საცალო ვაჭრობის გიგანტმა გაყიდვების სოლიდური ზრდა დააფიქსირა და აქციების გამოსყიდვის მასიური ახალი პროგრამა დააანონსა.
და რა?
ფისკალური 2023 წლის მესამე კვარტალში, რომელიც 31 ოქტომბერს დასრულდა, Walmart-ის შემოსავალი წლიდან წლამდე 8.7%-ით — $152,8 მილიარდამდე გაიზარდა. ზრდას ხელი შეუწყო აშშ-ში ერთი და იგივე ლოკაციების (ფინანსური მეტრიკა, რომელსაც საცალო ინდუსტრიის კომპანიები იყენებს, რათა შეაფასოს გაყიდვების მთლიანი მოცულობა კომპანიის ლოკაციებზე, რომლებიც ერთი წლის ან მეტი ხნის განმავლობაში ფუნქციონირებს) გაყიდვების 8,2%-ით მატებამ და Sam’s Club-ის გაყიდვების 10%-იანმა ზრდამ.
აღსანიშნავია, რომ Walmart-ის ელექტრონული კომერციის გაყიდვები 16%-ით გაიზარდა. კომპანიის ახალი ციფრული სარეკლამო ბიზნესი ასევე სწრაფად ფართოვდება, გლობალური რეკლამირებიდან მიღებული შემოსავლის ზრდა 30%-ს აჭარბებს.
ანალიტიკოსებთან საკონფერენციო ზარის დროს, მთავარმა ფინანსურმა დირექტორმა — ჯონ რეინმა თქვა, რომ Walmart ითვისებს ახალ ბაზარს უფრო მაღალი შემოსავლის მქონე მყიდველებით, რომლებიც რთული ეკონომიკური გარემოს ფონზე ხელსაყრელ გარიგებებს ეძებენ:
„ჩვენ განვაგრძეთ შემოსავლის დემოგრაფიის მიხედვით სასურსათო ბაზრის წილის ზრდა და თითქმის სამი მეოთხედი მოდის მომხმარებლებზე, რომელთა წლიური შემოსავალი $100,000-ს აღემატება.“
აღმასრულებელმა დირექტორმა — დაგ მაკმილონმა კი განაცხადა: „მესამე კვარტალში ჩვენ მნიშვნელოვნად გავაუმჯობესეთ მარაგების დონე და ამ მიმართულებით პროგრესირებას წლის ბოლომდეც განვაგრძობთ”.
საერთო ჯამში, Walmart-ის კორექტირებული საოპერაციო შემოსავალი 3,9%-ით — $6 მილიარდამდე გაიზარდა, ხოლო მისი კორექტირებული EPS (მოგება თითო აქციაზე) 3,4%-ით — $1,50-მდე.
ახლა რა?
ამ ძლიერმა შედეგებმა Walmart-ის მენეჯმენტს მთელი წლის შემოსავლის პროგნოზის შეცვლისკენ უბიძგა. ახლა მათი პროგნოზი წმინდა გაყიდვების 5.5%-ით ზრდაა, მანამდე კი მოლოდინი 4.5%-ს შეადგენდა.
გარდა ამისა, კომპანიის დირექტორთა საბჭომ $20 მილიარდის ღირებულების აქციების გამოსყიდვის გეგმა დაამტკიცა.
„ჩვენ მზად ვართ გავაგრძელოთ აქციონერებისთვის კაპიტალის დაბრუნება და, იმავდროულად, გრძელვადიან პერსპექტივაში სათანადო ინვესტიციებს ვახორციელებთ ჩვენს ბიზნესში”, – თქვა რეინმა.
