რა მოხდა?
არასდროს არის კომფორტული ბიზნესისთვის, როდესაც მისი კონკურენტი მსხვილი, კარგად კაპიტალიზებული კომპანიაა. სწორედ ასეთი კონკურენტის მიერ გადადგმული ნაბიჯი გახდა გუშინ Walgreens Boots Alliance-ის აქციების ფასის 2.10%-ით შემცირების მიზეზი. შედარებისთვის, დროის იმავე მონაკვეთში S&P 500 უმნიშვნელოდ — 0.06%-ით შემცირდა.
და რა?
რაც შეეხება კონკურენტს, ეს ელექტრონული კომერციის გიგანტი — Amazon-ია. სამშაბათს, საცალო ოპერაციებით ცნობილმა კომპანიამ აშშ-ში გამოუშვა RxPass, ჯანდაცვის ახალი სარგებელი თავისი Amazon Pharmacy განყოფილებისგან.
პრესრელიზში, Amazon-ის მენეჯმენტმა განაცხადა, რომ RxPass-ის მფლობელებს ექნებათ წვდომა საუკეთესო მედიკამენტების უპატენტო ვერსიებზე. მათი თქმით, ეს არის მედიკამენტები, რომლებიც 80-ზე მეტი გავრცელებული დაავადების სამკურნალოდ გამოიყენება. RxPass თვეში $5 ღირს, მიწოდება კი ყოველთვის უფასოა. მენეჯმენტმა დასძინა, რომ ფასის მიღმა რაიმე ფარული გადასახადი არ არსებობს.
Amazon Pharmacy-ს ვიცე-პრეზიდენტმა — ჯონ ლავმა განაცხადა: „ნებისმიერი მომხმარებელი, რომელიც თვეში $10-ზე მეტს იხდის მედიკამენტებისთვის, ნახავს, რომ ამ მიმართულებით მისი ხარჯები 50%-ით ან მეტით შემცირდება, გარდა ამისა, დაზოგავს დროს, რადგან ფიზიკურ აფთიაქში წასვლა არ მოუწევს“.
ახლა რა?
Walgreens Boots Alliance-ის მენეჯმენტს RxPass-ის შესახებ ჯერჯერობით ოფიციალური კომენტარი არ გაუკეთებია, თუმცა ამ ახალ სერვისზე ყურადღების გამახვილება გონივრული ნაბიჯი იქნება.
RxPass, რა თქმა უნდა, წარმოადგენს გაძლიერებულ კონკურენტულ საფრთხეს Walgreens-ის ბიზნესისთვის, რომელიც ყოველთვის სააფთიაქო ოპერაციებზე იყო ორიენტირებული. ამასთან, მნიშვნელოვანია, რომ ამერიკის მოსახლეობა ბერდება, შედეგად, ჯანდაცვაზე ორიენტირება გაიზრდება. შესაძლოა, ამან ორივე კომპანიაზე დადებითად იმოქმედოს.
