რა მოხდა?
Sotera Health ჯანდაცვის კომპანიებს სტერილიზაციის გადაწყვეტებს, ლაბორატორიულ ტესტებსა და საკონსულტაციო მომსახურებას სთავაზობს. გუშინ მისი აქციების ფასი 17%-ზე მეტით გაიზარდა მას შემდეგ, რაც ცნობილი გახდა, რომ კომპანიამ კლასობრივი სარჩელი მოაგვარა.
და რა?
მენეჯმენტმა გუშინ განაცხადა, რომ Sotera-ს შვილობილი კომპანიის — Sterigenics-ის წინააღმდეგ კლასობრივი სარჩელის მონაწილე 882 მომჩივნიდან 879 მთლიანობაში $400 მილიონზე მეტის მიღების შეთავაზებას დათანხმდა. პრეტენზიები ეხებოდა Sterigenics-ის მიერ ვილოუბრუკის (ილინოისი) ქარხნიდან ეთილენის ოქსიდის გამონაბოლქვის გავრცელებას. საქმის დასახურად მხოლოდ სასამართლოს ხელმოწერაა დარჩენილი.
Sotera-ს მენეჯმენტმა განაცხადა, რომ გარიგება არ უნდა იქნას გაგებული, როგორც პასუხისმგებლობის აღიარება და ამტკიცებს, რომ ვილოუბროკის ქარხანა საზოგადოებისთვის საფრთხეს არ წარმოადგენს. ეთილენის ოქსიდი არის პესტიციდი და სტერილიზატორი, რომელიც National Cancer Institute-ის (კიბოს ეროვნული ინსტიტუტი) მიერ კიბოს გამომწვევ ნივთიერებად არის მიჩნეული.
მართალია, ეს შეთანხმება შეიძლება სრულად პოზიტიური სიახლე არ იყოს, თუმცა გაურკვევლობა დასრულდა და ეს ამბავი, როგორც ჩანს, ბაზარმა კარგად მიიღო.
ახლა რა?
პირველი კვარტლის ანგარიშის წარდგენისას Sotera-ს მენეჯმენტმა განაცხადა, რომ ამ წელს შემოსავალი $1.055-$1.09 მილიარდამდე გაიზრდება, რაც, გასულ წელთან შედარებით, 5%-9%-იან ზრდას წარმოადგენს. კომპანიაში ასევე პროგნოზირებენ, რომ წლიური კორექტირებული EPS (მოგება თითო აქციაზე) $0.78-$0.86-ს მიაღწევს. ეს იქნება 10%-19%-იანი შემცირება, რისი მიზეზიც მაღალი გადასახადები და საპროცენტო ხარჯებია. Sotera-ს შეიძლება მოუწიოს ვალის გაზრდა გარიგების პირობების შესასრულებლად, მაგრამ, თუ კომპანიის წლიურ შემოსავალს გავითვალისწინებთ, შეგვიძლია ვთქვათ, რომ ეს დიდი პრობლემა არ იქნება.
