რა მოხდა?
გუშინ, ბაზრის გახსნამდე, მსხვილმა ბანკმა — State Street-მა კვარტალური ანგარიში წარადგინა, სავაჭრო დღის განმავლობაში კი კომპანიის აქციების ფასი 9%-ზე მეტით შემცირდა.
და რა?
State Street-ის კვარტალურმა შემოსავალმა $3.1 მილიარდი შეადგინა, ხოლო განზავებულმა (წილის განზავება – ახალი აქციების გამოშვების შედეგად, ძველი აქციონერების ფლობის წილის პროცენტული რაოდენობის შემცირება) EPS-მა (მოგება თითო აქციაზე) — $1.52. ეს უკანასკნელი წინა კვარტალთან შედარებით 20%-ით შემცირდა და ჩამორჩა ანალიტიკოსების პროგნოზს — $1.65-ს, ხოლო შემოსავალი თითქმის შეესაბამებოდა მოლოდინს — $3.12 მილიარდს.
მოგების ჩამორჩენაში მთავარი დამნაშავე იყო საკომისიო შემოსავლის ვარდნა, ის, გასულ კვარტალთან შედარებით 1%-ით, ხოლო წლიდან წლამდე 9%-ით შემცირდა.
„პირველი კვარტლის შედეგები წარმოაჩენს ჩვენი ბიზნეს მოდელის მდგრადობას, მიუხედავად საპროცენტო განაკვეთის მუდმივი ზრდის, ბაზრის მნიშვნელოვანი მოძრაობების, ცვალებადობისა და საბანკო ინდუსტრიის სხვა ნაწილებში შეფერხებისა“ — განაცხადა State Street-ის აღმასრულებელმა დირექტორმა — რონ ო’ჰენლიმ.
მართალია, დაფიქსირდა საკომისიოს შემოსავლების ვარდნა, რაც State Street-ის შემოსავლის ყველაზე დიდ წყაროს წარმოადგენს, თუმცა წმინდა საპროცენტო შემოსავალი წლიდან წლამდე 50%-ით გაიზარდა.
ახლა რა?
დამატებით უნდა აღინიშნოს, რომ State Street მიმდინარე წელს $4.5 მილიარდის ღირებულების აქციების გამოსყიდვას აპირებს.
