რა მოხდა?
S&P Global Market Intelligence-ის მიერ მოწოდებული მონაცემების თანახმად, გასული კვირის განმავლობაში Urban Outfitters-ის აქციების ფასი 11%-ზე მეტით გაიზარდა.
კომპანიამ სადღესასწაულო გაყიდვების მოსალოდნელზე უკეთესი მაჩვენებლები დააფიქსირა, რამაც აქციების ფასის მატება გამოიწვია. ინვესტორები ემზადებოდნენ უფრო სუსტი ციფრებისთვის, იმის გათვალისწინებით, რომ მაკროეკონომიკური წინააღმდეგობები სამომხმარებლო ხარჯებზე ნეგატიურად ზემოქმედებს, მაგრამ კომპანიის ზოგიერთი ტოპ ბრენდი მომხმარებელთა მდიდარი ბაზის უპირატესობით სარგებლობს.
და რა?
მთლიანი წმინდა გაყიდვების ზრდა თანმიმდევრული იყო და წლიდან წლამდე ამ მეტრიკამ 2.3% შეადგინა, რაც კომპანიისთვის რეკორდულ დონეს წარმოადგენს. ერთი და იმავე მაღაზიების გაყიდვების (Comps — ფინანსური მეტრიკა, რომელსაც საცალო ინდუსტრიის კომპანიები იყენებს, რათა შეაფასოს გაყიდვების მთლიანი მოცულობა კომპანიის ლოკაციებზე, რომლებიც ერთი წლის ან მეტი ხნის განმავლობაში ფუნქციონირებს) 2%-იანი ზრდა 1 პუნქტით მაღალი იქნებოდა, რომ არა ვალუტის კონვერტაციის ნეგატიური გავლენა. Urban Outfitters-მა ციფრული გაყიდვების არხებსა და საცალო მაღაზიებში დაბალანსებული შედეგები დააფიქსირა. ორივე მიმართულებამ დაბალი ერთნიშნა პროცენტული ზრდა უზრუნველყო.
მენეჯმენტმა ნოემბერში ფისკალური მესამე კვარტლის ანგარიშის წარდგენისას აღნიშნა, რომ Anthropologie-ის, Free People-ის, FP Movement-ის და Nuuly-ის მომხმარებლებს გააჩნიათ შესაძლებლობა და სურვილი, დახარჯონ ფული ინფლაციური გარემოს მიუხედავად. თუმცა, Urban Outfitters ემსახურება ახალგაზრდა მომხმარებლებს, რომლებსაც ნაკლები ფული აქვთ და ეკონომიკური ცვლილებების მიმართ უფრო მგრძნობიარენი არიან. გასული წლის განმავლობაში Urban კომპანიის ყველაზე სუსტ რგოლს წარმოადგენდა.
ახლა რა?
მენეჯმენტი ჩრდილოეთ ამერიკაში Urban Outfitters-ის მარაგების შემცირებაზე მუშაობს და მოელის, რომ ეს პრობლემა ფისკალური მეოთხე კვარტლის ბოლოს გამოსწორდება.
მიუხედავად იმისა, რომ ბოლო 5 წლის განმავლობაში Urban-ის წარმადობა S&P 500 ინდექსისას ჩამორჩებოდა, 2022 წელს აქციებმა მნიშვნელოვნად აჯობა ფართო ბაზარს. ამ დროისთვის, ბოლო 12 თვის განმავლობაში, კომპანიის აქციების ფასი დაახლოებით 2%-ით არის გაზრდილი.
კომპანიამ კარგად გაუძლო რთულ პერიოდს, თუმცა მისი დაბალი ზრდის პერსპექტივები, შესაძლოა, ექსპანსიის შემზღუდველად იქცეს.
